ឯកឧត្តម ស៊ុន ជិន ឡុង ( SUN JIN LONG) លេខាធិការរងគណៈកម្មាធិការបក្សកុម្មុយនិស្តចិនខេត្តអានហ៊ួយ
(Anhui) មានប្រសាសន៍ឲ្យដឹងនៅថ្ងៃទី១៥ ខែសីហា
ឆ្នាំ២០១២ នៅវិមាន សន្តិភាព ក្នុងរាជធានីភ្នំពេញថា គោលបំណងនៃដំណើរទស្សនកិច្ចមកកាន់ព្រះរាជាណាចក្រកម្ពុជានាពេលនេះ
គឺដើម្បីពង្រីក និងពង្រឹងនូវកិច្ចសហប្រតិបត្តិការរវាងប្រជាជនខេត្តអានហ៊ួយ
(Anhui) ជាមួយប្រជាជនកម្ពុជា និងស្វែងរកលទ្ធភាពដើម្បីធ្វើការវិនិយោគ
និងសហការលើគ្រប់វិស័យទាំងអស់នៅក្នុងប្រទេសកម្ពុជា។
ឯកឧត្តម អ៊ាង សុផល្លែត ជំនួយការសម្តេចតេជោនាយករដ្ឋមន្រ្តីឲ្យដឹងថា
ក្នុងជំនួបសម្តែងការគួរសមជាមួយសម្តេចអគ្គមហាសេនាបតីតេជោ ហ៊ុន សែន ឯកឧត្តម
ស៊ុន ជិន ឡុង ( SUN JIN LONG) បានជម្រាបជូនសម្តេច តេជោនាយករដ្ឋមន្រ្តីថា នេះជាលើកទី១ ហើយដែលរូបឯកឧត្តមបានមកបំពេញទស្សនកិច្ចនៅព្រះរាជាណាចក្រកម្ពុជា
គឺបានសង្កេតឃើញ ថា ចាប់តាំងពីព្រលានយន្តហោះអន្តរជាតិភ្នំពេញមកដល់សណ្ឋាគារដែលស្នាក់នៅ
ឯកឧត្តម មានអារម្មណ៍ថា ព្រះរាជាណាចក្រកម្ពុជាកំពុងមានការអភិវឌ្ឍលើគ្រប់វិស័យ
ដែលឯកឧត្តមសូមគោរពសម្តែងនូវការវាយតម្លៃខ្ពស់ ចំពោះការដឹកនាំដ៏ឈ្លាសវៃរបស់សម្តេចតេជោនាយករដ្ឋមន្រ្តី។
ឯកឧត្តម ស៊ុន ជិន ឡុង ( SUN JIN LONG) ក៏បានគោរពអញ្ជើញសម្តេចតេជោទៅធ្វើទស្សនកិច្ចនៅខេត្ត
Anhui នៅពេល ណាមួយផងដែរ។
ឯកឧត្តម ស៊ុន ជិន ឡុង ( SUN JIN LONG) ក៏បានរាយការណ៍ជូនសម្តេចតេជោអំពីស្ថានភាពរបស់ខេត្ត
Anhui ដែលជាខេត្តមួយស្ថិតនៅក្នុងភូមិភាគកណ្តាលរបស់ចិន
និងជាខេត្តដែលមានសកលវិទ្យាល័យជាង១០០ ជាខេត្តដែលត្រូវបានចាត់ទុកជាខេត្តឧស្សាហកម្ម
និងកសិកម្មផងដែរ។
ជាការឆ្លើយតប សម្តេចតេជោនាយករដ្ឋមន្រ្តីបានថ្លែងថា
សម្តេចនឹងអញ្ជើញទៅធ្វើទស្សនកិច្ចនៅខេត្ត Anhui នៅពេលដែលសម្តេចអញ្ជើញទៅធ្វើទស្សនកិច្ចនៅប្រទេសចិននៅពេលណាមួយ
ដោយសម្តេចបានស្នើឲ្យឯកឧត្តមឯកអគ្គរដ្ឋទូតចិនប្រចាំនៅកម្ពុជា រៀបចំដំណើរទស្សនកិច្ចនេះ។
ពាក់ព័ន្ធនឹងកិច្ចសហប្រតិបត្តិការ នៃការស្វែងរកលទ្ធភាពវិនិយោគនៅកម្ពុជា សម្តេចតេជោនាយករដ្ឋមន្រ្តីបានជម្រាបជូនឯកឧត្តម ស៊ុន ជិន ឡុង ( SUN JIN LONG) ថា សូមពិនិត្យមើលនូវអ្វីដែលអាចវិនិយោគបាន និងអាចធ្វើកិច្ចសហប្រតិបត្តិការបាន ដើម្បីធ្វើយ៉ាងណាជួយជំរុញពាណិជ្ជកម្មរវាងប្រទេសកម្ពុជា-ចិនឲ្យឈានដល់៥.០០០ លានដុល្លារសហរដ្ឋអាមេរិកនៅឆ្នាំ២០១៧ ដូចដែលថ្នាក់ដឹកនាំនៃប្រទេសទាំងពីរ បានចេញសេចក្តីថ្លែងការណ៍នា ពេលកន្លងមក។
ពាក់ព័ន្ធនឹងកិច្ចសហប្រតិបត្តិការ នៃការស្វែងរកលទ្ធភាពវិនិយោគនៅកម្ពុជា សម្តេចតេជោនាយករដ្ឋមន្រ្តីបានជម្រាបជូនឯកឧត្តម ស៊ុន ជិន ឡុង ( SUN JIN LONG) ថា សូមពិនិត្យមើលនូវអ្វីដែលអាចវិនិយោគបាន និងអាចធ្វើកិច្ចសហប្រតិបត្តិការបាន ដើម្បីធ្វើយ៉ាងណាជួយជំរុញពាណិជ្ជកម្មរវាងប្រទេសកម្ពុជា-ចិនឲ្យឈានដល់៥.០០០ លានដុល្លារសហរដ្ឋអាមេរិកនៅឆ្នាំ២០១៧ ដូចដែលថ្នាក់ដឹកនាំនៃប្រទេសទាំងពីរ បានចេញសេចក្តីថ្លែងការណ៍នា ពេលកន្លងមក។
សម្តេចតេជោនាយករដ្ឋមន្រ្តីបាន ធ្វើការណែនាំឲ្យពិនិត្យមើលលទ្ធភាពនៃការវិនិយោគនៅកម្ពុជាលើការផលិតនូវទំនិញ
ដើម្បីនាំចេញទៅកាន់ប្រទេសចិន ដែលសព្វថ្ងៃនេះ ប្រទេសចិនបានអនុញ្ញាតឲ្យកម្ពុជានាំទំនិញចូលទៅកាន់ប្រទេសចិនចំនួន៤១៨
មុខ៕