នាព្រឹកថ្ងៃទី២៧ ខែមេសា ឆ្នាំ២០១៣ ក្នុងនាមរាជរដ្ឋាភិបាល និងក្នុងនាមសម្តេចផ្ទាល់ សម្តេចតេជោនាយករដ្ឋមន្ត្រីបានចូលរួម និងសំដែងការអបអរដោយស្មោះស្ម័គ្រជាទីបំផុត ជាមួយកម្មករ និយោជិក និយោជក និងជនរួមជាតិទាំងអស់ ក្នុងឱកាសប្រារព្ធពិធីអបអរសាទរខួបលើកទី១២៧ ទិវាពលកម្មអន្តរជាតិ១ ឧសភា ឆ្នាំ២០១៣ នៅសាលសន្និសីទកោះពេជ្រ។
សម្តេចតេជោមានប្រសាសន៍បញ្ជាក់ថា ទិវាពលកម្មអន្តរជាតិ១ឧសភានេះ ត្រូវបានប្រារព្ធធ្វើឡើងជារៀងរាល់ឆ្នាំ តាំងពីក្រោយថ្ងៃរំដោះ ៧ មករា ១៩៧៩ រហូតមក ហើយលើសពីនេះទៀតរាជរដ្ឋាភិបាលកម្ពុជាក៏បានកំណត់យកថ្ងៃ១ ឧសភា ជារៀងរាល់ឆ្នាំ ជាថ្ងៃឈប់សម្រាករបស់មន្ត្រីរាជការ កម្មករ និយោជិក ទាំងអស់ផងដែរ។
សម្តេចតេជោនាយករដ្ឋមន្ត្រីក៏បានលើកឡើងអំពីការខិតខំប្រឹងប្រែងជំនះ រាល់ឧបសគ្គទាំងឡាយរបស់រាជរដ្ឋាភិបាល ក៏ដូចជាគណបក្សប្រជាជនកម្ពុជា ក្នុងការរក្សាឆ្នាំងបាយរបស់កម្មករ ក្នុងខណៈពេលនៃការធ្លាក់ចុះសេដ្ឋកិច្ចនៅអាមេរិក និងអឺរ៉ុប ដែលនាំឲ្យមានការកាត់បន្ថយការបញ្ជាទិញពីកម្ពុជា ដែលធ្វើឲ្យទីផ្សាររបស់យើងតូចចង្អៀតធ្វើឲ្យរោងចក្រមួយចំនួនត្រូវផ្អាក និងបិទទ្វារអស់មួយចំនួនផងដែរ។ សម្តេចតេជោមានប្រសាសន៍ឲ្យដឹងថា នៅពេលនោះរាជរដ្ឋាភិបាល និងគណបក្សប្រជាជន បានខិតខំប្រឹងប្រែងខ្លាំងណាស់ ដើម្បីឲ្យរោងចក្រមួយចំនួនបានដំណើរការរក្សាបាននូវការងារ ដែលជាឆ្នាំងបាយរបស់កម្មករ ហើយការខិតខំទាំងនេះ គឺវាផ្ទុយពីគណបក្សប្រឆាំង ដែលគ្រាន់តែសន្យាខ្យល់ជាមួយកម្មករ។
សម្តេចតេជោក៏បានធ្វើការណែនាំ និងអំពាវនាវឲ្យមានការយកចិត្តទុកដាក់លើបញ្ហាមួយចំនួន ដូចជា ការគោរពអនុវត្តច្បាប់ការងារ លក្ខខណ្ឌការងារ ដោះស្រាយវិវាទការងារ និងបានយកឱកាសនោះ អំពាវនាវដល់កម្មករ និយោជិត និយោជក រោងចក្រ សហគ្រាសនានា ត្រូវយកឱកាសទិវាពលកម្មអន្តរជាតិ១ ឧសភា រៀបចំធ្វើសកម្មភាព វប្បធម៌ សិល្បៈ ការលំហែ ការកំសាន្តរីករាយតាមលទ្ធភាព និងលក្ខណៈសម្បត្តិរៀងៗខ្លួន ហើយចៀសវាងឲ្យបានដាច់ខាតនូវការធ្វើសកម្មភាពនានា ដែលនាំឲ្យរំខានដល់សណ្ដាប់ធ្នាប់សាធារណៈ និងបរិយាកាសសប្បាយរីករាយរបស់សង្គមជាតិ។
