ខេត្តកំពង់ចាម: កាលពីរសៀលថ្ងៃទី២៨ ខែកញ្ញា ឆ្នាំ២០១២នេះ នៅសាលប្រជុំនៃទីបញ្ជាការកងរាជអាវុធហត្ថខេត្តកំពង់ចាម មានរៀបចំពិធីបិទវគ្គបំប៉នជំនាញព័ត៌មាន និងសន្តិសុខដល់នាយកងរាជអាវុធហត្ថខេត្តកំពង់ចាម ក្រោមអធិបតីភាព លោក វ៉ា សារិទ្ធ មេបញ្ជាការនៃបញ្ជាការដ្ឋានកងរាជអាវុធហត្ថខេត្តកំពង់ចាម និងមេបញ្ជាការរងជាច្រើនរូបទៀត ។ សិក្ខាកាមដែលបានចូលរួមរៀនវគ្គនេះមានចំនួន៤៥រូប មកពីគ្រប់មន្ទីរ ការិយាល័យ បញ្ជាការ បញ្ជាការរងស្រុកនៃទីបញ្ជាការកងរាជអាវុធហត្ថខេត្តទាំងមូល ។
ក្នុងឧិកាសនោះលោកមេបញ្ជាការគណ:អធិបតីក៏បានកោតសសើរដល់ អ្នកគ្រប់គ្រងវគ្គដែលដឹកនាំការរៀនសូត្រ និងសាមគ្គីភាពគ្នាបានល្អ ពិសេសសិក្ខាកាម វគ្គនេះរៀនសូត្របាននិទ្ទេសល្អ និងល្អបង្គួរស្ទើរតែ១០០% ។
លោកមេបញ្ជាការបានមានប្រសាសន៍ផ្តាំផ្ញើដល់សិក្ខាកាមថា ពេលត្រឡប់ទៅវិញ យើងត្រូវយល់ដឹងថា យើងទាំងអស់គ្នាជាមន្ត្រីកងរាជអាវុធហត្ថ ជាមន្ត្រីនគរបាលយុត្តិធម៌ ជាអ្នកប្រតិបត្តិច្បាប់ អ្នកអនុវត្តច្បាប់ ត្រូវឈានមុខគ្នារាល់ការអនុវត្តច្បាប់ទាំងឡាយ ពិសេសយកចិត្តទុកដាក់នឹងការរៀនសូត្រ ពីច្បាប់មន្ត្រីនគរបាលយុត្តិធម៌។
លោកមេបញ្ជការក៏មានប្រសាសន៍បន្តទៀតថា យើងត្រូវរាបសារជាមួយប្រជាពលរដ្ឋ និងមហាជន ហាមប៉ះពាល់និងគាបសង្កត់ប្រជាពលរដ្ឋ តែជាមួយជនល្មើសត្រូវដាច់ខាត ។ និងត្រូវគោរពឱ្យបានម៉ឺងម៉ាត់នូវបទបញ្ជាទាំងឡាយដែលបានដាក់ចុះ ជាពិសេសបទបញ្ជាខ្សែបណ្តោយនិងត្រូវគោរពតាមឋានានុក្រម ។
ក្នុងឱកាសនោះលោកមេបញ្ជាការគណៈអធិបតីក៏បានលើកយកគោលការណ៍ ភូមិឃុំមានសុវត្ថិភាពទាំង៩ចំណុច យកមកផ្សព្វផ្សាយដល់សិក្ខាកាមត្រូវអនុវត្តបទបញ្ជានេះ ឲ្យបានម៉ឺងម៉ាត់ ជាពេសសគឺគោលការណ៍ទប់ស្កាត់ការចែកចាយនិងសេពគ្រឿងញៀននៅ ក្នុងមូលដ្ឋាននិងបន្តសហការជាមួយអាជ្ញាធរមូលដ្ឋាន ដើម្បីក្តាប់និងយកព័ត៌មានព្រោះយើងដឹងព័ត៌មាន យើងអាចបង្ការនិងបង្ក្រាបបទល្មើស ទាំងនេះបាន។ នៅទីបញ្ចប់នៃកម្មវិធីបិទវគ្គនេះដែរ លោកមេបញ្ជាការគណៈអធិបតីក៏បានដាក់បទបញ្ជាដល់សិក្ខាកាមក៏ដូចជា មន្ត្រីកងរាជអាវុធហត្ថទូទាំងខេត្តត្រូវត្រៀមលក្ខណៈចូលរួមការពារ សន្តិសុខសណ្តាប់ធ្នាប់ ពេលប្រជុំអាស៊ាន នៅខែ ១១ នេះដែលមានប្រទេសមហាអំណាចជាច្រើនបានអញ្ជើញមកចូលរួមនឹងកម្ពុជា យើងជាប្រធានអាស៊ាន ។ ជាពិសេសមន្ត្រីកងរាជអាវុធហត្ថថ្នាក់មូលដ្ឋាន ត្រូវយកចិត្តទុកដាក់ការពារសន្តិសុខ សណ្តាប់ធ្នាប់ដល់ប្រមុខដឹកនាំនៃរាជរដ្ឋាភិបាលគ្រប់លំដាប់ថ្នាក់ និងគ្រប់ស្ថាប័ន ដែលអញ្ជើញចុះមកមូលដ្ឋានរបស់ខ្លួន និងត្រូវរាយការណ៍មកមេបញ្ជាការ មេបញ្ជាការរងកងរាជអាវុធហត្ថខេត្តឲ្យបានជ្រាប៕