លោក ស សុខា មានវ័យ៣៣ឆ្នាំ ជាកូនប្រុសរបស់ឯកឧត្តម ស ខេង ឧបនាយករដ្ឋមន្ត្រី រដ្ឋមន្ត្រីក្រសួងមហាផ្ទៃ ត្រូវបានសម្ដេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជា ប្រកាសជាថ្មីម្តងទៀតនាព្រឹកថ្ងៃទី២៩ ខែមេសា ឆ្នាំ២០១៣ ក្នុងពិធីបញ្ចុះខណ្ឌសីមាព្រះវិហារវត្តពោធិ៍ មង្គលស្ថិតក្នុងឃុំជីផុច ស្រុកមេសាង ខេត្តព្រៃវែងថា ជាបេក្ខជនតំណាងរាស្ត្ររបស់គណបក្សប្រជាជនកម្ពុជា សម្រាប់ការបោះឆ្នោតនាថ្ងៃទី២៨ ខែកក្កដា ឆ្នាំ២០១៣ ខាងមុខនេះ។
សម្តេចតេជោបានមានប្រសាសន៍ថា ខ្ញុំសូមផ្ញើក្មួយរបស់ខ្ញុំជាមួយអ្នកព្រៃវែងផង ដើម្បីថែរក្សាសមិទ្ធផលទាំងឡាយដែលលោកឪពុក ឪពុកធំ ជាពិសេសសមិទ្ធផលរបស់គណបក្សប្រជាជនបានកសាងឡើង ហើយនេះមិនមែនជាបញ្ហាគ្រួសារនិយម បក្សពួកនិយមទេ ប៉ុន្តែជាការបន្ត វេនព្រោះថា ពួកយើងខ្ញុំចាស់ៗអស់ហើយ អ្វីក៏បានចាប់ផ្តើមពីគ្រូបឋមសិក្សាដែរ ហើយអ្វីក៏ចាប់ផ្តើមពីយុវជនដែរ។ សម្តេចតេជោនាយករដ្ឋមន្ត្រីថ្លែងថា គណបក្សប្រជាជនមានត្រឹមតែ ១២០ អាសនៈទេ បូកនឹងអ្នកត្រៀមបម្រុងជាង ២០០នាក់ ហើយយុវជនយើងមានរាប់លាននាក់ ដូច្នេះយើងត្រូវមានការជ្រើសរើសយុវជន ដែលក្នុងនោះកូនប្រុសឯកឧត្តម ជាម យៀប ក៏ឈរជាតំណាងរាស្ត្រ នៅបាត់ដំបងដែរ។
រំលឹកទៅដល់ការវាយតម្លៃណាមួយចំពោះយុវជនជា បេក្ខភាពតំណាងរាស្ត្រគណបក្សប្រជាជនកម្ពុជា ដោយមានដាក់រូបយុវជនទាំងនោះដូចជាតុក្កតានៅក្នុង Facebook ជាដើម សម្ដេចតេជោបានមានប្រសាសន៍ថា «បើសិនគេហ៊ានមើលងាយយុវជនបានសេចក្ដីថានយោបាយរបស់គេចប់, ដូច្នេះទុកឱ្យគេមើលងាយយុវជនចុះ»។ សម្ដេចតេជោនាយករដ្ឋមន្ត្រីបានលើកឡើងថា អ្វីក៏បានចាប់ផ្ដើមពីគ្រូបឋមដែរ ហើយអ្វីក៏ចាប់ផ្ដើមពីយុវជនដែរ។ «គ្មានអ្វីខ្លាំងជាងកម្លាំងយុវជនទេ»។
សម្ដេចតេជោនាយករដ្ឋមន្ត្រីក៏រំលឹកឱ្យឃើញផងដែរ អំពីការចាប់ផ្ដើមធ្វើការងារដំបូងរបស់សម្ដេច និងថ្នាក់ដឹកនាំដទៃទៀតរបស់គណបក្សប្រជាជនដែលមានអាយុជាង៣០ឆ្នាំ ដូចយុវជនបន្តវេនដែលឈរឈ្មោះនេះដែរ តែម្យ៉ាងទៀតពួកយុវជនបន្តវេនក្រោយនេះ ម្នាក់ៗសុទ្ធតែបានមានចំណេះដឹងខ្ពស់បានឆ្លងកាត់ការរៀនសូត្រពីរបីប្រទេស។ សម្ដេចតេជោបានអរគុណ និងកោតសរសើរ ចំពោះសហភាពសហព័ន្ធយុវជនកម្ពុជា ក៏ដូចជាយុវជនកាកបាទក្រហមកម្ពុជាដែលបានធ្វើសកម្មភាពជាច្រើនក្នុងរយៈពេលកន្លងមកនេះ។