ទាក់ទងនឹងវិស័យការងារ សម្តេចតេជោនាយករដ្ឋមន្ត្រីបានមានប្រសាសន៍បញ្ជាក់ថា ឥឡូវនេះនៅកម្ពុជាយើង គឺកំពុងខ្វះកំលាំងពលកម្មយ៉ាងច្រើន ផ្តើមពីបញ្ហានេះ ថៅកែរោងចក្រ គឺត្រូវតែមានការប្រឡងប្រណាំងគ្នាទាក់ទងនឹងការថែទាំសុខភាពរបស់កម្មករ រួមទាំងការគិតគូរអំពីបញ្ហាប្រាក់ឈ្នួលកម្មករផងដែរ។ ប៉ុន្តែទោះជាយ៉ាងណាក៏ដោយ សម្តេចតេជោក៏បានបង្ហាញឲ្យឃើញពីប្រាក់ឈ្នួល នៅប្រទេសមួយចំនួនជិតខាងយើងនេះ រាប់ទាំងឥណ្ឌាដែលជាប្រទេសរីកចម្រើនមួយ គឺប្រហាក់ប្រហែលនឹងប្រទេសយើងទេ ហើយប្រទេសខ្លះអាចទាបជាងប្រាក់ឈ្នួលនៅប្រទេសយើងទៅទៀត។ ទន្ទឹមនេះចំពោះមន្ត្រីរាជការ កងកំលាំងប្រដាប់អាវុធ ក៏ត្រូវបានដំឡើងក្នុង ១ឆ្នាំ ២០% ផង ដែរ ហើយអ្នកដែលមានកាំប្រាក់ (ឃ) ដែលមានទឹកប្រាក់ជាង ២០ម៉ឺនរៀល ជាចំនួនតិចជាងគេនោះ ក៏នឹងត្រូវលុបចោលមិនឲ្យមានតទៅទៀត ហើយនៅពេលខាងមុខនេះការដំឡើងប្រាក់បៀវត្សរ៍ នឹងអាចបង្កើនទៅតាមការវិវត្តន៍រីកចម្រើននៃសេដ្ឋកិច្ចជាតិវិញម្តង។
សម្តេចតេជោបានធ្វើការអំពាវនាវដល់កម្មករកម្មការិនីទាំងអស់ ត្រូវមានការប្រុងប្រយ័ត្នកុំជឿការញុះញង់របស់បក្សប្រឆាំង ដែលនាំឲ្យបាត់បង់ផលប្រយោជន៍ការងារ ដែលជាឆ្នាំងបាយរបស់ខ្លួន។ សម្តេចតេជោមានប្រសាសន៍ថា ចំពោះការបោះឆ្នោតនេះ គឺជាការបោះឆ្នោតថ្នាក់ជាតិ ហើយបើសិនធ្វើការសំរេចចិត្តខុស នឹងនាំឲ្យមានគ្រោះថ្នាក់ដល់ប្រទេសជាតិ ព្រោះថាតួនាទីនាយករដ្ឋមន្ត្រីការសំរេចចិត្តខ្លះ គឺពាក់ព័ន្ធនឹងទិដ្ឋភាពនយោបាយអន្តរជាតិ។ សម្តេចតេជោបានសំណូមពរទោះជាមានការខឹងទៅលើមេភូមិ មេឃុំ ឬមន្ត្រីនគរបាលខ្លះ លើប្រការផ្សេងៗ សូមកុំខឹងគោ វាយរទេះ។ រីឯបញ្ហារដ្ឋបាលនៅថ្នាក់ក្រោមជាតិ បើមានបញ្ហាខុសឆ្លង គឺគេអាចផ្លាស់ប្តូរបានទេ។ ដូច្នេះបើស្រឡាញ់ បើអាណិត បើពេញចិត្ត បើជឿទុកចិត្ត ហ៊ុន សែន សូមបោះឆ្នោតជូនគណបក្សប្រជាជនកម្ពុជា។
