ឯកឧត្តមបណ្ឌិតសភាចារ្យ សុខ អាន ឧបនាយករដ្ឋមន្ត្រី រដ្ឋមន្ត្រីទទួលបន្ទុកទីស្តីការគណៈរដ្ឋមន្ត្រី បានមានប្រសាសន៍អះអាងនាព្រឹកថ្ងៃទី២៨ ខែមេសា ឆ្នាំ២០១៣ នៅ ខេត្តតាកែវថា ដរាបណារាជរដ្ឋាភិបាលនៅតែដឹកនាំដោយសម្តេចតេជោនាយករដ្ឋមន្រ្តី ដីធ្លីទាំងអស់របស់ប្រជាកសិករដែលប្រើប្រាស់ជាលក្ខណៈគ្រួសារ នឹងមិនត្រូវបានយកពន្ធនោះឡើយ។
ក្នុងពិធីចែកប័ណ្ណកម្មសិទ្ធិដីធ្លីជូនប្រជាពលរដ្ឋចំនួន ១៥៩១គ្រួសារ នៅក្នុងឃុំព្រះបាទជាន់ជុំ ឃុំគិរីចុងកោះ ឃុំព្រៃអំពក ស្រុកគីរីវង់ និងឃុំអូរសារាយ ឃុំត្រពាំងធំខាងជើង ស្រុកត្រាំកក់ ខេត្តតាកែវ ឯកឧត្តមបណ្ឌិតសភាចារ្យ សុខ អាន បានមានប្រសាសន៍ថា ការចែកប័ណ្ណកម្មសិទ្ធិជូនប្រជាពលរដ្ឋនៅពេលនេះ ឆ្លុះបញ្ចាំងឱ្យឃើញអំពីការយកចិត្តទុកដាក់ខ្ពស់របស់រាជរដ្ឋាភិបាល ក្រោមការដឹកនាំប្រកបដោយគតិបណ្ឌិតរបស់សម្តេចអគ្គមហាសេនាបតីតេជោ ហ៊ុន សែន នាយករដ្ឋមន្រ្តីនៃព្រះរាជាណាចក្រកម្ពុជា ក្នុងការធានាកម្មសិទ្ធិដីធ្លីស្របច្បាប់របស់ប្រជាពលរដ្ឋ សំដៅលើកកម្ពស់ជីវភាព សុខុមាលភាព និងការកាត់បន្ថយភាពក្រីក្រ ព្រមទាំងរួមចំណែកដល់ការពង្រឹងយុត្តិធម៌និងស្ថិរភាពសង្គម។ ដូចដែលយើងបានដឹងហើយថា រាជរដ្ឋាភិបាលបាននិងកំពុងអនុវត្តគោលនយោបាយនិងយុទ្ធសាស្រ្តនានា ដើម្បីអភិវឌ្ឍសមត្ថភាពរបស់ប្រជាកសិករ និងអភិវឌ្ឍវិស័យកសិកម្ម ដោយផ្តោតការយកចិត្តទុកដាក់ខ្ពស់ចំពោះការកសាងប្រព័ន្ធធារាសាស្រ្ត និងការផ្តល់សេវាគាំទ្រនានា ព្រមទាំងគោលនយោបាយអភិវឌ្ឍជនបទ សំដៅបង្កើតឱកាសឱ្យកាន់តែប្រសើរ ជូនប្រជាពលរដ្ឋក្នុងការបង្កើនចំណូលប្រចាំគ្រួសារ។ ដូច្នេះការផ្តល់កម្មសិទ្ធិដីធ្លីនេះ គឺពិតជាបានរួមចំណែកជំរុញ និងលើកទឹកចិត្តឱ្យបងប្អូនប្រជាពលរដ្ឋខិតខំបង្កើនផលិតភាព ក៏ដូចជាការវិនិយោគក្នុងវិស័យកសិកម្មឱ្យកាន់តែខ្លាំងឡើងថែមទៀត។
