ភ្នំពេញ: រដ្ឋមន្ត្រីក្រសួងមហាផ្ទៃ បានសម្រេចបណ្ដេញជនជាតិចិន ១៥ នាក់ ដែលត្រូវបានចាប់ខ្លួន កាលពីសប្តាហ៍មុន ពាក់ព័ន្ធនឹងបទឧក្រិដ្ឋឆ្លងដែន ជំរិតទារប្រាក់តាមប្រព័ន្ធអ៊ិនថឺណេត ចេញពីកម្ពុជា ទៅកាន់ប្រទេសចិនវិញហើយ។ ការសម្រេចនោះ បានធ្វើឡើង តាមរយៈលិខិតមួយច្បាប់ ដែលលោកឧបនាយករដ្ឋមន្ត្រី ស ខេង រដ្ឋមន្ត្រីក្រសួងមហាផ្ទៃ បានចុះហត្ថលេខា នៅថ្ងៃទី១៧ ខែសីហា ឆ្នាំ២០១២។
លោកឧត្តមសេនីយ៍ឯក ខៀវ សុភ័គ អ្នកនាំពាក្យក្រសួងមហាផ្ទៃ បានមានប្រសាសន៍ នៅរសៀលថ្ងៃទី១៧សីហា ឆ្នាំ២០១២ ថា "ឯកឧត្តមឧបនាយករដ្ឋមន្ត្រី ( ឯកឧត្តម ស ខេង ) បានចុះហត្ថលេខា លើករណីជនជាតិចាប់ជំរិតនោះ រួចហើយ កាលពីថ្ងៃមិញ។ ដូច្នេះ ក្រោយការចុះហត្ថលេខា មួយសប្តាហ៍យ៉ាងយូរ គឺជនជាតិចិនទាំងនោះ ត្រូវបណ្ដេញចេញពីព្រះរាជាណាចក្រកម្ពុជា"។
សូមរម្លឹកថា ជនជាតិចិនចំនួន ១៥នាក់ ត្រូវបានសមត្ថកិច្ចនគរបាលកម្ពុជា ឃាត់ខ្លួន នៅផ្ទះសំណាក់ អប្សរា ក្នុងក្រុងច្បារខេត្តមន ខេត្តកំពង់ស្ពឺ កាលពីថ្ងៃទី៨ ខែសីហា ឆ្នាំ២០១២។ ការចាប់ខ្លួនជនជាតិចិនទាំង ១៥នាក់នោះ គឺជាលើកទី៣ហើយ ដែលសមត្ថកិច្ចកម្ពុជា ចាប់ខ្លួនជនជាតិចិន ពាក់ព័ន្ធនឹងឧក្រិដ្ឋកម្មឆ្លងដែន តាមរយៈការគំរាមទារប្រាប់តាមប្រព័ន្ធអ៊ីនធឺណិត។ គិតមកដល់ពេលនេះ មានចំនួនសរុប ២៣១ នាក់។
ករណីទី១ សមត្ថកិច្ចរបស់នគរបាលជាតិកម្ពុជា ចាប់បាន ១៦៧ នាក់ (ស្រី ៤៩ នាក់) កាលពីថ្ងៃ៩ ខែមិថុនា ឆ្នាំ២០១១ នៅខេត្តព្រះសីហនុ ខេត្តស្វាយរៀង និងនៅរាជធានីភ្នំពេញ។
រីឯលើកទី២ សមត្ថកិច្ច ចាប់បានជនជាតិចិន ៤៩ នាក់ កាលពីថ្ងៃទី១៨ ខែឧសភា ឆ្នាំ២០១២ និងបានបញ្ជូនក្រុមឧក្រិដ្ឋជនឆ្លងដែនទាំងនោះ ទៅកាន់ប្រទេសចិនវិញ។
ចំណែកករណីទី៣ នៅថ្ងៃ៨ ខែសីហា ឆ្នាំ២០១២ សមត្ថកិច្ចចាប់បាន ១៥ នាក់ នៅក្រុងច្បារមន ខេត្តកំពង់ស្ពឺ៕
