ភ្នំពេញ: រាជរដ្ឋាភិបាលកម្ពុជា បានសម្រេចតែងតាំង លោកស្រី ទួត បញ្ញា អនុរដ្ឋលេខាធិការក្រសួងការបរទេស ជាឯកអគ្គរាជទូតថ្មី ប្រចាំប្រទេសហ្វីលីពីន ជំនួសលោក ហើស សិរីធន អតីតឯកអគ្គរាជទូតកម្ពុជា។ ការផ្លាស់ប្តូរឯកអគ្គរាជទូតកម្ពុជា ប្រចាំប្រទេសហ្វីលីពីន ត្រូវបានធ្វើឡើងភ្លាមៗ ក្រោយពីកម្ពុជា និងហ្វីលីពីន កើតមានជម្លោះប៉ាកា តាមរយៈលិខិត ក្នុងរឿងជម្លោះសមុទ្រចិនខាងត្បូង។
ក៏ប៉ុន្តែលោក កុយ គួង អ្នកនាំពាក្យការបរទេសកម្ពុជា បានគូសបញ្ជាក់ថា ការផ្លាស់ប្តូរឯកអគ្គរាជទូតកម្ពុជា ប្រចាំនៅប្រទេសហ្វីលីពីន នៅពេលនេះ ជារឿងធម្មតាប៉ុណ្ណោះ មិនមែនមកពីបញ្ហាជម្លោះសមុទ្រចិនខាងត្បូងនោះឡើយ។
លោក កុយ គួង បានមានប្រសាសន៍នៅរសៀលថ្ងៃទី១៦សីហា ឆ្នាំ២០១២ ថា "ជារឿងធម្មតា មិនមែនជារឿងប្លែកទេ នៅពេលដែលក្រសួងការបរទេស ឬក៏រដ្ឋាភិបាលយល់ឃើញថា មានការចាំបាច់ត្រូវផ្លាស់ប្តូរ គឺយើងត្រូវតែផ្លាស់ប្តូរ។ ដូច្នេះ វាជារឿងធម្មតា។ មិនមែនជារឿងប្លែក ឬក៏ជារឿងភ្ញាក់ផ្អើលអ្វីទេ។ កន្លងមក ខ្ញុំសង្កេតឃើញឯកអគ្គរដ្ឋទូតមកកម្ពុជាក៏អីចឹងដែរ។ ខ្លះបានមួយឆ្នាំតិចតួច គាត់ត្រូវការផ្លាស់ប្តូរទៅវិញ។ គាត់ដាក់ឯកអគ្គរដ្ឋទូតថ្មីមកវិញ។ ដូច្នេះជារឿងធម្មតាទេ អត់មានអីជារឿងប្លែកទេ"។
លោក កុយ គួង បានបន្ថែមថា សម្រាប់ឯកអគ្គរាជទូត ឬឯកអគ្គរដ្ឋទូត គឺមិនមានរយៈពេលកំណត់អាណត្តិ ឆ្នាំទេ ទៅតាមភាពចាំបាច់ និងការតែងតាំងរបស់រាជរដ្ឋាភិបាល ឬក្រសួងការបរទេស។
លោក កុយ គួង ក៏បានគូសបញ្ជាក់ថា "ការផ្លាស់ប្តូរឯកអគ្គរាជទូតកម្ពុជា ប្រចាំប្រទេសហ្វីលីពីន ជារឿងធម្មតាទេ ហើយមិនមានអ្វីប្រែប្រួលទេ ដោយទំនាក់ទំនងរវាងកម្ពុជា និងហ្វីលីពីន ក៏ប្រព្រឹត្តទៅជាធម្មតា"។
ជាការកត់សម្គាល់ លោក ហើស សិរីធន អតីតឯកអគ្គរាជទូតកម្ពុជា ប្រចាំប្រទេសហ្វីលីពីន បានសរសេរលិខិតតបនឹងអត្ថបទកាសែតហ្វីលីពីន The Phillipines Star ដោយប្រតិកម្មទៅលើអត្ថបទចុះផ្សាយ កាលពីថ្ងៃទី១៩ ខែកក្កដា ឆ្នាំ២០១២ សរសេរដោយអនុរដ្ឋមន្ត្រីការបរទេសហ្វីលីពីន ក្រោមចំណងជើងថា "តើមានរឿងរ៉ាវអ្វីកើតឡើងនៅទីក្រុងភ្នំពេញ?"។ អត្ថបទនោះ បានរិះគន់កម្ពុជា លើបរាជ័យ ដែលមិនបានចេញសេចក្តីថ្លែងការណ៍រួម ក្នុងកិច្ចប្រជុំរដ្ឋមន្ត្រីការបរទេសអាស៊ាន លើកទី៤៥ នៅទីក្រុងភ្នំពេញ កាលពីដើមខែកក្កដា។
ឧបស័គ្គ ដែលរដ្ឋមន្ត្រីការបរទេសអាស៊ានទាំង ១០ មិនអាចចេញសេចក្តីថ្លែងការណ៍រួមបាន ដោយសារតែបញ្ហាជម្លោះសមុទ្រចិនខាងត្បូង។ ជម្លោះសមុទ្រចិនខាងត្បូង កើតឡើងរវាងប្រទេសចិន និងសមាជិកអាស៊ានមួយចំនួន រួមមាន៖ ហ្វីលីពីន វៀតណាម ម៉ាឡេស៊ី និងប្រ៊ុយណេ។ ប៉ុន្តែសមាជិកអាស៊ាន ដែលចេញមុខប្រឆាំងចិន ក្នុងជម្លោះដណ្តើមដែនកោះ ខ្លាំងក្លាជាងគេ គឺហ្វីលីពីន និងវៀតណាម។
ក្នុងអត្ថបទរបស់អតីតឯកអគ្គរាជទូតកម្ពុជា ប្រចាំប្រទេសហ្វីលីពីន លោក ហើស សិរីធន កាលណោះ បានចោទប្រកាន់ប្រទេសហ្វីលីពីន ថា មាននយោបាយកខ្វក់ នៅពីក្រោយ នៃជំហរមិនអាចពិភាក្សា និងបត់បែនបាន របស់ទីក្រុងម៉ានីល លើបញ្ហាជម្លោះសមុទ្រចិនខាងត្បូង ដែលបានរារាំងមិនឲ្យរដ្ឋមន្ត្រីការបរទេសអាស៊ាន រកឯកភាពរួម ដើម្បីចេញសេចក្តីថ្លែងការណ៍បានឡើយ។
ថ្មីៗនេះ ក្រសួងការបរទេសកម្ពុជា ក៏បានបង្ហាញកំណត់ទូតតវ៉ាមួយ ទៅស្ថានទូតហ្វីលីពីន ប្រចាំកម្ពុជា ដើម្បីប្រឆាំងនឹងការបិទផ្សាយទំព័រកាសែត ដែលមានចុះផ្សាយកំណត់ទូតរបស់រដ្ឋាភិបាលហ្វីលីពីន និងលិខិតកោះហៅឯកអគ្គរាជទូតកម្ពុជា ប្រចាំប្រទេសហ្វីលីពីន ចូលឆ្លើយបំភ្លឺផងដែរ៕