ភ្នំពេញ ៖ លោកវេជ្ជបណ្ឌិតម៉មប៊ុនហេងរដ្ឋមន្ត្រីក្រសួងសុខាភិបាលកាលពីថ្ងៃទី២៩ខែកញ្ញាឆ្នាំ២០១២បានធ្វើការអំពាវនាវដល់បងប្អូនប្រជាពលរដ្ឋទាំងអស់ត្រូវយកចិត្តទុកដាក់ខ្ពស់ចំពោះបញ្ហាអនាម័យពិសេសនៅក្នុងរដូវកាន់បិណ្ឌឬបុណ្យភ្ជុំបិណ្ឌខាងមុខនេះ។
ការអំពាវនាវរបស់រដ្ឋមន្ត្រីក្រសួងសុខាភិបាលនេះធ្វើឡើងបន្ទាប់ពីប្រជាពលរដ្ឋយើងមួយចំនួនកន្លងមកបានពុលចំណីអាហារហើយខ្លះទៀតដោយសារការបរិភោគអាហារមិនបានត្រឹមត្រូវក៏ធ្វើឲ្យកើតមានជំងឺរាករូសឬមានអាការៈក្អួតចង្អោរជាដើម។
បើយោងតាមរបាយការណ៍របស់ក្រសួងសុខាភិបាលឆ្នាំ២០១១កន្លងទៅបានបង្ហាញឲ្យដឹងថាមានករណីពុលចំណីអាហារចំនួន១២លើកដោយសារតែការបរិភោគមិនមានអនាម័យ។
លោកវេជ្ជបណ្ឌិតម៉មប៊ុនហេងបានមានប្រសាសន៍ឲ្យដឹងទៀតថាកន្លងមកមានបងប្អូនប្រជាពលរដ្ឋយើងមួយចំនួនបានកើតជំងឺរាករូសឬក្អួតចង្អោរដោយសារការបរិភោគចំណីអាហារមិនមានអនាម័យត្រឹមត្រូវពិសេសនៅក្នុងរដូវបុណ្យទានដែលសំបូរទៅដោយមនុស្សកកកុញនិងចំណីអាហារច្រើនពោរពាសងាយនឹងឆ្លងនូវជំងឺ។ លោករដ្ឋមន្ត្រីបានចាត់ទុកថាការទុកដាក់ចំណីអាហារឲ្យបានត្រឹមត្រូវដូចជាគ្របនិងវេចខ្ចប់ឲ្យមានអនាម័យពិតជាមានសារៈសំខាន់ខ្លាំងណាស់ក្នុងកាការពារពីជំងឺដង្កាត់ផ្សេងៗ។ លោករដ្ឋមន្ត្រីបានណែនាំថាមិនត្រូវបរិភោគចំណីអាហារណាដែលមិនស្អាតឬជូរផ្អូមនោះទេ ព្រោះចំណីអាហារទាំងអស់នោះពេលយើងបរិភោគទៅនឹងធ្វើឲ្យប៉ះពាល់ដល់សុខភាព។ ដូច្នេះសូមបងប្អូនប្រកាន់ខ្ជាប់នូវវិធានការអនាម័យឲ្យបានខ្ជាប់ខ្ជួនរួមមានផឹកស្អាតរស់នៅស្អាតនិងបរិភោគស្អាតដើម្បីការពារសុខភាពខ្លួនយើងក៏ដូចជាក្រុមគ្រួសារយើងចៀសផុតពីជំងឺផ្សេងៗដូចជាជំងឺរាករូស,ក្អួតចង្អោរជាដើម។ ជាងនេះទៅទៀតត្រូវឧស្សាហ៍លាងដៃនិងសាប៊ូព្រោះថាការលាងដៃនឹងសាប៊ូមានសារៈសំខាន់ណាស់ក្នុងការការពារជំងឺរាករូសនិងជំងឺពងបែកដៃជើងនិងក្នុងមាត់ដែលទើបតែបានយាយីមកលើកុមារកម្ពុជាយើងនាពេលថ្មីៗនេះដែលបណ្តាលឲ្យកុមារជិត៨០នាក់ឆ្លងក្នុងនោះគេរកឃើញមានប្រមាណ៦១នាក់ត្រូវនឹងនិយមន័យនៃជំងឺនេះ។ក្នុងចំណោម៦១នាក់នោះមាន៥៦នាក់បានស្លាប់បាត់បង់ជីវិត។
ពាក់ព័ន្ធទៅនឹងបុណ្យកាន់បិណ្ឌនិងភ្ជុំបិណ្ឌនេះដែរមិនមែនមានការប្រុងប្រយ័ត្នចំពោះតែក្រសួងសុខាភិបាលប៉ុណ្ណោះនោះទេមន្ត្រីនាយកដ្ឋានផលិតកម្មនិងបសុព្យាបាលនៃក្រសួងកសិកម្មរុក្ខាប្រមាញ់និងនេសាទក៏បានធ្វើការណែនាំដល់មន្ត្រីរបស់ខ្លួនបង្កើនការត្រួតពិនិត្យដល់សត្វគ្រប់ប្រភេទដែលធ្វើចរាចរនៅតាមដងផ្លូវពិសេសសត្វមាន់ទា។
លោកកៅផលប្រធាននាយកដ្ឋានផលិតកម្មនិងបសុព្យាបាលបានមានប្រសាសន៍ថានាយកដ្ឋានបានធ្វើការណែនាំរួចហើយដល់មន្ត្រីបសុពេទ្យនៅទូទាំងប្រទេសត្រូវបង្កើនការត្រួតពិនិត្យដល់សត្វនៅតាមដងវិថីពិសេសត្រូវធ្វើជីវៈសុវត្ថិភាពតាំងពីដើមទីដល់ចុងទី។ លោកកៅផលបានពន្យល់ថាមានន័យថាមន្ត្រីត្រូវបាញ់ថ្នាំសម្លាប់មេរោគនៅដើមទីទៅលើមធ្យោបាយដឹកជញ្ជូននិងដល់កន្លែងទុកដាក់សត្វត្រូវបាញ់ម្តងទៀត។ លោកបន្តថាការធ្វើបែបនេះគឺដើម្បីធានាសុវត្ថិភាពកុំឲ្យមានឆ្លងជំងឺផ្សេងៗដែលឆ្លងតាមរយៈសត្វដូចជាជំងឺផ្តាសាយបក្សីជាដើម។ លោកបានបញ្ជាក់ថាតំរូវការសត្វនៅក្នុងរដូវកាន់បិណ្ឌនិងភ្ជុំបិណ្ឌមានតិចជាងបុណ្យប្រពៃណីចិនទេដូចជាបុណ្យសែនក្បាលទឹក។
លោកវេជ្ជបណ្ឌិតម៉មប៊ុនហេងបានមានប្រសាសន៍ថាមិនត្រូវបរិភោគមាន់ទាឈឺឬងាប់នោះទេដើម្បីការពារកុំឲ្យឆ្លងជំងឺផ្តាសាយបក្សីត្រូវយកវាទៅដុតឬកប់ចោល។
ជំងឺផ្តាសាយបក្សីបានឆ្លងនៅក្នុងប្រទេសកម្ពុជានៅឆ្នាំ២០០៤នៅភូមិពោងពាយសង្កាត់ភ្នំពេញថ្មីហើយរហូតមកដល់ពេលនេះមានប្រជាពលរដ្ឋឆ្លងជំងឺនេះចំនួន២១នាក់ក្នុងនោះស្លាប់១៩នាក់នឹងជួយព្យាបាលបានទាន់ពេលវេលាចចំនួន២នាក់៕
សំអឿន