ដោយ ៖ មរតក
ខេត្ដសៀមរាប ៖
នៅក្នុងកិច្ចប្រជុំកំពូលរដ្ឋមន្ដ្រីសេដ្ឋកិច្ចអាស៊ានលើកទី៤៤
នៅខេត្ដសៀមរាបនៃប្រទេសកម្ពុជា
រដ្ឋមន្ដ្រីសេដ្ឋកិច្ចអាស៊ានទាំងអស់នឹងពិភាក្សាគ្នាអំពីសមាហរណកម្ម
សេដ្ឋកិច្ចអាស៊ាន
ជាពិសេសក្នុងការអនុវត្ដវិធានការនៃផែនការសហគមន៍សេដ្ឋកិច្ចអាស៊ាន
ដើម្បីបង្កើតសហគមន៍សេដ្ឋ កិច្ចអាស៊ានឆ្នាំ២០១៥
និងពិភាក្សាជាមួយប្រទេសដៃគូទាំងអស់
ដើម្បីឱ្យទំនាក់ទំនងសេដ្ឋកិច្ចពាណិជ្ជកម្មកាន់តែមាន
ភាពរីកចម្រើនស៊ីជម្រៅ ។លោក ចម ប្រសិទ្ធ ទេសរដ្ឋមន្ដ្រី រដ្ឋ មន្ដ្រីក្រសួងពាណិជ្ជកម្មកម្ពុជា និងជា ប្រធានដឹកនាំអង្គប្រជុំ បានថ្លែងថា ក្នុង អំឡុងកិច្ចប្រជុំរដ្ឋមន្ដ្រីសេដ្ឋកិច្ចអាស៊ាន លើកទី៤៤ និងកិច្ចប្រជុំពាក់ព័ន្ធចាប់ពី ថ្ងៃទី២៦ដល់ថ្ងៃទី៣១ខែសីហាឆ្នាំ២០១២ រដ្ឋមន្ដ្រីសេដ្ឋកិច្ចអាស៊ាននឹងពិភាក្សាអំពី សមាហរណកម្មសេដ្ឋកិច្ច ជាពិសេស ការអនុវត្ដវិធានការនៃផែនការសហ គមន៍សេដ្ឋកិច្ចអាស៊ាន ដើម្បីបង្កើត សហគមន៍អាស៊ានឆ្នាំ២០១៥ ។
លោកបន្ដថា នៅក្នុងកិច្ចពិភាក្សា ខាងលើនេះ កិច្ចប្រជុំនឹងជំរុញឱ្យរដ្ឋមន្ដ្រី សេដ្ឋកិច្ចប្រទេសដៃគូពិភាក្សារបស់ អាស៊ាន ដូចជាមកពីប្រទេសអូស្ដ្រាលី, កាណាដា, ចិន, ឥណ្ឌា, ជប៉ុន, កូរ៉េខាង ត្បូង, ណូវែលហ្សេឡង់, រុស្ស៊ី និងសហរដ្ឋ អាមេរិក ដើម្បីធ្វើឱ្យទំនាក់ទំនងសេដ្ឋ កិច្ចនិងពាណិជ្ជកម្មរវាងអាស៊ាននិងដៃគូ ពិភាក្សារីកចម្រើននិងកាន់តែស៊ីជម្រៅ។
លើសពីនេះទៅទៀត រដ្ឋមន្ដ្រីសេដ្ឋកិច្ច អាស៊ាន និងរដ្ឋមន្ដ្រីមកពីប្រទេសដៃគូ ពិភាក្សាក៏នឹងធ្វើការពិភាក្សាជាមួយ តំណាងធុរកិច្ចប្រកបដោយឥទ្ធិពលមួយ ចំនួនមកពីក្រុមប្រឹក្សាយោបល់ធុរកិច្ច អាស៊ាន, ក្រុមប្រឹក្សាធុរកិច្ចអាស៊ាន សហរដ្ឋអាមេរិក, ក្រុមប្រឹក្សាធុរកិច្ច អាស៊ីបូព៌ា, សហព័ន្ធសភាពាណិជ្ជកម្ម និងឧស្សាហកម្មជប៉ុន-អាស៊ាន, ក្រុម ប្រឹក្សាធុរកិច្ចអាស៊ានកាណាដា,សហព័ន្ធ ឧស្សាហកម្មកាត់ដេរអាស៊ាន ព្រមទាំង វិទ្យាស្ថានស្រាវជ្រាវសេដ្ឋកិច្ចសម្រាប់ អាស៊ាន និងអាស៊ីបូព៌ា ដើម្បីសម្រួល និងជំរុញពាណិជ្ជកម្មនិងវិនិយោគនៅ អាស៊ាន អាស៊ីបូព៌ា ព្រមទាំងនៅតំបន់ ផ្សេងៗទៀតនៅលើពិភពលោក ។
គួរបញ្ជាក់ថា កិច្ចប្រជុំថ្នាក់រដ្ឋមន្ដ្រី សេដ្ឋកិច្ចអាស៊ានលើកទី៤៤ បានរៀបចំ ធ្វើនៅសណ្ឋាគារអង្គរអប្សរាក្នុងខេត្ដ សៀមរាបនៃប្រទេសកម្ពុជា ដែនមាន រយៈពេលចាប់ពីថ្ងៃទី២៦ដល់ថ្ងៃទី៣១ខែ សីហាឆ្នាំ២០១២ ខណៈនៅថ្ងៃទី២៧ខែសីហា ឆ្នាំ២០១២ សម្ដេចអគ្គមហាសេនាបតី តេជោ ហ៊ុន សែន នាយករដ្ឋមន្ដ្រីនៃព្រះ រាជាណាចក្រកម្ពុជា ក្នុងនាមប្រធានអាស៊ាន បានអញ្ជើញជាអធិបតីដ៏ខ្ពង់ខ្ពស់ បំផុតបើកកិច្ចប្រជុំនេះ និងបានស្នើឱ្យរដ្ឋ មន្ដ្រីសេដ្ឋកិច្ចអាស៊ានទាំងអស់ផ្ដោត ទៅលើចំណុចសំខាន់ៗមួយចំនួនផងដែរ ៕
