ឯកឧត្តមបណ្ឌិតសភាចារ្យ សុខ អាន ឧបនាយករដ្ឋមន្ត្រី រដ្ឋមន្ត្រីទទួលបន្ទុកទីស្តីការគណៈរដ្ឋមន្ត្រី និងជាសមាជិកណៈកម្មាធិការអចិន្ត្រៃយ៍នៃគណៈកម្មាធិការកណ្តាលគណបក្សប្រជាជនកម្ពុជា ត្រូវបានសមាជិកអចិន្ត្រៃយ៍នៃអង្គការសន្និសីទអន្តរជាតិនៃគណបក្សនយោបាយអាស៊ី (ICAPP) តែងតាំងជាតំណាង ក្នុងឱកាសចូលសម្តែងការគួរសមជាមួយ ឯកឧត្តម ន្វៀង ភូចុង (Nguyen Phu Trong) នៅទីក្រុងហាណូយនៃសាធារណរដ្ឋសង្គមនិយមវៀតណាម។
នៅព្រឹកថ្ងៃទី២៧ ខែមេសា ឆ្នាំ២០១៣ ក្នុងឱកាសដឹកនាំគណៈប្រតិភូគណបក្សប្រជាជនកម្ពុជាធ្វើមាតុភូមិនិវត្តន៍ពីការចូលរួមកិច្ចប្រជុំគណៈកម្មាធិការអចិន្ត្រៃយ៍ នៃអង្គការសន្និសីទអន្តរជាតិនៃគណបក្សនយោបាយអាស៊ី ដែលរៀបចំដោយគណបក្សកុម្មុយនីស្តវៀតណាមនៅទីក្រុងហាណូយ ចាប់ពីថ្ងៃទី២៤-២៦ ខែមេសា ឆ្នាំ២០១៣ ឯកឧត្តមបណ្ឌិតសភាចារ្យ សុខ អាន បានមានប្រសាសន៍ឲ្យដឹងថា ឯកឧត្តមត្រូវបានសមាជិកនៃអង្គការសន្និសីទអន្តរជាតិនៃគណបក្សនយោបាយអាស៊ីធ្វើជាតំណាង ដើម្បីសរុបរាយការណ៍អំពីលទ្ធផលនៃកិច្ចប្រជុំក្នុងឱកាសចូលជួបសម្តែងការគួរសមជាមួយឯកឧត្តម ន្វៀង ភូចុង (Nguyen Phu Trong) អគ្គលេខាធិការបក្សកុម្មុយនីស្តវៀតណាមនាថ្ងៃទី២៥ ខែមេសា ឆ្នាំ២០១៣។
ឯកឧត្តមបណ្ឌិតសភាចារ្យ សុខ អាន បានមានប្រសាសន៍ឲ្យដឹងថា កិច្ចប្រជុំលើកទី១៩ នៃអង្គការសន្និសីទអន្តរជាតិនៃគណបក្សនយោបាយអាស៊ី ដែលប្រព្រឹត្តទៅនៅទីក្រុងហាណូយទទួលបានលទ្ធផលល្អ នៅក្នុងការធ្វើឲ្យអាយខាប់ ដែលមានគណបក្សនយោបាយជាង ៣០០ ដែលមានអាសនៈនៅក្នុងសភា មានតួនាទីសំខាន់ និងក្លាយជាស្ថាប័នសម្របសម្រួលមួយនៅក្នុងពិភពលោក។
យោងតាមរបៀបវារៈនៃប្រជុំលើកទី១៩ នៃសមាជិកអចិន្ត្រៃយ៍របស់អង្គការសន្និសីទអន្តរជាតិនៃគណបក្សនយោបាយអាស៊ី (ICAPP) បានសម្រេចបញ្ចូលតំណាងគណបក្សនយោបាយមកពីប្រទេសចំនួន៤ ទៀត ជាសមាជិកអចិន្ត្រៃយ៍ ដែលធ្វើឲ្យសមាជិកអចិន្ត្រៃយ៍ នៃអង្គការសន្និ សីទអន្តរជាតិនៃគណបក្សនយោបាយអាស៊ីកើនដល់ ២២ប្រទេស។ កិច្ចប្រជុំក៏បានពិភាក្សាពីកម្មវិធីនាពេលខាងមុខ គឺការប្រជុំនៅក្នុងប្រទេសតួកគី ដើម្បីពង្រីកកិច្ចសហប្រតិបត្តិការរវាងអាយខាប់ និង អង្គការ COPPAL នៅអាមេរិកឡាទីន។
