ឯកឧត្តម ដាតុមហាម៉ាត់ ហ៊ូសេន (DATUK MOHD HUSSEIN) ឯកអគ្គរាជទូតម៉ាឡេស៊ីប្រចាំកម្ពុជា នាថ្ងៃទី២៦ ខែមេសា ឆ្នាំ២០១៣ ក្នុងឱកាសចូលជួបជម្រាបលាសម្តេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជា នៅវិមានសន្តិភាព បានថ្លែងអំណរគុណយ៉ាងជ្រាលជ្រៅជូនចំពោះសម្តេចតេជោនាយករដ្ឋមន្ត្រី និងមន្ត្រីរាជការកម្ពុជាទាំងអស់ដែលបានផ្តល់នូវការគាំទ្រ និងកិច្ចសហប្រតិបត្តិការយ៉ាងពេញទំហឹងក្នុងឱកាស ដែលឯកឧត្តមបំពេញបេសកកម្មជាឯកអគ្គរាជទូតម៉ាឡេស៊ីប្រចាំនៅកម្ពុជា ទទួលបានជោគជ័យ។
ឯកឧត្តម អ៊ាង សុផល្លែត ជំនួយការសម្តេចតេជោនាយករដ្ឋមន្ត្រីបានឲ្យដឹងថា ឯកឧត្តម ដាតុមហាម៉ាត់ ហ៊ូសេន បានមានប្រសាសន៍ថា អ្វីៗបានដំណើរការយ៉ាងល្អជាទីបំផុត ជាពិសេសក្នុងកិច្ចប្រជុំកំពូលអាស៊ាន អាស៊ីបូព៌ា និងកិច្ចប្រជុំផ្សេងៗទៀតនៅកម្ពុជា គឺសុទ្ធសឹងជាការជួយអំពីស្ថាប័នរាជរដ្ឋាភិបាលកម្ពុជាទាំងអស់ ដែលធ្វើឲ្យការងាររបស់លោកពាក់ព័ន្ធទៅនឹងកិច្ចប្រជុំទាំងនេះ បានទទួលលទ្ធផលយ៉ាងល្អប្រសើរ។ ឯកឧត្តមឯកអគ្គរាជទូតក៏បានគោរពវាយតម្លៃខ្ពស់ចំពោះការលើកទឹកចិត្តរបស់រាជ រដ្ឋាភិបាលកម្ពុជាក្នុងការទាក់ទាញអ្នកវិនិយោគមកកាន់កម្ពុជា។
ឯកឧត្តម ដាតុមហាម៉ាត់ ហ៊ូសេន មានប្រសាសន៍ថា អ្នកវិនិយោគម៉ាឡេស៊ី បានមកកម្ពុជាកាន់តែច្រើន ជាពិសេសក្នុងឆ្នាំកន្លងទៅ ហើយទំហំពាណិជ្ជកម្មក៏កាន់តែកើនឡើងយ៉ាងច្រើនរួមទាំងការនាំចេញអង្ករ និងភ្ញៀវទេសចរម៉ាឡេស៊ី មកកាន់កម្ពុជាកាន់តែច្រើនផងដែរ ហើយមានជំនឿជឿជាក់យ៉ាងខ្លាំងថា ទំហំពាណិជ្ជកម្មរវាងប្រទេសទាំង ២ ក៏ដូចជាភ្ញៀវទេសចរម៉ាឡេស៊ីនឹងកើនឡើងខ្លាំងថែមទៀត។
សម្តេចតេជោនាយករដ្ឋមន្ត្រីក៏បានមានប្រសាសន៍ឲ្យដឹងផងដែរថា អាណត្តិរបស់ឯកឧត្តម ដាតុមហាម៉ាត់ ហ៊ូសេន នៅក្នុងព្រះរាជាណាចក្រកម្ពុជា អ្វីៗបានដំណើរការយ៉ាងល្អ ជាពិសេសការរៀបចំកិច្ចប្រជុំកំពូលអាស៊ាន កិច្ចប្រជុំបណ្តាបក្សនយោបាយនៅអាស៊ី (ICAP) កិច្ចប្រជុំអាស៊ីបូព៌ា រួមនឹងដំណើរទស្សនកិច្ចផ្សេងៗទៀត ក៏ដូចជាការរៀបចំឲ្យមានកិច្ចប្រជុំជាមួយអ្នកវិនិយោគម៉ាឡេស៊ី និងការរៀបចំឲ្យមានជំនួបរវាងសម្តេច និងឯកឧត្តមនាយករដ្ឋមន្ត្រីម៉ាឡេស៊ីនៅក្នុងព្រះរាជាណាចក្រកម្ពុជាដែរ។
សម្តេចតេជោបានមានប្រសាសន៍ថ្លែងអំណរគុណជូនចំពោះឯកឧត្តម ដាតុមហាម៉ាត់ ហ៊ូសេន ដែលបានខិតខំប្រឹងប្រែងអស់ពីកំលាំងកាយចិត្ត ជំរុញលើកទឹកចិត្តអ្នកវិនិយោគ ក៏ដូចជាទំនាក់ទំនងទ្វេភាគីដ៏ល្អរវាងព្រះរាជាណាចក្រកម្ពុជា និងម៉ាឡេស៊ី។ សម្តេចតេជោក៏បានជូនពរឯកឧត្តម ឯកអគ្គរាជទូត ឱ្យទៅបំពេញបេសកកម្មការទូតនៅកន្លែងផ្សេងៗទៀតសំរេចបានជោគជ័យ៕