ប៉ោយប៉ែត ៖ ស្នូរកាំភ្លើងដែលបានផ្ទុះឡើងកក្រើកក្រុងប៉ោយប៉ែតផ្អើលភ្ញៀវទេសចរណ៍រត់ជាន់ជើងគ្នាដួលពេញលើផ្លូវជាតិលេខ៥ ទាំងពលរដ្ឋ ទាំងភ្ញៀវ ដោយសារតែប៉ូលិសទំនើងម្នាក់ចាប់កម្មករកាត់ដេរយកមកបាញ់រះបណ្ដាលឲ្យរបួសធ្ងន់ រួចរត់គេចខ្លួនទៅបាត់ដោយសុវត្ថិភាព។
នៅក្នុងករណីបាញ់បោះបណ្ដាលឲ្យត្រូវកម្មករម្នាក់នោះ គឺបានកើតឡើងនៅវេលាម៉ោង១១ យប់ក្នុងថ្ងៃទី១៦ ខែសីហា ឆ្នាំ២០១២ នេះនៅចំណុចភូមិគីឡូម៉ែត្រលេខ៤ សង្កាត់ផ្សារកណ្ដាល ក្រុងប៉ោយប៉ែត ខេត្តបន្ទាយមានជ័យ។
នៅកន្លែងកើតហេតុត្រូវសាក្សីជាច្រើនអះអាងដូចៗគ្នាថា មុនពេលកើតហេតុ គេឃើញមានការផឹកស៊ីពីរវង់ដាច់ដោយឡែកពីគ្នា។
សាក្សីបានបន្តទៀតថា ឈ្មោះ សួង កុសល ភេទប្រុសអាយុ២៦ឆ្នាំ មុខរបរជាកម្មករកាត់ដេរបានផឹកស៊ីនៅក្នុងផ្ទះរបស់ខ្លួន។ ឯឈ្មោះ កៀង សាវុធ ភេទប្រុស អាយុ២៧ឆ្នាំ មានមុខរបរលក់ហ្គាស៍ ក៏កំពុងផឹកស៊ីនៅក្នុងផ្ទះរបស់ខ្លួនផងដែរ មួយសន្ទុះក្រោយមកគេក៏បានឮសំឡេងឌឺដងសំដីដាក់គ្នាទៅទៅវិញទៅមករហូតក្លាយជាជំលោះកាន់តែធ្ងន់ធ្ងរ ស្រាប់តែឈ្មោះ កៀង សាវុធ បានទូរស័ព្ទហៅឈ្មោះ សៀក សៅឌី ដែលជាអតីតមន្ត្រីប៉ូលិសក្រុងប៉ោយប៉ែត ក៏បានបាញ់ជនរងគ្រោះឲ្យរបួសធ្ងន់ធ្ងរតែម្ដង៕
ពៅរី