ឯកឧត្តម ង្វៀន ស៊ិន ភុក (Nguyen Xuan Phuc) សមាជិកការិយាល័យនយោបាយ
និងជាឧបនាយករដ្ឋមន្រ្តីនៃសាធារណរដ្ឋសង្គមនិយមវៀតណាម
និងជាប្រធានគណៈកម្មាធិការជាតិត្រួតពិនិត្យគ្រឿងញៀន ជម្ងឺអេដស៍
និងពេស្យាចារវៀតណាម នៅក្នុងជួបសម្តែង ការគួរសមជាមួយសម្តេចអគ្គមហាសេនាបតីតេជោ
ហ៊ុន សែន នៅវិមានសន្តិភាព ក្នុងរាជធានីភ្នំពេញ នាថ្ងៃទី១៦ ខែសីហា ឯកឧត្តម
បានវាយតម្លៃខ្ពស់ចំពោះការរីកចម្រើនយ៉ាងឆាប់រហ័ស របស់ព្រះរាជាណាចក្រកម្ពុជា។
ឯកឧត្តម អ៊ាង សុផល្លែត ជំនួយការសម្តេចតេជោនាយករដ្ឋមន្រ្តីឲ្យដឹងថា
ឯកឧត្តម ង្វៀន ស៊ិន ភូក (Nguyen Xuan
Phuc) នៅក្នុងអំឡុងដំណើរទស្សនកិច្ចមកកាន់កម្ពុជាក្នុងពេលនេះបានពាំនាំនូវការផ្តាំផ្ញើសាកសួរសុខទុក្ខពីសំណាក់ថ្នាក់ដឹកនាំ
នៃសាធារណរដ្ឋ សង្គមនិយមវៀតណាម ជូនសំពោះសម្តេចតេជោនាយករដ្ឋមន្រ្តី និងបានគូសបញ្ជាក់ថា
នៅក្នុងដំណើរទស្សនកិច្ចនេះ លោកបានសង្កេតឃើញថា កម្ពុជាមានការអភិវឌ្ឍយ៉ាងឆាប់រហ័ស
ជាពិសេស លើវិស័យសេដ្ឋកិច្ច ទេសចរណ៍ ដែលនាំឲ្យកំណើនសេដ្ឋកិច្ចកម្ពុជាកើនឡើងខ្ពស់គួរឲ្យកត់សម្គាល់។
ឯកឧត្តម Nguyen Xuan Phuc បានជម្រាបជូនសម្តេចតេជោថា
ឆ្នាំនេះជាឆ្នាំនៃទំនាក់ទំនងការទូតរវាងប្រទេសកម្ពុជា និងវៀតណាម ដែលនៅក្នុងប្រទេសវៀតណាមមានរៀបចំសកម្មភាពជាច្រើន
ហើយឯកឧត្តមបានឆ្លៀតឱកាសនេះ មកធ្វើទស្សនកិច្ចនៅប្រទេសកម្ពុជា ដើម្បី
ពង្រឹងកិច្ចសហប្រតិបត្តិការរវាងប្រទេសទាំងពីរឲ្យកាន់តែស៊ីជម្រៅថែមទៀត។
ឯកឧត្តម Nguyen Xuan Phuc ក៏បានជម្រាបជូនសម្តេចតេជោនាយករដ្ឋមន្រ្តី
អំពីការលើកទឹកចិត្តដល់ ការវិនិយោគ ការសហការលើវិស័យឯកជនរវាងប្រទេសទាំងពីរ
និងបានរាយការណ៍អំពីកិច្ចពិភាក្សារបស់លោកជាមួយឯកឧត្តម កែ គឹមយ៉ាន ឧបនាយករដ្ឋមន្រ្តី
និងជាប្រធានអាជ្ញាធរជាតិប្រយុទ្ធប្រឆាំងគ្រឿងញៀន និងឯកឧត្តម អ៊ិត សំហេង
រដ្ឋមន្ត្រីក្រសួងសង្គមកិច្ច អតីតយុទ្ធជននិងយុវនីតិសម្បទា ក្នុងន័យផ្លាស់ប្តូរព័ត៌មាន
និងបទពិសោធន៍រវាងស្ថាប័ន និងស្ថាប័ន ដើម្បីចូលរួមចំណែកក្នុងការនាំមកនូវជីវភាពល្អប្រសើរ
សុវត្ថិភាព និងសន្តិភាព ជូនដល់ប្រជាជននៃប្រទេសទាំងពីរ។
សម្តេចតេជោនាយករដ្ឋមន្រ្តី បានមានប្រសាសន៍វាយតម្លៃខ្ពស់ចំពោះទំនាក់ទំនងរវាងប្រទេសទាំងពីរកម្ពុជា-វៀតណាម និងបានលើកទឹកចិត្តឲ្យមានការពង្រឹងថែមទៀត
នូវការសហការរវាងប្រទេសទាំងពីរ ជាពិសេសលើវិស័យពាណិជ្ជកម្ម វិនិយោគ ទេសចរណ៍
និងវប្បធម៌ជាដើម។
សម្តេចតេជោបានលើកទឹកចិត្ត និងវាយតម្លៃខ្ពស់ចំពោះកិច្ចពិភាក្សា
និងការផ្លាស់ប្តូរព័ត៌មាន និងបទពិសោធន៍រវាងស្ថាប័ន និងស្ថាប័ន ដោយបានលើកទឹកចិត្តឲ្យបន្តកិច្ចពិភាក្សា
និងសហការគ្នា ជាបន្តទៅទៀត៕