ភ្នំពេញ: នៅថ្ងៃទី ១៦ សីហា ២០១២ វេលាម៉ោង ១៥ និង ៣០ នាទី គណៈបញ្ជាការឯកភាពខណ្ឌទួលគោក ( សាលាខណ្ឌ នគរបាលខណ្ឌ អាជ្ញាធរសង្កាត់ផ្សារដើមគរ និងកំលាំងប៉ុស្តិ៍រដ្ឋបាលផ្សារដើមគរ ) ដែលដឹកនាំដោយលោក សៀង សុខ ព្រះរាជអាជ្ញារង នៃអយ្យការអមសាលាដំបូងរាជធានីភ្នំពេញ និងលោក ហួត ចាន់វាសនា អធិការស្តីទីនគរបាលខណ្ឌទួលគោក បានចុះបង្ក្រាបទីតាំងដែលសង្ស័យផ្តល់ ទីតាំងប្រើប្រាស់គ្រឿងញៀន ប្រើប្រាស់គ្រឿងញៀនខុសច្បាប់ និងរក្សាទុក និងកាន់កាប់អាវុធខុសច្បាប់ ដែលមានទីតាំងនៅចំណុចហាងលក់កាហ្វេយីហោ ជីង ជីង ដែលមានទីតាំងនៅដីឡូតិ៍លេខ១៤ ផ្លូវលេខ២០៦ ក្រុមទី៣៥ ភូមិ១៦ សង្កាត់ផ្សារដើមគរ ខណ្ឌទួលគោក រាជធានីភ្នំពេញ។ប្រតិបត្តិការនោះ ប៉ូលិសបានឃាត់ខ្លួនជនសង្ស័យចំនួន ៦ នាក់ (ប្រុស ៤នាក់ ស្រី ២នាក់) ដែលមានឈ្មោះ ទី១. ជា ម៉េងហួត ហៅហួត ភេទប្រុស អាយុ ២៩ឆ្នាំ ជាជាងជួសជុលរថយន្ត ស្នាក់នៅផ្ទះកើតហេតុខាងលើ (ជាម្ចាស់ទីតាំង) ទី២. ឈ្មោះ កែវ រដ្ឋា ភេទស្រី អាយុ ២៨ឆ្នាំ ជាអ្នកលក់កាហ្វេ ស្នាក់នៅផ្ទះកើតហេតុខាងលើ (ជាម្ចាស់ទីតាំង) ទី៣.ឈ្មោះ ឡេង ភារម្យ ភេទប្រុស អាយុ ២១ឆ្នាំ ពុំមានមុខរបរពិតប្រាកដ ស្នាក់នៅផ្ទះជួលទីតាំងខាងលើ (ជាម្ចាស់អាវុធ) ទី៤. ឈ្មោះ សុខ ស្រីពៅ ភេទស្រី អាយុ ១៨ឆ្នាំ នៅផ្ទះ ស្នាក់នៅផ្ទះពុំស្គាល់លេខ ផ្លូវលំ សង្កាត់ច្បារអំពៅទី២ ខណ្ឌមានជ័យ ទី៥.ឈ្មោះ ង៉ែត សុខឡេង ភេទប្រុស អាយុ ១៨ឆ្នាំ ជាកម្មករលាងរថយន្ត ស្នាក់នៅផ្ទះកើតហេតុខាងលើ (ជាអ្នកប្រើប្រាស់គ្រឿងញៀន) និងទី៦.ឈ្មោះ ហួ គឹមហេង ភេទប្រុស អាយុ ១៧ឆ្នាំ ជាសិស្សថ្នាក់ទី១២ វិទ្យាល័យ ហ៊ុន សែន សណ្តែក ស្នាក់នៅភូមិកាប៉ាល់ ឃុំសណ្តែក ស្រុកបាធាយ ខេត្តកំពង់ចាម (ជាអ្នកប្រើប្រាស់គ្រឿងញៀន) ។
វត្ថុតាងដកហួតពីជនសង្ស័យទាំង ៦នាក់ រួមមាន ម៉ូតូមួយគ្រឿងម៉ាក Honda Scoopy ពណ៌ស ស៊េរីឆ្នាំ ២០១៣ គ្មានស្លាកលេខ អាវុធខ្លីមួយដើមម៉ាក រ៉ូឡូ មានគ្រាប់ ៤គ្រាប់ ទូរស័ព្ទចំនួន ៦គ្រឿង និងទូរស័ព្ទចិនគ្មានថ្ម ២គ្រឿង ឧបករណ៍ប្រើប្រាស់គ្រឿងញៀនមួយចំនួន លុយដុល្លារ ២៥០ដុល្លារ និងលុយខ្មែរ ២ម៉ឺនរៀល។
ជនសង្ស័យទាំង ៦នាក់ រួមទាំងវត្ថុតាងកំពុងឃាត់ខ្លួន និងរក្សាទុកជាបណ្តោះអាសន្ន នៅអធិការដ្ឋាននគរបាលខណ្ឌទួលគោក ដើម្បីសាកសួរ និងកសាងសំណុំរឿបញ្ជូនទៅសាលាដំបូងរាជធានីភ្នំពេញ៕
