ការជម្រុញឲ្យជួយសង្គ្រោះសំណាប
សន្ទូងនៅតំបន់គ្រោះរាំងស្ងួត និងអំពាវនាវឲ្យយុវជន ប្រជាពលរដ្ឋគ្រប់អាយុទៅចុះឈ្មោះបោះឆ្នោត ជាការណែនាំសំខាន់ពីរ ដែលត្រូវបានសម្តេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជា លើកឡើងក្នុងពិធីប្រគល់សញ្ញាបត្រដល់និស្សិតសកលវិទ្យាល័យប៊ៀលប្រាយចំនួន
៥,៥៥៩នាក់ នៅមជ្ឈ មណ្ឌលកោះពេជ្រនាព្រឹកថ្ងៃទី១៥ ខែសីហា ឆ្នាំ២០១២។
សម្តេចតេជោនាយករដ្ឋមន្រ្តីមានប្រសាសន៍ថា
ដើម្បីជួយគាំទ្រដល់គណៈកម្មាធិការជាតិរៀបចំការបោះឆ្នោត(គជប)
ខ្ញុំសូមអំពាវនាវដល់និស្សិតនៅទីនេះក្តី ព្រះសង្ឃ និងប្រជាពលរដ្ឋនៅទូទាំងប្រទេសក្តី សូមទៅចុះឈ្មោះបោះឆ្នោតតាមកាលបរិច្ឆេទកំណត់។
ខ្ញុំសូមអំពាវនាវទាំងយុវជន ដែលទើបគ្រប់អាយុបោះឆ្នោត
និងអ្នកដែលមិនទាន់មានឈ្មោះបោះឆ្នោត
សូមអញ្ជើញទៅចូលរួមចុះឈ្មោះបោះឆ្នោត ហើយសូមមេត្តាចុះឈ្មោះតែមួយបានហើយ កុំចុះឈ្មោះច្រើនកន្លែងស្ទួនគ្នាដែលធ្វើឲ្យបញ្ជីបោះឆ្នោតមានការប៉ោងឡើង។
សម្តេចតេជោក៏បានណែនាំថា
បើយើងទៅកាន់កន្លែងថ្មី
ចុះឈ្មោះនៅកន្លែងថ្មី សូមលុបឈ្មោះនៅកន្លែងចាស់ចេញ
ហើយសូមទៅផ្ទៀងផ្ទាត់ឈ្មោះឲ្យបានច្បាស់។ បើទោះបីជាអ្នកដែលបានចុះឈ្មោះរួចហើយក៏សូមអញ្ជើញទៅផ្ទៀងផ្ទាត់ឈ្មោះ
និងស្វែងរកឈ្មោះខ្លួនផងដែរ
ដើម្បីជាការសម្អាត
និងជួយសម្រួលដល់ការបោះឆ្នោត
ហើយក៏សូមកុំបន្ទោសគជបដែលត្រូវគ្រប់គ្រងមនុស្សរាប់លាននាក់។
សម្តេចតេជោបញ្ជាក់ថា វាអយុត្តិធម៌ណាស់សម្រាប់គជប
ប្រសិនបើយើងតែម្នាក់មិនព្រមទៅផ្ទៀងឈ្មោះ
ហើយនៅថ្ងៃបោះឆ្នោតបែរជាមានឈ្មោះខុស ហើយបន្ទោសគជប។
សម្តេចតេជោនាយករដ្ឋមន្ត្រីមានប្រសាសន៍ថា បើទោះបីជាមានឈ្មោះក្នុងបញ្ជីឈ្មោះបោះឆ្នោតរួចហើយក៏ដោយ ក៏សូមទៅផ្ទៀងរវាងអត្តសញ្ញាណប័ណ្ណរបស់យើងជាមួយនឹងឈ្មោះនៅក្នុងបញ្ជីបោះឆ្នោត ព្រោះទង្វើបែបនេះ
