ឯកឧត្តម Asaf Hajiyev សមាជិករដ្ឋសភា នៃសាធារណរដ្ឋអាស៊ែបៃសង់ បានជំរាបជូនសម្តេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជាថា លោកបានសង្កេតឃើញថា ព្រះរាជាណាចក្រកម្ពុជា ជាពិសេសរាជធានីភ្នំពេញមានសោភ័ណភាពល្អជាទីបំផុត ជាមួយគ្នានេះលោកបានសិក្សា និងស្វែងយល់ឃើញថា ក្រោមការដឹកនាំរបស់សម្តេចតេជោនាយករដ្ឋមន្រ្តី កម្ពុជាមានការអភិវឌ្ឍ និងកាន់តែល្អប្រសើរឡើងជាលំដាប់ដែលលោកសូមវាយតម្លៃខ្ពស់។ ឯកឧត្តម Asaf Hajiyev បានមានប្រសាសន៍បែបនេះក្នុងជំនួបសម្តែងការគួរសមជាមួយសម្តេចតេជោនាយករដ្ឋមន្ត្រី នាថ្ងៃទី២៧ ខែមេសា ឆ្នាំ២២១៣ នៅវិមានសន្តិភាព។
ឯកឧត្តម អ៊ាង សុផល្លែត ជំនួយការសម្តេចតេជោនាយករដ្ឋមន្រ្តីឲ្យដឹងថា ឯកឧត្តម Asaf Hajiyev បានមានប្រសាសន៍ថា តាមរយៈនៃការចុះអនុស្សរណៈយោគយល់គ្នាកាលពីថ្ងៃទី២២ ខែវិច្ឆិកា ឆ្នាំ២០១២ រវាងគណបក្សប្រជាជនកម្ពុជា និងគណបក្សអាស៊ែបៃសង់ថ្មី ក្នុងអំឡុងពេលកិច្ចប្រជុំគណៈកម្មការ (ICAPP) លើកទី១៨ នោះគឺជាសញ្ញាដ៏វិជ្ជមានមួយសម្រាប់កិច្ចសហប្រតិបត្តិការរវាងកម្ពុជា និងអាស៊ែបៃសង់ ហើយអាស៊ែបៃសង់មានបំណងយ៉ាងខ្លាំងដើម្បីពង្រឹងពង្រីកកិច្ចសហប្រតិបត្តិការរវាងប្រទេសទាំងពីរ។ ជាមួយគ្នានេះ ឯកឧត្តម Asaf Hajiyev ក៏បានគោរពអញ្ជើញសម្តេចតេជោនាយករដ្ឋមន្រ្តី ទៅធ្វើទស្សនកិច្ចនៅអាស៊ែបៃសង់ផងដែរ។
សម្តេចតេជោនាយករដ្ឋមន្រ្តីក៏បានឯកភាពជាមួយឯកឧត្តម Asaf Hajiyev ពាក់ព័ន្ធនឹងកិច្ចសហប្រតិបត្តិការរវាងប្រទេសទាំងពីរ ដោយសម្តេចតេជោមានប្រសាសន៍ថា អាយកាប់ និងអនុស្សរណៈដែលបានចុះហត្ថលេខាជាមួយគ្នារួចមកនោះ គឺជាមូលដ្ឋានសម្រាប់កិច្ចសហប្រតិបត្តិការរវាងគណបក្សប្រជាជនកម្ពុជា និងគណបក្សអាស៊ែបៃសង់ថ្មី ហើយវាជាមូលដ្ឋាននៃកិច្ចសហប្រតិបត្តិការរវាងរដ្ឋាភិបាល និងរដ្ឋាភិបាលផងដែរ។
ពាក់ព័ន្ធទៅនឹងឯកឧត្តម Asaf Hajiyev អញ្ជើញសម្តេចតេជោនាយករដ្ឋមន្ត្រី ទៅធ្វើទស្សនកិច្ចនៅសាធារណរដ្ឋអាស៊ែបៃសង់ សម្តេចតេជោសូមទទួលយកនូវការអញ្ជើញនេះ នៅពេលវេលាដ៏សមស្របណាមួយ៕