ក្រសួងប្រៃសណីយ៍ និងទូរគមនាគមន៍កម្ពុជា សហការជាមួយអង្គការសហភាពទូរគមនាគមន៍អន្តរជាតិ (ITU) បានរៀបចំនូវវេទិកាអភិវឌ្ឍន៍ថ្នាក់តំបន់រយៈ៣ថ្ងៃ (២៩មេសា ដល់២ ឧសភា ឆ្នាំ២០១៣) នៅសណ្ឋាគារអាំងទែកង់ទីណង់តាល់ ស្តីពីការអភិវឌ្ឍន៍វិស័យទូរគមនាគមន៍ ដើម្បីចែករំលែកបទពិសោធន៍ដោះស្រាយបញ្ហាប្រឈមផ្សេងៗ ដែលតែងតែជួបប្រទះ ក្នុងវិស័យបច្ចេកវិទ្យា។ វេទិកាថ្នាក់តំបន់នេះ ទទួលបានចូលរួមពីសមាជិករបស់ ITU ដែលមកពីប្រទេសផ្សេងៗ និងធុរកិច្ចជនកម្ពុជា ព្រមទាំងមន្ត្រីថ្នាក់ដឹកនាំនៃក្រសួងប្រៃសនីយ៍ និងទូរគមនាគមន៍កម្ពុជា ជាច្រើនរូបទៀត។
នៅក្នុងពិធីបើកនាព្រឹកថ្ងៃទី២៩ ខែមេសា ឆ្នាំ២០១៣ ជាមួយនឹងការស្វាគមន៍ចំពោះវត្តមានអ្នកជំនាញការ ICT និងបណ្តាសមាជិកនៃអង្គការ ITU ក៏ដូចជាបានថ្លែងកោតសរសើចំពោះក្រសួងប្រៃសណីយ៍ ដែលបានសហការជាមួយ ITU ដែលបានរៀបចំវេទិកាដ៏មានសារសំខាន់នេះ ឯកឧត្តមបណ្ឌិតសភាចារ្យ សុខ អាន ឧបនាយករដ្ឋមន្ត្រី រដ្ឋមន្ត្រីទីស្តីការគណៈរដ្ឋមន្ត្រី តំណាងដ៏ខ្ពង់ខ្ពស់សម្តេចអគ្គមហាសេនាបតីតេជោ ហ៊ុន សែន បានចាត់ទុកថា វេទិការស្តីពីការអភិវឌ្ឍន៍វិស័យទូរគមនាគមន៍ ត្រូវបានរៀបចំឡើងចំពេលវេលា។
ឯកឧត្តមបណ្ឌិតសភាចារ្យ សុខ អាន បានមានប្រសាសន៍ថា ព្រឹត្តិការណ៍នេះ គឺជាភស្តុតាងដែលឆ្លុះបញ្ចាំងភាពសាមគ្គី និងកិច្ចសហប្រតិបត្តិការយ៉ាងជិតស្និតរវាងសមាជិក និងប្រទេសដែលចូលរួម ពិសេសក្នុងវិស័យព័ត៌មាន ទំនាក់ទំនង និងបច្ចេកវិទ្យា។ «យើងមានកិត្តិយសដែលបានរៀបចំនូវវេទិកានៅថ្ងៃនេះ ដែលបាននាំមកនូវអ្នកជំនាញឯកទេស និងអ្នកពាក់ព័ន្ធខាងវិស័យ IT មកពីតំបន់អាស៊ីប៉ាស៊ីហ្វិក ដែលបង្កើតកាលានុវឌ្ឍភាពមួយសម្រាប់អ្នកចូលរួម ដើម្បីផ្លាស់ប្តូរនូវទស្សនៈតាមរយៈការពិភាក្សា និងសន្ទនា រួមទាំងចែករំលែកបទពិសោធន៍ ដើម្បីធ្វើយ៉ាងណាកសាងហេដ្ឋារចនា សម្ព័ន្ធ វិស័យ នេះក្នុងតំបន់ឲ្យមានការរីកចម្រើន»។
ឯកឧត្តមបណ្ឌិតសភាចារ្យ សុខ អាន បានមានប្រសាសន៍ឲ្យដឹងថា ជាមួយនឹងការរីកចម្រើនក្នុងវិស័យសេដ្ឋកិច្ចក្នុងព្រះរាជាណាចក្រកម្ពុជា និងក្រោមការសម្របសម្រួលដឹកនាំពីឯកឧត្តម ក្នុងនាមឧបនាយករដ្ឋមន្ត្រី កិច្ចសហប្រតិបត្តិការរវាងក្រសួងប្រៃសណីយ៍ និងទូរគមនាគមន៍កម្ពុជា ក្រសួងព័ត៌មាន និងអាជ្ញាធរជាតិទទួលបន្ទុកកិច្ចអភិវឌ្ឍន៍វិស័យបច្ចេកវិទ្យា គមនាគមន៍ និងព័ត៌មានវិទ្យា (NIDA) ធ្វើឲ្យការអភិវឌ្ឍន៍ក្នុងវិស័យព័ត៌មាន និងបច្ចេកវិទ្យាសារគមនាគមន៍ ICT មានការរីកចម្រើនយ៉ាងឆាប់រហ័ស ដោយបានធ្វើឲ្យប្រជាជនកម្ពុជា ៨៥% បានទទួល និងផ្តល់ព័ត៌មាន ការអប់រំ ភាពសប្បាយរីករាយពីបណ្តាញទូរទស្សន៍ វិទ្យុ សារព័ត៌មាន និងបណ្តាញឃោសនាដទៃទៀត។