ដោយបានរំលឹកឡើងវិញនូវសម្តីរបស់គណបក្សប្រឆាំងដែលលើកឡើងថា គណបក្សប្រជាជនខ្វះធនធានមនុស្សព្រោះដាក់តែ «ហ៊ុន សែន» ហ្នឹង មិនដាក់អ្នកផ្សេងនោះ។ សម្តេចតេជោបានមានប្រសាសន៍បញ្ជាក់ថា «ធនធានមនុស្សសម្រាប់ធ្វើជានាយករដ្ឋមន្ត្រីឧទាហរណ៍ ឬរដ្ឋមន្ត្រីឧទាហរណ៍មិនលំបាកទេ រើសប៉ុន្មានក៏បានដែរ ប៉ុន្តែធ្វើនាយករដ្ឋមន្ត្រីពិតប្រាកដទើបជាការលំបាក។
សម្តេចតេជោមានប្រសាសន៍ពន្យល់ថា ការចាំបាច់របស់យើងនៅទីនេះ គឺត្រូវពិនិត្យឲ្យច្បាស់នូវអ្នក ដឹកនាំផ្នែកអាណាចក្រថា តើគេអាចដឹកនាំប្រទេសត្រឹមត្រូវទេ ជាពិសេសគណបក្សកាន់អំណាច គណបក្សដែលខ្លួនត្រូវការជ្រើសរើស។ តើបោះដើម្បីផ្ទេរពីសន្តិភាពទៅកាន់សង្គ្រាម ផ្ទេរពីសន្តិភាពទៅកាន់អស្ថិរភាព? ឬបោះដើម្បីរក្សាសន្តិភាព រក្សានូវការអភិវឌ្ឍ រក្សានូវអ្វីៗដែលមានក្នុងដៃរួចមកហើយ? ឬក៏បោះទៅតាមការសន្យាខ្យល់? ហើយ និងកំពុងតែគម្រាមកំហែងមកកាន់អស្ថិរភាពសម្រាប់ប្រទេសកម្ពុជា ដោយសារអាចនឹងមានជម្លោះផ្ទៃក្នុងកើតឡើងបន្ថែមទៅដោយជម្លោះជាមួយ ប្រទេសជិតខាង។
ឯកឧត្តម ហាស់ សារ៉េត អភិបាលខេត្តព្រៃវែងបានឱ្យដឹងថា វត្តពោធិ៍មង្គល ដើមឡើយមានឈ្មោះថា វត្តចំបក់ដែលបានកសាងឡើងតាំងពីឆ្នាំ១៧៤៣។ នៅក្នុងរបប ប៉ុល ពត វត្តនេះត្រូវបានបំផ្លិចបំផ្លាញអស់គ្មានសល់ លុះក្រោយថ្ងៃរំដោះ៧មករា ១៩៧៩ ជីវិតព្រះពុទ្ធសាសនាបានរស់ឡើងវិញ វត្តពោធិ៍មង្គល ក៏ត្រូវបានចាប់ផ្តើមកសាងឡើងវិញផងដែរ។
រហូតមកដល់បច្ចុប្បន្នវត្តនេះបានទទួលសមិទ្ធផលជាច្រើនដូចជា ព្រះវិហារដែលត្រូវបញ្ចុះខណ្ឌសីមានៅថ្ងៃនេះរួមទាំងកុដិឧបដ្ឋានសាលា សាលពុទ្ធិកសិក្សា ខ្លោងទ្វារ របងវត្ត អណ្តូងទឹក។ល។
ចំពោះព្រះវិហារដែលបានធ្វើពិធីបុណ្យបញ្ចុះខណ្ឌសីមាត្រូវបាន ចាប់ផ្ដើមកសាងជាបណ្ដើរៗតាំងពីឆ្នាំ២០០៧មកដោយមានការរួមចំណែក ថវិកាពីសម្ដេចតេជោនាយករដ្ឋមន្ត្រី និងមន្ត្រីនានារបស់គណបក្សប្រជាជន និងពុទ្ធបរិស័ទជិតឆ្ងាយដោយចំណាយលើការសាងសង់ ១២៥.៤០៨ដុល្លារប៉ុន្តែដោយការសាងសង់នៅខ្វះថ្លៃជាងចំនួន១១.១៩៧ ដុល្លារនោះសម្ដេចតេជោបានប្រគេនបច្ច័យ ១១.២០០ដុល្លារដើម្បីទូទាត់ថ្លៃសាងសង់ឱ្យដាច់ស្រេច។