នៅក្នុងការអនុវត្តគោលនយោបាយចាស់សកម្មភាពថ្មីលើវិស័យដីធ្លី ឯកឧត្តមបណ្ឌិតសភាចារ្យ សុខ អាន បានមានប្រសាសន៍ថា ចាប់តាំងពីពាក់កណ្តាលឆ្នាំ២០១២មក រាជរដ្ឋាភិបាលបានបើកយុទ្ធនាការចុះវាស់វែងដីធ្លីប្រមាណជិតពីរលានហិកតា បើគិតជាក្បាលដីគឺប្រមាណ ៧០ ម៉ឺនក្បាលដី សម្រាប់ចែកជូនប្រជាពលរដ្ឋប្រមាណ ៤៧ម៉ឺនគ្រួសារ ដោយមានការចូលរួមពីមន្រ្តីជំនាញបច្ចេកទេសវាស់វែងនិងក្រុមក្មួយៗវីរៈយុវជនស្ម័គ្រចិត្ត សរុបជាង ៣ពាន់នាក់។ ដោយឡែក នៅក្នុងខេត្តតាកែវ ការវាស់វែងផ្តល់កម្មសិទ្ធិដីធ្លីបានអនុវត្តន៍លើឃុំចំនួន១៥ ក្នុងស្រុកគីរីវង់ និងស្រុកត្រាំកក់ ដោយមានការចូលរួមពីមន្រ្តីជំនាញបច្ចេកទេសចំនួន ១១នាក់ និងយុវជនស្ម័គ្រចិត្តសម្តេចតេជោចំនួន ៣៦នាក់។ ជាលទ្ធផល បើគិតមកត្រឹមថ្ងៃនេះ យើងបានបំពេញសាលាកបត្រព័ត៌មានចំនួន ១២ ០៩៦ក្បាលដី និងបានបញ្ចូលសម្រង់បញ្ជីឈ្មោះម្ចាស់ដីបានចំនួន ៩ ៤១៣គ្រួសារ។ កន្លងមក យើងបានចែកប័ណ្ណកម្មសិទ្ធិជូនបងប្អូនប្រជាពលរដ្ឋនៅក្នុងខេត្តតាកែវយើងនេះ បានចំនួន ៥ ២០៣ប័ណ្ណ រួចមកហើយ។
ទាក់ទងនឹងការអនុវត្តការអនុវត្តគោលនយោបាយចាស់សកម្មភាពថ្មី ឯកឧត្តមបណ្ឌិតសភាចារ្យ សុខ អាន បានមានប្រសាសន៍បញ្ជាក់ថា រាជរដ្ឋាភិបាលនៅតែបន្តយុទ្ធនាការវាស់វែងដីធ្លីនេះរហូតសម្រេចបានតាមផែនការកំណត់។ ដូច្នេះ ចំពោះបងប្អូនដែលមានដីពុំទាន់បានទទួលការវាស់វែងពីក្រុមការងារ សូមកុំមានការព្រួយបារម្ភ ពីព្រោះក្រុមការងារវាស់វែងដីធ្លីរបស់យើងកំពុងអនុវត្តការងាររបស់ខ្លួនជាបន្តបន្ទាប់ តាមផែនការដែលបានគ្រោងទុក ហើយនឹងបន្តធ្វើរហូតដល់ចប់ជាស្ថាពរ។
ឯកឧត្តម ស្រី បេន អភិបាលខេត្តតាកែវ បានឲ្យដឹងថា នេះជាលើកទី៥ ដែលឯកឧត្តមបណ្ឌិតសភាចារ្យ សុខ អាន តំណាងដ៏ខ្ពង់ខ្ពស់សម្តេចតេជោនាយករដ្ឋមន្ត្រី ចុះមកផ្តល់កម្មសិទ្ធិដីធ្លីជូនប្រជាពលរដ្ឋនៅក្នុងខេត្តតាកែវ។
ក្នុងពិធីចែកប័ណ្ណកម្មសិទ្ធិដីធ្លីជូនប្រជាពលរដ្ឋនៅស្រុកគីរីវង់ និងស្រុកត្រាំកក់ ឯកឧត្តមបណ្ឌិតសភាចារ្យ សុខ អាន ដែលជាប្រធានក្រុមការងារគណបក្សប្រជាជន ចុះជួយខេត្តតាកែវ បានជម្រាបជូនប្រជាពលរដ្ឋអំពីការឃោសនា ទាក់ទងនឹងការតម្លើងប្រាក់ខែជូនមន្ត្រីរាជការ កម្មករ បង្កឡើងដោយក្រុមអ្នកនយោបាយប្រឆាំង