ឯកឧត្តមបណ្ឌិតសភាចារ្យ សុខ អាន បានមានប្រសាសន៍ឲ្យដឹងថា កម្ពុជាទទួលបានជោគជ័យក្នុងការអភិវឌ្ឍន៍ហេដ្ឋារចនាសម្ព័ន្ធលើវិស័យ ICT បានធ្វើឲ្យប្រទេសកម្ពុជា គឺជាប្រទេសទី១ មានអ្នកប្រើប្រាស់ទូរស័ព្ទដៃច្រើនជាងគេមានចំនួន ១៣៩.៤១% ក្នុងចំណោមប្រជាជនជាង ១៤លាននាក់។ កម្ពុជាមានប្រតិបត្តិករលើវិស័យ ICT ចំនួន៨ ដែលទទួលបានការអនុញ្ញាតពីរាជរដ្ឋាភិបាល ដែលធ្វើឲ្យទីផ្សារ ICT មានការប្រកួតប្រជែង ដែលធ្វើឲ្យប្រតិបត្តិករខ្លះបង្ខំចិត្តត្រូវរួមបញ្ចូលគ្នា។ សមត្ថភាពសារគមនាគមន៍ និងជំនាញរបស់ប្រជាជនកម្ពុជា ពិសេសយុវជនជំនាន់ក្រោយលើវិស័យ ICT នឹងក្លាយជាកត្តាដ៏សំខាន់ក្នុងការធ្វើឲ្យមានការអភិវឌ្ឍន៍រីកចម្រើនលើវិស័យសេដ្ឋកិច្ចសង្គម វប្បធម៌ និងសមត្ថភាពឆ្ពោះទៅរកការប្រកួតប្រជែងដ៏ជោគជ័យនៅក្នុងតំបន់នាពេលអនាគត។
ឯកឧត្តមបណ្ឌិតសភាចារ្យ សុខ អាន បានមានប្រសាសន៍ចាត់ទុកកិច្ចពិភាក្សានៅក្នុងវេទិកាថ្នាក់តំបន់ស្តីពីការអភិវឌ្ឍន៍វិស័យទូរគមនាគមន៍ថា នឹងរួមវិភាគទាន និងធ្វើឲ្យកាន់តែប្រសើរឡើងនូវផែនការអភិវឌ្ឍន៍ជាតិ ដើម្បីកាត់បន្ថយភាពក្រីក្ររបស់ប្រជាពលរដ្ឋ ទៅតាមរបៀបវាៈ នៃគោលដៅអភិវឌ្ឍន៍សហសវត្សរ៍ ក៏ដូចជារបៀបវារៈ នៃការអភិវឌ្ឍន៍ប្រៃសណីយ៍ប្រកបដោយចីរភាពឆ្នាំ២០១៥។
ឯកឧត្តម សូរ ឃុន រដ្ឋមន្ត្រីក្រសួងប្រៃសណីយ៍ និងទូរគមនាគមន៍ បានមានប្រសាសន៍ឲ្យដឹងថា រាជរដ្ឋាភិបាលកម្ពុជា បានធ្វើការយកចិត្តទុកដាក់ និងដោះស្រាយនូវបញ្ហាមួយចំនួន ធ្វើយ៉ាងណាអភិវឌ្ឍន៍វិស័យគមនាគមន៍ ដើម្បីជាប្រយោជន៍ក្នុងការអភិវឌ្ឍន៍សេដ្ឋកិច្ច ទាក់ទាញអ្នកវិនិយោគទាំងក្នុង និងក្រៅប្រទេស។ «យើងរៀបចំឧបករណ៍ឌីជីថល ដើម្បីអាចដោះស្រាយនូវហានិភ័យផ្សេង។ ក្នុងវិស័យនេះ រាជរដ្ឋាភិបាលកម្ពុជាបានរៀបចំនូវបញ្ញត្តិកម្ម ដើម្បីកសាងទំនុកចិត្តជូនដល់អ្នកវិនិយោគទាំងក្នុងស្រុក និងបរទេស»។
លោក Hamadoun Toure អគ្គលេខាធិការ ITU បានថ្លៃងនូវការសន្យានឹងជួយដល់ប្រទេសកម្ពុជា ក្នុងការកសាងបទបញ្ញត្តិនានា សម្រាប់ជួយដល់វិស័យទូរគមនាគមន៍នៅកម្ពុជា។ ជាងនេះ លោកក៏បានបង្ហាញពីបំណងក្នុងការជួយ ការពារសុវត្ថិភាពផ្នែកប្រព័ន្ធអ៊ីនធើណេតដល់កម្ពុជាផងដែរ។ «យើងប្រហែលជាត្រូវធ្វើការជាមួយគ្នាក្នុងការបង្កើតគោលនយោបាយជាអន្តរជាតិមួយ ដើម្បីដោះស្រាយនៅការការពារសុវត្ថិភាពតាមប្រព័ន្ធអ៊ីនធើណេតនេះ»៕