ភ្នំពេញ: សម្តេចនាយករដ្ឋមន្ត្រី ហ៊ុន សែន បានប្រកាសថា ក្រុមយុវជនស្ម័គ្រចិត្ត ចុះវាស់វែង ធ្វើប័ណ្ណកម្មសិទ្ធិជូនដល់ប្រជាពលរដ្ឋ រួមទាំងអាជ្ញាធរជំនាញពាក់ព័ន្ធ នឹងទទួលបានមេដាយមាសពីរដ្ឋាភិបាល សម្រាប់បេសកកម្មជាប្រវត្តិសាស្ត្រពេលនេះ។
ក្នុងពិធីចែកប័ណ្ណកម្មសិទ្ធិដីធ្លី ដល់ប្រជាពលរដ្ឋ នៅស្រុកគាស់ក្រឡ ខេត្តបាត់ដំបង កាលពីព្រឹកថ្ងៃទី៣០ ខែកញ្ញា ឆ្នាំ២០១២ សម្តេចនាយករដ្ឋមន្ត្រី ហ៊ុន សែន បានមានប្រសាសន៍ថា "ចប់ការងារនេះហើយ មានពិធីមួយដ៏ធំ។ ខ្ញុំបានគ្រោង ហើយឥឡូវបោះមេដាយ។ អាលិខិតប័ណ្ណនឹង គឺមានហើយ ហើយបន្ទាប់ទៅមេដាយ ហើយមេដាយ អត់ពាក់មេដាយសំរិទ្ធ ប្រាក់ទេ ពាក់មេដាយមាសជូនតែម្តង។ ទាំងយុវជនស្ម័គ្រចិត្ត ទាំងគ្រូពេទ្យមកជាមួយ ទាំងតៃកុងឡានមកជាមួយ ទាំងមន្ត្រីសុរិយោដី។ អ្នកដែលចូលពាក់ព័ន្ធទាំងប៉ុន្មាន គឺថា ពាក់មេដាយមាសឲ្យទាំងអស់! ហើយខ្ញុំអ្នកប៉ាវនៅកោះពេជ្រ..."។
ចំពោះមុខក្រុមយុវជនស្ម័គ្រចិត្ត នៅខេត្តបាត់ដំបង សម្តេចនាយករដ្ឋមន្ត្រី ហ៊ុនសែន ក៏បានលើកឡើងថា "ក្មួយយុវជន ពូសុំហៅថា វីរៈយុវនិស្សិតស្ម័គ្រចិត្ត ព្រោះនេះជាកិច្ចការ ដែលជាវីរៈភាពធំណាស់ ដែលឥឡូវនេះ ៣ ខែហើយ ដែលក្មួយៗ ធ្វើកិច្ចការងារនេះ បានយ៉ាងល្អ។ កិច្ចការនេះ ជាប្រវត្តិសាស្ត្រធំណាស់!។ ក្មួយៗ ចាំមើលណា៎!។ ពូមីង ពុកម៉ែ យាយតា ដែលបានទទួលកម្មសិទ្ធិនេះរួចហើយ ការដាំដុះរបស់គាត់ នឹងស្ទុះឡើងរហ័ស។ អត្រានៃភាពក្រីក្រ នឹងធ្លាក់ចុះរហ័ស។ កំណើនជីវភាពរបស់ប្រជាពលរដ្ឋ កើនឡើង តាមរយៈ... អត់មាននរណាក្រោមមួយហិកតាទេ... មានតែដីលំនៅដ្ឋានទេ ដែលក្រោមមួយហិកតា។ អីចឹងទេ ដីនេះ បើយើងប្រើប្រាស់ឲ្យអស់សក្កានុពលរបស់វា ត្រូវសេដ្ឋកិច្ចជនបទ ចេញពីវិស័យកសិកម្មនេះ ធំណាស់!"។
សម្តេចនាយករដ្ឋមន្ត្រី ហ៊ុន សែន ក៏បានដាក់បទបញ្ជាផ្ទាល់មាត់ដល់លោក លឹម គានហោ រដ្ឋមន្ត្រីក្រសួងធនធានទឹក និងឧតុនិយម ដែលត្រូវទទួលខុសត្រូវ គឺក៏ត្រូវពិនិត្យរៀបចំបណ្តាញទឹកសម្រាប់ស្រោចស្រព និងការដាំដុះរបស់ប្រជាពលរដ្ឋ នៅតំបន់វាស់វែងចែកដី ធ្វើប័ណ្ណកម្មសិទ្ធិថ្មីនោះផង បន្ថែមលើបញ្ហាទឹកសម្រាប់បរិភោគ។
សម្តេចនាយករដ្ឋមន្ត្រី ក៏បានប្រកាសថា ក្រុមយុវជនចុះវាស់វែង ធ្វើប័ណ្ណកម្មសិទ្ធិដីធ្លី នាពេលនេះ មានផ្ទៃដីទំហំ ១.៨៧០.០០០ ហិកតា និងប្រជាពលរដ្ឋ ៤៧៨.៩២០ គ្រួសារ។ រីទំហំក្បាលដី ប្រហែលជា ៧០០.០០០ ក្បាលដី។
មកដល់ពេលនេះ សម្តេចហ៊ុនសែន បានប្រកាសថា គិតត្រឹមថ្ងៃទី២៩ ខែកញ្ញា ឆ្នាំ២០១២ តាមតួលេខរបស់ក្រសួងរៀបចំដែនដី នគរូបនីយកម្ម និងសំណង់ គឺក្រុមយុវជនស្ម័គ្រចិត្ត និងមន្ត្រីជំនាញ បានធ្វើសកម្មភាពលើ ១៨៣ ឃុំ ហើយការបិទផ្សាយសាធារណៈឡើងដល់ ២៦.៨២៣ ក្បាលដីហើយ ដែលមានទំហំដីចំនួន ៤៣.៧២២ ហិកតា។ ក្នុងនោះ ប័ណ្ណកម្មសិទ្ធិ ដែលបានចែកដល់ប្រជាពលរដ្ឋ បានចំនួន ១.៦៤៨។ ការចែកប័ណ្ណកម្មសិទ្ធិដីធ្លី លើកដំបូង ក្រោយពីយុវជនស្ម័គ្រចិត្តចុះវាស់វែង កាលពីថ្ងៃទី២៨ ខែមិថុនា ឆ្នាំ២០១២ គឺសម្តេចនាយករដ្ឋមន្ត្រី ហ៊ុន សែន បានចែកប័ណ្ណផ្ទាល់ដៃដល់ប្រជាពលរដ្ឋ នៅខេត្តក្រចេះ កាលពីថ្ងៃទី២១ ខែកញ្ញា ឆ្នាំ២០១២៕