ភ្នំពេញ: សមាសភាពគណៈកម្មាធិការជាតិរៀបចំការបោះឆ្នោត គ.ជ.ប. ត្រូវបានបញ្ជូនទៅដល់រដ្ឋសភា ហើយគណៈកម្មាធិការអចិន្ត្រៃយ៍រដ្ឋសភា បានសម្រេចដាក់ចូលក្នុងរបៀប វារៈនៃកិច្ចប្រជុំ អនុម័ត នាព្រឹកថ្ងៃទី១១ ខែតុលា ឆ្នាំ២០១២។ រដ្ឋមន្ត្រីក្រសួងមហាផ្ទៃ បានរៀបចំសមាសភាព គ.ជ.ប. ទាំង ៩ រូប ដើម្បីសុំការអនុម័តពីរដ្ឋសភា។
លោក ជាម យៀប សមាជិកគណៈកម្មាធិការអចិន្ត្រៃយ៍រដ្ឋសភា បានថ្លែងប្រាប់កាសែតរស្មីកម្ពុជាថា បេក្ខជនសមាសភាព គ.ជ.ប. ទាំង ៩ រូបនោះ រៀបចំឡើងដោយក្រសួងមហាផ្ទៃ ដោយមានលោក អ៊ឹម សួស្តី ជាបេក្ខភាពប្រធាន គ.ជ.ប. និង លោកស្រី ស៊ីន ជុំបូ ជាអនុប្រធាន។ សមាសភាព គ.ជ.ប. នោះ នឹងត្រូវរដ្ឋសភា ប្រជុំអនុម័ត ក្នុងកិច្ចប្រជុំ នាព្រឹកថ្ងៃទី១១ ខែតុលា ឆ្នាំ២០១២។
យ៉ាងណាក៏ដោយ លោក អ៊ឹម សួស្តី ប្រធាន គ.ជ.ប. ដែលបានឡើងធ្វើជាប្រធាន គ.ជ.ប. ចំនួន ២ អាណត្តិមកហើយ ចាប់តាំងពីឆ្នាំ២០០៣ បានបដិសេធមិនធ្វើអត្ថាធិប្បាយពីបេក្ខភាពសមាសភាព គ.ជ.ប. ថ្មី ដែលក្រសួងមហាផ្ទៃ រៀបចំ ទៅសុំការអនុម័តពីរដ្ឋសភា នៅពេលនេះឡើយ។
ក៏ប៉ុន្តែលោក អ៊ឹម សួស្តី បានមានប្រសាសន៍ប្រាប់ CEN នៅព្រលប់ថ្ងៃទី២៩ ខែកញ្ញា ឆ្នាំ២០១២ បានឲ្យដឹងថា សមាសភាពថ្មីរបស់ គ.ជ.ប. នោះ គឺមិនមែនជាសមាជិកគណបក្សនយោបាយ ឬក៏សមាជិកអង្គការសង្គមស៊ីវិលណាមួយទេ។ សមាសភាព គ.ជ.ប. គឺជាអ្នកជំនាញខាងជំនាញការបោះឆ្នោត។
លោក អ៊ឹម សួស្តី បានបន្ថែមថា សមាសភាពថ្មីនោះ តាមច្បាប់ ត្រូវរដ្ឋសភាបោះឆ្នោត អនុម័ត មានរយៈពេល ៧ ខែ យ៉ាងតិច នៅមុនថ្ងៃបោះឆ្នោត។ សមាសភាពសមាជិក គ.ជ.ប. ទាំង ៩ រូប មានអាណត្តិ រយៈពេល ៥ ឆ្នាំ។
សូមរម្លឹកថា គណបក្សសមរង្ស៊ី និងគណបក្សសិទ្ធិមនុស្ស បានទទូចទាមទារឲ្យក្រសួងមហាផ្ទៃ ផ្លាស់ប្តូរសមាជិក គ.ជ.ប. ដោយរៀបចំជ្រើសរើសបុគ្គលឯករាជ្យ មិនមែនជាសមាជិកគណបក្សនយោបាយណាមួយទេ។ គណបក្សប្រឆាំង អះអាងថា ការផ្លាស់ប្តូរសមាសភាព គ.ជ.ប. ដើម្បីឲ្យការបោះឆ្នោតជ្រើសតាំងតំណាងរាស្ត្រ នាថ្ងៃទី២៨ ខែកក្កដា ឆ្នាំ២០១៣ ធ្វើឡើងដោយយុត្តិធម៌ និងអាចទទួលយកបានទាំងអស់គ្នា។
គណបក្សប្រឆាំងបានដាក់សំណើជាលិខិត ហើយបានជួបពិភាក្សាផ្ទាល់ជាមួយនឹងតំណាងរដ្ឋមន្ត្រីក្រសួងមហាផ្ទៃ។ ក៏ប៉ុន្តែក្រសួងមហាផ្ទៃ មិនទទួលយកសំណើរបស់គណបក្សប្រឆាំង ចំពោះការផ្លាស់ប្តូរសមាសភាព គ.ជ.ប. ឡើយ។ ក្រសួងមហាផ្ទៃ សំអាងថា សំណើរបស់គណបក្សប្រឆាំង នាំឲ្យរាំងស្ទះដល់ដំណើរការរៀបចំការបោះឆ្នោត៕