នារាត្រីថ្ងៃទី២៨ ខែមេសា ឆ្នាំ២០១៣ ឯកឧត្តមបណ្ឌិតសភាចារ្យ សុខ អាន ឧបនាយករដ្ឋមន្ត្រី រដ្ឋមន្ត្រីទទួលបន្ទុកទីស្តីការគណរដ្ឋមន្ត្រី បានអញ្ជើញជាអធិបតីភាពនៅក្នុងពិធីជួបជុំអបអរខួបលើកទី១៥ឆ្នាំ នៃការបង្កើត “សមាគមអាណិកជន និងធុរកិច្ចចិន ហុងកុង និងម៉ាកាវ នៅកម្ពុជា” ដែលបានប្រារព្ធធ្វើនៅសណ្ឋាគារឡឺរ៉ូយ៉ាល់ ដោយមានវត្តមាន ឯកឧត្តម ផាង គ័ងស៊ារ (Pan Guangxue) ឯកអគ្គរដ្ឋទូតសាធារណរដ្ឋប្រជាមានិតចិន ប្រចាំព្រះរាជាណាចក្រកម្ពុជា និងធុរកិច្ចជនចិន ហុងកុង និងម៉ាកាវ ជាច្រើនរូបចូលរួម។
ឯកឧត្តមបណ្ឌិតសភាចារ្យ សុខ អាន បានសម្តែងនូវការកោតសរសើរ និងថ្លែងអំណរគុណចំពោះសមាគម ដែលក្នុងរយៈពេល ១៥ឆ្នាំ កន្លងមកបានខិតខំជួយផ្សព្វផ្សាយដល់សហគមន៍ធុរកិច្ចក្នុងទីក្រុងហុង កុង និង ម៉ាកាវ ឲ្យបានយល់ដឹងជ្រួតជ្រាបអំពីកាលានុវត្តភាព និងសក្តានុពលភាពនៃការវិនិយោគនៅក្នុងប្រទេសកម្ពុជា ព្រមទាំងជួយសម្របសម្រួលដល់ការធ្វើធុរកិច្ច ក៏ដូចជាសកម្មភាពពាណិជ្ជកម្មនៅក្នុងប្រទេសកម្ពុជា របស់វិនិយោគិនមកពីទីក្រុងហុងកុង និងទីក្រុងម៉ាកាវ។
ឯកឧត្តមបណ្ឌិតសភាចារ្យ សុខ អាន បានមានប្រសាសន៍ថា នៅក្នុងរយៈពេល ១៥ឆ្នាំមកនេះជាមួយនឹងសមាជិករបស់ខ្លួនជាង ៧០ក្រុមហ៊ុន ដែលភាគច្រើនមកពីវិស័យផ្សេងៗដូចជា វាយនភណ្ឌ ឪសថ ដឹកជញ្ជូន ផលិតផលក្រដាស គីមី ប្លាស្ទិក គ្រឿងចក្រ សមាគមអាណិកជន និងធុរកិច្ច ចិន ហុងកុង និងម៉ាកាវនៅកម្ពុជា ពិតជាបានចូលរួមយ៉ាងសំខាន់ក្នុងការអភិវឌ្ឍវិស័យឧស្សាហកម្មនៅក្នុងប្រទេសកម្ពុជាដែលវិស័យនេះ បានរួមចំណែកដ៏ធំធេងដល់ការអភិវឌ្ឍសេដ្ឋកិច្ច។
ឯកឧត្តមបណ្ឌិតសភាចារ្យ សុខ អាន បានចាត់ទុកការខិតខំជួយការពារសិទ្ធិ និងផលប្រយោជន៍ស្របច្បាប់របស់សមាជិកសមាគមការផ្តល់ព័ត៌មានអំពីច្បាប់បទប្បញ្ញត្តិ គោលនយោបាយ បរិយាកាសវិនិយោគ និងលក្ខខណ្ឌរស់នៅក្នុងប្រទេសកម្ពុជា ដល់វិនិយោគិនមកពីហុងកុង និងម៉ាកាវព្រមទាំងការជួយដោះស្រាយបញ្ហាផ្សេងៗរបស់សមាជិក គឺជាបេសកកម្មដ៏ចម្បងដែលគាំទ្រដល់ការធ្វើធុរកិច្ចរបស់សមាជិកសមាគមនៅក្នុងប្រទេសកម្ពុជា។
ឯកឧត្តមបណ្ឌិតសភាចារ្យ សុខ អាន បានមានប្រសាសន៍បញ្ជាក់ថា ការចូលរួមចំណែកដ៏ថ្លៃថ្លារបស់សមាគមក្នុងការថែរក្សា និងលើកកម្ពស់មិត្តភាពជាប្រពៃណីរវាងព្រះរាជាណាចក្រកម្ពុជា និងសាធារណរដ្ឋប្រជាមានិតចិន ឆ្លុះបញ្ចាំងឱ្យឃើញថាសមាគមបាន និងកំពុងចូល រួមយ៉ាងសកម្មជាមួយរដ្ឋាភិបាល នៃសាធារណរដ្ឋប្រជាមានិតចិនក្នុងការពង្រឹង និងពង្រីកទំនាក់ទំនងរវាងប្រទេសទាំងពីរ ដើម្បីបុព្វហេតុដ៏ឧត្តុង្គឧត្តមសម្រាប់ប្រជាជន នៃប្រទេសទាំងពីរ។
នៅក្នុងពិធីនោះ លោកឧកញ៉ា Yum Sui Sang ប្រធានសមាគមអាណិកជន និងធុរកិច្ច ចិន ហុងកុង និងម៉ាកាវនៅកម្ពុជា បានមានប្រសាសន៍ឲ្យដឹងថា រហូតមកដល់ពេលនេះសមាគមន៍ បានឈានចូលដល់ឆ្នាំទី១៦ហើយ។
ក្នុងរយៈពេល១៥ឆ្នាំ កន្លងមកនេះ សមាជិកនៃសមាគមន៍បានបមពេញភារកិច្ចជាច្រើនដែលរួមមាន ដូចជា វិស័យសប្បុរសធម៌ អប់រំ និងវប្បធម៌ ពាណិជ្ជកម្ម ជូនដល់ប្រជាជនចិន ក៏ដូចជាប្រជាជនក្នុងស្រុក ហើយបានដើរតួនាទីជាស្ពានក្នុងការតភ្ជាប់ទំនាក់ទំនងពាណិជ្ជកម្មរវាងប្រទេសទាំងពីរ។
ក្នុងនាមសមាគមអាណិកជន និងធុរកិច្ច ចិន ហុងកុង និងម៉ាកាវនៅកម្ពុជា លោកឧកញ៉ា Yum Sui Sang បានថ្លែងអំណរគុណចំពោះរាជរដ្ឋាភិបាលកម្ពុជា ដែលបានប្រកាន់យកគោលជំហរចិនតែមួយ៕