សម្តេចតេជោនាយករដ្ឋមន្ត្រីបានកោតសរសើរចំពោះការខិតខំ និងការចូលរួមទាំងឡាយជាពិសេស ការចូលរួមនៃថ្នាក់ដឹកនាំ និងមន្ត្រីរបស់គណបក្សប្រជាជនដែលធ្វើឱ្យសម្រេចបានសមិទ្ធផលនានា នៅក្នុងស្រុកមេសាងក៏ដូចជានៅទូទាំងខេត្តព្រៃវែងក្នុងនោះ រួមទាំងសមិទ្ធផលនៅវត្តសិរីមង្គលនេះផង។ បន្ថែមលើនេះសម្ដេចតេជោបានរម្លឹកអំពីទំនាក់ទំនងដែលមិនអាចផ្ដាច់ ពីគ្នាបានរវាងវិស័យពុទ្ធចក្រ និងអាណាចក្រនៅក្នុងសង្គមកម្ពុជា ហើយសម្ដេចបង្ហាញនូវមោទនភាពជាថ្មីម្ដងទៀតថានយោបាយនៃការធ្វើឱ្យ មានការរីកចម្រើន ក្នុងវិស័យព្រះពុទ្ធសាសនាក្នុងការកសាងវត្តអារាមនេះគឺជាផ្នែកមួយ នៃគោលនយោបាយសម្រាប់មនុស្សចាស់ និងសម្រាប់យុវជននិងកុមារ។
សម្តេចតេជោសែនក៏បានមានប្រសាសន៍ឲ្យដឹងដែរថា សម័យក្រោមការដឹកនាំរបស់សម្តេច ជា ស៊ីម សម្តេច ហេង សំរិន ក្រោមការដឹកនាំរបស់ខ្ញុំដែលរួមជាមួយគ្នា គឺបានផ្តល់ឱកាសសម្រាប់ការជឿរបស់ប្រជាជន មិនថា ព្រះពុទ្ធសាសនា ឬសាសនាដទៃទៀត ដែលមានទាំងឥស្លាមសាសនា គ្រឹះសាសនា…បានរស់នៅជាមួយគ្នាដោយគ្មានជម្លោះសាសនានោះទេ។
សម្តេចអគ្គមហាសេនាបតីតេជោ ហ៊ុន សែន ដែលជាបេក្ខភាពនាយករដ្ឋមន្ត្រីរបស់គណបក្សប្រជាជនកម្ពុជា បានប្រកាសឲ្យដឹងផងដែរថា សម្ដេចនឹងនៅតែផ្ទះនៅក្នុងរយៈពេលមួយខែ នៃយុទ្ធនាការឃោសនាបោះឆ្នោត និងនៅថ្ងៃបោះឆ្នោតនៅពេលខាងមុខនេះ វាដូចជាអ្វីដែលធ្លាប់បានធ្វើរួចមកហើយចាប់តាំងពីឆ្នាំ១៩៩៨ មកនោះ។
សម្តេចតេជោនាយករដ្ឋមន្ត្រីមានប្រសាសន៍ថា នៅពេលយុទ្ធនាការឃោសនាបោះឆ្នោតមកដល់ក្នុងរយៈពេលមួយខែ គឺខ្ញុំត្រូវសម្រាកនៅផ្ទះ ដែលជាទម្លាប់ខ្ញុំមិនចេញធ្វើយុទ្ធនាការឃោសនាបោះឆ្នោតខ្លួនឯងទេ ដោយទុកឲ្យសមាជិក សមាជិកាគណបក្សប្រជាជនកម្ពុជា ធ្វើយុទ្ធនាការបោះឆ្នោត។ សម្តេចតេជោថ្លែងថា ចាប់ពីថ្ងៃទី២៧ ខែមិថុនា ដល់ថ្ងៃទី២៨ ខែកក្កដា ដែលជាថ្ងៃបោះឆ្នោត ខ្ញុំអត់មាននិយាយអ្វីទេ បានសេចក្តីថា កម្មវិធីទាំងឡាយត្រូវធ្វើឲ្យរួចរាល់មុនថ្ងៃឃោសនាបោះឆ្នោតមកដល់ ដែលនេះជាទម្លាប់របស់ខ្ញុំ ចាប់តាំងពីឆ្នាំ១៩៩៨ មកម្ល៉េះ។
សម្តេចតេជោនាយករដ្ឋមន្ត្រីមានប្រសាសន៍ឲ្យដឹងផងដែរថា ប៉ុន្មានខែចុងក្រោយនេះ សម្តេចមានភាពមមាញឹកក្នុងកម្មវិធីសម្ពោធសមិទ្ធផលសង្គម ទាំងវិស័យពុទ្ធចក្រ និងអាណាចក្រ បន្ទាប់ពីបានផ្អាកកម្មវិធីទាំងឡាយចាប់ពីចុងឆ្នាំ២០១២ នៅពេលដែលប្រទេសជាតិបានទទួលធ្វើជាម្ចាស់ផ្ទះ ហើយសម្ដេចផ្ទាល់បានធ្វើជាប្រធានកិច្ចប្រជុំកំពូលអាស៊ាន រួមជាមួយព្រះរាជពិធីបុណ្យព្រះបរមសព ព្រះករុណា ព្រះបាទសម្តេចព្រះ នរោត្តម សីហនុ ព្រះមហាវីរក្សត្រ ព្រះវររាជបិតា ឯករាជ្យ បូរណភាពទឹកដី និងឯកភាពជាតិខ្មែរ «ព្រះបរមរតនកោដ្ឋ» រហូតមកដល់ដើមខែកុម្ភៈ ឆ្នាំ២០១៣ ដែលធ្វើឲ្យសម្តេចមិនអាចបើកការសម្ពោធអ្វីៗបានឡើយ៕