ឯកឧត្តម អ៊ិត សំហេង រដ្ឋមន្ត្រីក្រសួងសង្គមកិច្ចអតីតយុទ្ធជន និងយុវនីតិសម្បទា និងជាប្រធានគណៈកម្មការដឹកនាំការកសាងគណបក្ស កសាងអង្គការសហជីព និងចលនាកម្មករ និយោជិក តាមរោងចក្រ សហគ្រាស គ្រឹះស្ថាន បានរាយការណ៍អំពីវឌ្ឍនភាពនៃការអនុវត្តសិទ្ធិសេរីភាពក្នុងការបង្កើតសហជីព អង្គការវិជ្ជាជីវៈ និងសិទ្ធិកូដកម្មដែលត្រូវបានអនុវត្តយ៉ាងទូលំទូលាយប្រកបដោយផ្លែផ្កា។ ឯកឧត្តមរដ្ឋមន្ត្រីបានបញ្ជាក់ថា ពិធីសំណេះសំណាលនៅថ្ងៃនេះ គឺជាព្រឹត្តិការណ៍ដែលបានផ្សារភ្ជាប់ទិវាពលកម្មអន្តរជាតិ ១ឧសភា ដែលត្រូវបានប្រារព្ធជារៀងរាល់ឆ្នាំតាំងពីក្រោយថ្ងៃ៧ មករា ១៩៧៩មក ដើម្បីរំលឹកដល់សមិទ្ធផលនៃការអភិវឌ្ឍន៍វិស័យទំនាក់ទំនងវិជ្ជាជីវៈ ដែលបង្កើតនូវបទដ្ឋានការងារសម ស្របសម្រាប់កម្មករ និយោជិក និយោជក ដែលជាកំលាំងស្នូលក្នុងការអភិវឌ្ឍប្រទេសជាតិ។
យោងតាមការធ្វើជំរឿនសហគ្រាសឆ្នាំ២០១១ ឲ្យដឹងថា ប្រទេសកម្ពុជាមានសហគ្រាសធុនតូច និងមធ្យមសរុបចំនួន ៥០៥ ១៣៤ ដែលផ្តល់ការងារសរុប ១ ៦៧៦ ២៦៣ នាក់ ក្នុងនោះស្រី ១ ០២៦ ០៨៤ នាក់ ដោយមិនទាន់គិតឱកាសការងារក្នុងវិស័យកសិកម្ម ដែលមានកំលាំងពលកម្មរាប់ លាននាក់។ ដោយឡែកវិស័យឧស្សាហកម្មកាត់ដេរសំលៀកបំពាក់ និងស្បែកជើង គិតមកដល់ចុងឆ្នាំ ២០១២ មានរោងចក្រចំនួន ៧២៨ គឺកើនឡើងប្រមាណ ១៣៩ រោងចក្រ បើប្រៀបធៀបនឹងឆ្នាំ ២០១១ និងមានកម្មករនិយោជិកចំនួន ៥១០ ៦៨២ នាក់ ដោយបានទទួលប្រាក់ឈ្នួលប្រមាណ ៤០ លាន ដុល្លារអាមេរិកក្នុង ១ ខែៗព្រមទាំងបានបង្កើតមុខរបរប្រយោលថែមទៀត ដូចជាផ្ទះឈ្នួលលក់ដូរ ម្ហូបអាហារ ការដឹកជញ្ជូនប្រមាណ ២ លាននាក់ដែលបានទទួលផលដោយប្រយោលពីវិស័យនេះ។ បន្ថែមលើនេះ តម្លៃសរុបនៃការនាំចេញផលិតផលសំលៀកបំពាក់ និងស្បែកជើងបានកើនឡើងជា រៀងរាល់ឆ្នាំ ដោយឡែកឆ្នាំ ២០១២ បរិមាណនាំចេញមានចំនួន ៤ ៣៥៩ លានដុល្លារអាមេរិក៕