គឺជាការចូលរួមនៃដំណើរការប្រជាធិបតេយ្យនៅកម្ពុជាតាមរយៈការចុះឈ្មោះបោះឆ្នោត ដែលមានឈ្មោះត្រឹមត្រូវរវាងអត្តសញ្ញាណប័ណ្ណជាមួយនឹងឈ្មោះនៅក្នុងបញ្ជីបោះឆ្នោត និងឈ្មោះមានតែមួយកន្លែងប៉ុណ្ណោះ ដើម្បីចៀសវាងការដែលមនុស្សម្នាក់អាចមានឈ្មោះ ២ ឬ ៣ កន្លែងជាការធ្វើឲ្យបញ្ជីបោះឆ្នោតប៉ោងឡើង នោះ។
ចំពោះបញ្ហាចុះឈ្មោះបោះឆ្នោតនេះដែរ ពាក់ព័ន្ធជាមួយនឹងយុវជនស្ម័គ្រចិត្តដែលកំពុងចុះវាស់វែងដីធ្លី ដើម្បីផ្តល់កម្មសិទ្ធិជូនប្រជាពលរដ្ឋវិញ សម្តេចតេជោនាយករដ្ឋមន្រ្តីបានស្នើឲ្យមានការពន្យាពេលមួយថ្ងៃសម្រាប់ពួកគេមានឱកាស ក្នុងការចុះឈ្មោះ និងឱកាសដើម្បីផ្ទៀងផ្ទាត់ឈ្មោះរបស់ពួកគេ
ហើយយកល្អនិស្សិត
ដែលមានឈ្មោះនៅតាមបណ្តាខេត្តនានាគួរតែត្រូវបានផ្ទេរឈ្មោះមកកាន់រាជធានីភ្នំពេញតែម្តងទៅ ដើម្បីចៀសវាងនូវការលំបាកក្នុងថ្ងៃបោះឆ្នោតធ្វើដំណើរទៅបោះឆ្នោតមួយសន្លឹកនោះ។
សម្តេចតេជោមានប្រសាសន៍ថា
និស្សិត និងកម្មករ កម្មការិនី ដែលធ្វើដំណើរទៅបោះឆ្នោត នៅតាមបណ្តាខេត្តអាចផ្ទេរឈ្មោះមកកាន់រាជធានីភ្នំពេញ ប៉ុន្តែជាការចាំបាច់ពួកគេត្រូវតែលុបឈ្មោះចេញពីបញ្ជីបោះឆ្នោតនៅតាមខេត្តចេញ ដើម្បីចៀសវាងនូវការប៉ោងបញ្ជីឈ្មោះបោះឆ្នោតនោះ។
សូមបញ្ជាក់ថា កាលបរិច្ឆេទរបស់គណៈកម្មាធិការជាតិរៀបចំការបោះឆ្នោត(គ.ជ.ប) ស្តីពីការចុះឈ្មោះបោះឆ្នោត និងត្រួតពិនិត្យបញ្ជីឈ្មោះបោះឆ្នោតនឹងប្រព្រឹត្តទៅចាប់ពីថ្ងៃទី១
ខែកញ្ញាដល់ថ្ងៃទី១០ ខែតុលាឆ្នាំ២០១២ ខាងមុខនេះ
ដើម្បីបម្រើឲ្យការបោះឆ្នោតសកលជ្រើសរើសសមាជិករដ្ឋសភាអាណត្តិទី៥ ដែលនឹងប្រព្រឹត្តទៅនៅថ្ងៃទី២៨ ខែកក្កដា ឆ្នាំ២០១៣ ខាងមុខនេះ។
ដោយឡែកទាក់ទងនឹងបញ្ហាតំបន់ខ្លះ
ក្នុងព្រះរាជាណាចក្រកម្ពុជាជួបប្រទះគ្រោះរាំងស្ងួតក្នុងរដូវវស្សានេះ
សម្តេចតេជោនាយករដ្ឋមន្ត្រី បានស្នើឲ្យក្រសួងធនធានទឹក និងឧតុនិយម
មន្ទីរធនធានទឹក និងអាជ្ញាធរដែនដី រួសរាន់ក្នុងការជួយសង្រ្គោះស្រែស្រូវនៅតំបន់ដែលមានភាពរាំងស្ងួត។
