ភ្នំពេញ ៖ ដើម្បីថែរក្សាសោភ័ណភាពក្នុងមូលដ្ឋានឲ្យមានបរិស្ថានល្អទាក់ទាញដល់ភ្ញៀវទេសចរណ៍ជាតិនិងអន្តរជាត់មកទស្សនាអង្គុយកំសាន្តលេងនៅតាមមាត់ច្រាំងទន្លេឲ្យបានច្រើនកុះករនោះ នៅព្រឹកថ្ងៃទី១៦ខែសីហាឆ្នាំ២០១២នេះ ដែរលោកសុខ សម្បត្តិ អភិបាលខណ្ឌដូនពេញបានដឹកនាំកំលាំងសាលាខណ្ឌនិងកំលាំងសង្កាត់ទាំង១១សង្កាត់សរុបជាង១០០នាក់ចុះបោសសំអាតបាញ់ទឹកលាងតាមមាត់ច្រាំងទន្លេពីចំណុចខាងមុខព្រះបរមរាជវាំងរហូតដល់ខាងមុខផ្សាររាត្រីឲ្យមានបរិស្ថានល្អ។
ក្នុងសកម្មភាពនាព្រឹកនោះដែរលោកសុខ សម្បត្តិអភិបាលខណ្ឌដូនពេញបានមានប្រសាសន៍ថាការចុះមកសំអាតអនាម័យនៅតាមដងមាត់ច្រាំងទន្លេនេះក្នុងគោលបំណងឲ្យយើងទាំងអស់គ្នាចូលរួមថែរក្សាអនាម័យដើម្បីឲ្យទីក្រុងរបស់យើងមានសោភ័ណ្ឌភាពអនាម័យល្អទាក់ទាញដល់ភ្ញៀវជាតិនិងអន្តរជាតិមកទស្សនានិងនាំគ្នាអង្គុយគយគន់លេងតាមមាត់ទន្លេព្រោះកន្លងមកមាត់ច្រាំងទន្លេនេះតែងតែមានជនអនាថាមកបន្ទោបង់បោះចោលសំរាមធ្វើឲ្យមានក្លិនស្អុយឆ្អេះឆ្អាបដូច្នេះទើបនៅព្រឹកនេះលោកដឹកនាំកំលាំងសាលាខណ្ឌនិងកំលាំងសង្កាត់ទាំង១១ជាង១០០នាក់នាំគ្នាចូលរួមសំអាតអនាម័យនៅតាមមាត់ច្រាំងទន្លេចាប់ពីខាងមុខព្រះបរមរាជវាំងរហូតដល់ខាងមុខផ្សាររាត្រីហើយសកម្មភាពបែបនេះលោកបានចាត់កំលាំងសាលាខណ្ឌបន្តចុះសំអាតក្នុងមួយសប្ដាហ៍ម្តងដើម្បីអោយមាត់ច្រាំងទន្លេមានសោភ័ណភាពនិងអនាម័យល្អឡើងវិញ៕