គឺជាការភូតកុហក់ បើពិនិត្យលើស្ថានភាពសេដ្ឋកិច្ចកម្ពុជាសព្វថ្ងៃ។ ឯកឧត្តមបណ្ឌិតសភាចារ្យ សុខ អាន បានមានប្រសាសន៍ឲ្យដឹងថា ដោយសារតែប្រទេសមានសុខសន្តិភាព និងមានស្ថិរភាពនយោបាយ ក៏ដូចជា ការដាក់ចេញនយោបាយត្រឹមត្រូវ ធ្វើឲ្យអ្នកវិនិយោគទុនជាច្រើនមករកស៊ីនៅកម្ពុជា ជាពិសេសលើវិស័យឧស្សាហកម្មកាត់ដេរ ដែលបង្កើនការងារជូនពលករខ្មែរជាង ៥០ម៉ឺននាក់ ដោយមានបៀរវត្សរ៍សមរម្យ និងខ្ពស់ជាងប្រទេសដទៃខ្លះទៀត។
ទាក់ទងនឹងការតម្លើងប្រាក់ខែ ឯកឧត្តមបណ្ឌិតសភាចារ្យ សុខ អាន បានមានប្រសាសន៍បញ្ជាក់ថា រោងចក្រ គឺជាក្រុមហ៊ុនឯកជន ដូច្នោះប្រាក់ខែ វាទាក់ទងនឹងផលិតភាពនៃការងារ។ បើកម្មករកាន់តែមានជំនាញ ប្រាក់ខែក៏ត្រូវឡើងខ្ពស់ទៅតាមនោះដែរ។ ទាក់ទងនឹងបៀរវត្សរ៍មន្ត្រីរាជការ ឯកឧត្តមបណ្ឌិតសភាចារ្យ សុខ អាន បានមានប្រសាសន៍ឲ្យដឹងថា មានជាមធ្យម ១២០ដុល្លារអាមេរិក ដែលកាលពីឆ្នាំ១៩៩៣ មានប្រមាណ ១៨ដុល្លារអាមេរិកប៉ុណ្ណោះ។ ឯកឧត្តមបណ្ឌិតសភាចារ្យ សុខ អាន បានមានប្រសាសន៍ឲ្យដឹងថា តាមគោលការណ៍កំណត់ការផ្តល់ប្រាក់បៀរវត្សរ៍ជូនមន្ត្រីរាជការ បុគ្គលិករដ្ឋ គឺមានត្រឹមតែ ៤% នៃផលទុនសរុបរបស់ជាតិ ឬមិនឲ្យលើសពី ៤០% នៃការចំណាយចរន្តក្នុងថវិការបស់ជាតិតែប៉ុណ្ណោះ។ ដូច្នោះបើយោងតាមកំណើនសេដ្ឋកិច្ចរបស់ប្រទេសកម្ពុជា ការឃោសនារបស់អ្នកនយោបាយប្រឆាំងអំពីការតម្លើងប្រាក់បៀរវត្សរ៍គឺជាការភូតកុហក់ និងជាការសន្យាខ្យល់តែប៉ុណ្ណោះ។
ទោះបីយ៉ាងណាឯកឧត្តមបណ្ឌិតសភាចារ្យ សុខ អាន បានមានប្រសាសន៍ថា រាជរដ្ឋាភិបាលកម្ពុជាក្រោមការដឹកនាំរបស់សម្តេចអគ្គមហាសេនាបតីតេជោ ហ៊ុន សែន នឹងខិតខំដើម្បីតម្លើងបៀរវត្សរ៍ទៅតាមការរីកចម្រើននៃសេដ្ឋកិច្ចជាតិ។ ឧត្តមបណ្ឌិតសភាចារ្យ សុខ អាន បានជម្រាបជូនប្រជាពលរដ្ឋថា សព្វថ្ងៃយើងមានសុខសន្តិភាព មានការអភិវឌ្ឍន៍រីកចម្រើន មានភ្ញៀវទេសចរ និងអ្នកវិនិយោគទុនបរទេសមកច្រើន គឺដោយសាររាជរដ្ឋាភិបាលសព្វថ្ងៃ ការប៉ុនប៉ងដូរថ្មីគឺជាការដូរយកអ្នកពូកែនិយាយភូតកុហក់តែប៉ុណ្ណោះ៕