នៅក្នុងឱកាសនោះ ប្រតិភូនគរបាលខេត្ដកំពង់ឆ្នាំង បាននាំយកសាច់គោចំនួន ២០ គីឡូក្រាម ទឹកត្រី ១៥ យួរ ទឹកស៊ីអ៊ីវ ៩យួរ ប្រេងឆា ៣ធុង ប្រហុក ៣០គីឡូក្រាម ត្រីងៀត ១០គីឡូក្រាម ស្ករស ៦គីឡូក្រាម ទឹកបរិសុទ្ធចំនួន ១៥កេះ មីចំនួន ១៥កេះ ត្រីខកំប៉ុងចំនួន ៣កេះធំ ប៊ីចេងចំនួន ៦គីឡូក្រាម ខ្ទឹមសចំនួន ៦គីឡូក្រាម ស្ពៃក្ដោប ១០គីឡូក្រាម ផ្លែល្ពៅ ១០គីឡូក្រាម ផ្លែត្រឡាចចំនួន ១០គីឡូក្រាម អង្ករចំនួន ១០០គីឡូក្រាម ប្រេងសាំងចំនួន ១០០លីត្រ កង្ហារ ៣គ្រឿង រ៉ូឡូខ្សែភ្លើងចំនួន ៣ និងថវិកាចំនួន ៣០ម៉ឺនរៀល ដែលសរុបថវិកាទាំងអស់ស្មើនឹង ៤.៤៥៣.០០០ រៀល ទៅប្រគល់ជូនដល់ក្រុមយុវជនស្ម័គ្រចិត្ដ មន្ដ្រីជំនាញសុរិយោដី និងកម្លាំងការពារ ដែលកំពុងបំពេញការងារវាស់វែងដីធ្លីជូនដល់ប្រជាពលរដ្ឋនៅទីនោះផងដែរ។
មានប្រសាន៍នៅក្នុងឱកាសនោះ លោកឧត្ដមសេនីយ៍ត្រី អាត់ ខែម ស្នងការនគរបាលខេត្ដកំពង់ឆ្នាំង បានសំដែងនូវការកោតសរសើរ ចំពោះទឹកចិត្ដដ៏មោះមុត នៃក្រុមយុវជនស្ម័គ្រចិត្ដទាំងអស់ ក្នុងការចូលរួមបំពេញបេសកម្មដ៏ធំធេង ជាមួយរាជរដ្ឋាភិបាល ក្នុងការអនុវត្ដន៍នយោបាយចាស់សកម្មភាពថ្មី លើវិស័យដីធ្លីនាពេលនេះ។
លោកស្នងការបានមានប្រសាសន៍ផ្ដាំផ្ញើដល់ក្រុមយុវជនទាំងអស់ អោយយកចិត្ដទុកដាក់ក្នុងការថែទាំសុខភាពអោយបានល្អ ហើយបើមានបញ្ហាអ្វី ត្រូវរាយការណ៍មកអាជ្ញាធរមូលដ្ឋានជាបន្ទាន់ ដើម្បីជួយអន្ដរាគមន៍ អោយបានទាន់ពេលវេលា៕