កិច្ចប្រជុំក៏បានស្តាប់របាយការណ៍ ស្តីពីលទ្ធផលនៃការប្រជុំលើកទី១ នៃចលនាស្ត្រី នៃអង្គការ ICAPP ដែលប្រព្រឹត្តកន្លងទៅនៅទីក្រុង Baku ប្រទេស Azaibaijian ពីថ្ងៃទី ៤ ទៅ ៦ ខែមេសា ឆ្នាំ២០១៣ កន្លងទៅ។ ទាក់ទងនឹងការលើកកម្ពស់ស្ត្រីនៅក្នុងអាយខាប់នេះ ឯកឧត្តមបណ្ឌិតសភាចារ្យ សុខ អាន បានឲ្យដឹងថា អាយខាប់ នឹងអញ្ជើញស្ត្រីជាមេដឹកនាំសំខាន់ៗចំនួន ៣រូប រួមមានៈ លោកជំទាវ ប៉ាក់ ហ្គិនហេ ប្រធានាធិបតីកូរ៉េខាងត្បូង លោកជំទាវយីងឡាក់ នាយករដ្ឋមន្ត្រីថៃ និងលោកស្រី អ៊ួង សានស៊ូជី មេដឹកនាំគណបក្សប្រឆាំងនៅប្រទេសមីយ៉ាន់ម៉ា មកធ្វើជាទីប្រឹក្សាជាន់ខ្ពស់នៃ អាយខាប់។
ដោយឡែកទាក់ទងនឹងចលនាយុវជនរបស់អាយខាប់ ដែលមាន ឯកឧត្តម សុខ សុកាន ជាអនុប្រធាន និងឯកឧត្តម សួស យ៉ារ៉ា ជាអគ្គលេខាធិការ នឹងទៅចូលរួមប្រជុំនៅ ប្រទេស Azaibaijian នាពេលខាងមុខ។
ឯកឧត្តមបណ្ឌិតសភាចារ្យ សុខ អាន បានមានប្រសាសន៍ថា នៅក្នុងកិច្ចប្រជុំនាទីក្រុងហាណូយនេះ ប្រតិភូទាំងអស់បានធ្វើការផ្លាស់ប្តូរបទពិសោធន៍អំពីបញ្ហាភិវឌ្ឍន៍បៃតង ក្នុងនោះគឺស្វែងរកនៅចំណុចឯកភាពមួយ នៅក្នុងការអភិវឌ្ឍន៍ប្រទេសត្រូវធ្វើឲ្យមានតុល្យភាពរវាងការអភិវឌ្ឍន៍សេដ្ឋកិច្ច បញ្ហាជីវភាពសង្គម និងបញ្ហាបរិស្ថានសង្គម និងបេតិកភណ្ឌ។ទាក់ទងនឹងសន្និសីទពិសេស អំពីការអភិវឌ្ឍបៃតងនេះដែរ ប្រទេសចិននឹងទទួលរៀបចំការប្រជុំបន្តទៀត នៅចុងខែឧសភា ឆ្នាំ២០១៣ នាទីក្រុងស៊ីអាន ខេត្តសាន់ស៊ី ខាងមុខ។
ឯកឧត្តមបណ្ឌិតសភាចារ្យ សុខ អាន ក៏បានមានប្រសាសន៍ឲ្យដឹងអំពីគម្រោងនៃកិច្ចប្រជុំមួយនៅទីក្រុងខាទុម នៃប្រទេសស៊ូដង់ នាពេលខាងមុខឆាប់ៗនេះ រវាងអង្គការសន្និសីទអន្តរជាតិនៃគណបក្សនយោបាយអាស៊ី និងអង្គការ COPPAL ដែលជាចលនានយោបាយមួយនៅក្នុងប្រទេសអាមេរិកឡាទីន និងចលនាខាបឌី នៅប្រទេសអាហ្វ្រិក។ គោលបំណង គឺការបង្កើនកិច្ចសហប្រតិបត្តិការជាមួយគណបក្សនយោបាយរវាងទ្វីបទាំងបី គឺអាស៊ី-អាហ្វ្រិក និងអាមេរិកឡាទីន។
សូមបញ្ជាក់ថា អង្គការ ICAPP ត្រូវបានគេបង្កើតឡើងនៅក្នុងឆ្នាំ២០០០។ នៅចុងឆ្នាំ២០១០ គណបក្សប្រជាជនកម្ពុជា បានធ្វើជាម្ចាស់ផ្ទះនៃការរៀបចំសន្និសីទលើកទី៦ នៃអង្គការសន្និសីទអន្តរជាតិនៃគណបក្សនយោបាយអាស៊ី (ICAPP)៕