សម្តេចអគ្គមហាសេនាបតីតេជោ ហ៊ុន សែន មានប្រសាសន៍ថា ខ្ញុំអំពាវនាវដល់អាជ្ញាធរគ្រប់លំដាប់ថ្នាក់
សូមចូលរួមក្នុងសកម្មភាពបូមបាចទឹកនៅតំបន់ដែលមានប្រភពទឹក
ដោយត្រូវបញ្ចុះម៉ាស៊ីនបូមទឹកធ្វើអន្តរាគមន៍
មិនត្រូវឲ្យស្រូវ ឬសំណាបងាប់ ដោយទីកន្លែងដែលមានប្រភពទឹក
ហើយយើងមិនបានបូមបាចដើម្បីសង្រ្គោះនោះទេ។
សម្តេចតេជោនាយករដ្ឋមន្រ្តីបានបញ្ជាក់ថា ប្រជាប្រជាកសិករកម្ពុជា
សូមកុំមានការបារម្ភរដូវវស្សាឆ្នាំនេះអាចអូសបន្លាយរហូតដល់ដើមខែធ្នូ
ហើយយើងនឹងរៀបចំព្រះរាជពិធីបុណ្យអុំទូក
អកអំបុក និងសំពះព្រះខែ
ក្នុងពេលដែលមានភ្លៀងទៀតហើយ។
សម្តេចតេជោបានមានប្រសាសន៍ឲ្យដឹងថា
ឆ្នាំនេះបាតុភូតធម្មជាតិចម្លែកណាស់មិនថាតែនៅកម្ពុជាទេ ប៉ុន្តែសូម្បីតែនៅប្រទេសហ្វីលីពីន
ប្រទេសចិន សហរដ្ឋអាមេរិក ក៏កើតមានគ្រោះធម្មជាតិដោយខ្យល់ព្យុះ និងទឹកជំនន់ដែរ។ ថ្វីត្បិតតែកម្ពុជា បានរួចផុតពីឥទ្ធិពលនៃខ្យល់ព្យុះមួយចំនួនក្តី ក៏សម្តេចនាយករដ្ឋមន្រ្តីបានថ្លែងឲ្យដឹងថា យើងនៅសល់ព្យុះប្រមាណជាង២០
ព្យុះទៀត ដែលព្យុះទាំងនោះ
នឹងមានឥទ្ទិពលចូលមកដល់កម្ពុជា ហើយពេលនោះទឹកទន្លេនឹងចាប់ហក់ឡើងជាមិនខាន។
សម្តេចតេជោមានប្រសាសន៍ថា ដោយផ្អែកលើឥទ្ធិពលនៃខ្យល់ព្យុះនេះ ឱកាសនៃការធ្វើស្រែ
នៅមានវែងឆ្ងាយ បើទោះបីជាសំណាបរបស់យើងចាស់ ក៏ប៉ុន្តែយើងអាចបង្កើតនូវស្ថានភាព នៃការរៀបចំសំណាបថ្មីបានដែរ។
សម្តេចនាយករដ្ឋមន្រ្តីមានប្រសាសន៍ថា ខ្ញុំសូមរំឭកថា មិនត្រូវឲ្យសំណាប ឬសន្ទូងងាប់នៅចំចំណុចដែលមានប្រភពទឹកទេ ដែលនេះជាវិធានការត្រូវប្រកាន់យក ហើយក្រសួងធនធានទឹក និងឧតុនិយម និងមន្ទីរធនធានទឹក និងកសិកម្ម និងអាជ្ញាធរដែនដីត្រូវតែ
ធ្វើកិច្ចការងារនេះ ដោយជួយអន្តរាគមន៍ក្នុង
ការបូមបាចនៅតំបន់ដែលមានប្រភពទឹក ចំណែកតំបន់ដែលគ្មានប្រភពទឹកត្រូវតែរង់ចាំទឹកភ្លៀង
ហើយដែលចំណុចនេះ ហើយដែលយើងត្រូវធ្វើការកំណត់តំបន់ដាំដុះឡើងវិញនោះ៕