ក្រសួងការពារជាតិកម្ពុជា បានរៀបចំបើកវគ្គបណ្តុះបណ្តាលមួយដ៏មានសារៈសំខាន់ក្រោមការឧបត្ថម្ភ ពីរដ្ឋាភិបាលសហរដ្ឋអាមេរិក តាមរយៈនៃកម្មវិធីមួយដែលហៅថា គំនិតផ្តួចផ្តើមកំណែទម្រងនៃស្ថាប័នយោធា(DIRI)ដែលផ្តល់ ដោយក្រសួងការពារជាតិសហរដ្ឋអាមេរិក ដើម្បីជំនួយដល់កម្ពុជាឲ្យមានលទ្ធភាពគ្រប់គ្រាន់ លើកស្ទួយ សុវត្តិភាពប្រជាជន និង ឈានទៅដល់ការរៀបចំផែនការ និង ចងក្រងឯកសារយុទ្ធសាស្រ្តផ្សេងៗទៀតផងដែរតទៅថ្ងៃ អនាគត។
វគ្គបណ្តុះបណ្តាល នេះ បានរៀបចំឡើងនៅក្រុងសៀមរាប ចាប់ពីថ្ងៃទី២៧ ដល់ថ្ងៃទី ៣០ខែសីហា ឆ្នាំ២០១២។ សិក្ខា កាម ដែលបានចូលរៀនសូត្រ នៅក្នុងវគ្គសិក្សានេះគឺជាមន្ត្រីជាន់ខ្ពស់ដែលត្រូវបានជ្រើសរើស ចេញពីបណ្តាស្ថាប័នសំខាន់ៗមួយចំនួនរបស់ក្រសួងការពារជាតិដូចជា អគ្គបញ្ជាការដ្ឋាន នៃកងយោធពលខេមរភូមិន្ទ តំណាងមកពីស្ថាប័នពាក់ព័ន្ធដូចជា ផ្នែកសន្តិសុខលំហសមុទ្រ ផ្នែកប្រឆាំងភាវរកម្ម ផ្នែកប្រតិបត្តិការសន្តិភាព ផ្នែកសង្រ្គោះគ្រោះមហន្តរាយ និង មានវត្តមានមន្ត្រីជាន់ខ្ពស់របស់កងរាជអាវុធហត្ថជាដើម។ល។ ចំនួន៣១នាក់ ព្រមជាមួយគ្នានេះក៏មានវត្តមានប្រតិភូរបស់សហរដ្ឋអាមេរិកផងដែរ។
ឧត្តម សេនីយ៍ឯក សួន សំណាង អគ្គនាយករងនៃអគ្គនាយកដ្ឋាននយោបាយ កិច្ចការបរទេស នាយក នាយកដ្ឋាននយោបាយ ផែនការ និង ជាប្រធានក្រុមការងារសំរបសំរួលសហប្រតិបតិ្តការយោធា(MCCG)បានលើក បង្ហាញថាការបើកវគ្គផែនការយុទ្ធសាស្រ្តនេះ គឺស្ថិតក្នុងគោលបំណងបណ្តុះបណ្តាលនាយទាហ៊ានរបស់យើងដែលមានការពាក់ ព័ន្ធក្នុងការរៀបចំផែនការឲ្យទទួលបាននូវចំណេះដឹងថ្មីៗទៀត និងជាការជួយកែលម្អ នូវសមត្ថភាពបន្ថែមទៀត។
ឯកឧត្តម ក៏បានបញ្ជាក់ដែរថា វគ្គបណ្តុះបណ្តាលផែនការយុទ្ធសាស្ត្រលើកនេះ គឺជាវគ្គដំបូងក្នុងកម្រិតថ្នាក់មូលដ្ឋាន ហើយវគ្គផែនការយុទ្ធសាស្រ្តនេះ វាមានកម្រិតថ្នាក់ឈានឡើងជាលំដាប់ ដូចនេះសិក្ខាកាមដែលមានមុខចូលរួមទទួលយកនូវការរៀនសូត្រក្នុង វគ្គកម្រិតមូលដ្ឋាននេះ ត្រូវមានកាតព្វកិច្ចបន្តចំណេះដឹងរបស់ខ្លួននៅក្នុងវគ្គកម្រិត ឈានឡើងបន្ទាប់ទៀត ដោយមិនអាចផ្លាស់ប្តូរសមាសភាពបន្តការសិក្សាជំនួសគ្នា បាននោះឡើយ។ អ្នកដែលបានចូលរៀនក្នុងវគ្គនេះ ត្រូវបន្តរៀនរហូតដល់កម្រិតថ្នាក់បញ្ចប់ បើមិនដូច្នោះទេវគ្គសិក្សានេះ ពិតជាមិនបានផ្តល់ប្រយោជន៍សំរាប់ការបំរើជាតិនោះឡើយ៕