កំពង់ចាម ៖ នៅព្រឹកថ្ងៃទី១៦ខែសីហាឆ្នាំ២០១២ កន្លងមកនេះ នៅអធិការដ្ឋាននគរបាលស្រុកមេមត់ខេត្តកំពង់ចាម បានធ្វើពិធីប្រជុំរវាងនគរបាលស្រុកមេមត់ និងនគរបាលស្រុកឡុកនិញ ខេត្តប៊ិញភឿក និងស្រុកតិងចូវ ខេត្តតៃនិញ ប្រទេសវៀតណាម បានធ្វើពិធីប្រជុំរួមគ្នា ដើម្បីពង្រឹងកិច្ចសហប្រតិបត្តិការបន្ថែមទៀត លើការរក្សារសុវត្ថិភាព និងទប់ស្កាត់បទល្មើសឆ្លងដែន។
ពិធីនេះបានធ្វើឡើងដោយមានការអញ្ជើញចូលរួមជាគណៈអធិបតី ពីលោកឧត្ដមសេនីយ៍ ឆាយ គឹមសុន ស្នងការនគរបាលខេត្តកំពង់ចាម ព្រមទាំងលោកវរសេនីយ៍ឯក ប៊ុម ប៊ន ស្នងការរង លោកវរសេនីយ៍ទោ ឆាយ សុខា ប្រធានការិយាល័យនគរបាលសេដ្ឋកិច្ច នាយការិយាល័យជំនាញជាច្រើនរូប និងលោកអភិបាលរងស្រុកមេមត់។ចំណែកខាងភាគីវៀតណាមរួមមាន ប្រធានអនុប្រធាននគរបាលស្រុកចំនួន២រូប ព្រមទាំងផ្នែកជំនាញ និងនគរបាលឃុំមួយចំនួន។
នៅក្នុងឱកាសនោះលោក ឯម កុសល អធិការនគរបាលស្រុកមេមត់ បានមានមតិស្វាគមន៍ សំណែងអំណរគុណយ៉ាងជ្រាលជ្រៅចំពោះលោកឧត្ដមសេនីយ៍ ឆាយ គឹមសុន ស្នងការខេត្តកំពង់ចាម និងលោកប្រធាន អនុប្រធាននគរបាលស្រុក ឡុកនិញ និងស្រុកតឹងចូវ ប្រទេសវៀតណាម ដែលបានអញ្ជើញមកចូលរួមប្រជុំប្រកបដោយភាពស្និតស្នាលអស់ពីចិត្តពីថ្លើម ក្នុងស្មារតីសាមគ្គីភាព មិត្តភាពយ៉ាងកក់ក្ដៅជាទីបំផុត។សកម្ម ភាពទាំងអស់នេះពិតជាបានបញ្ជាក់យ៉ាងច្បាស់ ពីការខិតខំធ្វើកិច្ចសហប្រតិបត្តិការរវាងភាគីទាំងបី (នគរបាលស្រុកមេមត់ ឡុងនិញ និងតឹងចូវ)ដើម្បីពង្រឹងបន្ថែមទៀតលើការទប់ស្កាត់បទល្មើសសព្វ បែបយ៉ាងដែលកើតមានឆ្លងដែនរវាងស្រុកទាំងបី៕
ដានីន