ខេត្តសៀមរាប:
សម្តេច ហ៊ុន សែន
បានស្នើអោយរដ្ឋមន្ត្រីសេដ្ឋកិច្ចអាស៊ាន ធ្វើយ៉ាងណា សម្រេចអោយបាន
នូវសហគមន៍សេដ្ឋកិច្ចអាស៊ានឆ្នាំ២០១៥។
នោះគឺការកាត់បន្ថយគម្លាតអភិវឌ្ឍន៍ រវាងប្រទេសទាំង ១០
ជាសមាជិកអាស៊ាន។
នៅក្នុងសុន្ទរកថា
បើកកិច្ចប្រជុំរដ្ឋមន្ត្រីសេដ្ឋកិច្ចអាស៊ាន លើកទី៤៤ នៅខេត្តសៀមរាប
សម្តេចហ៊ុនសែន បានលើកឡើងថា ការអភិវឌ្ឍន៍សេដ្ឋកិច្ច
របស់ប្រទេសសមាជិកថ្មី នៅអាស៊ាន នៅមានភាពផុយស្រួយនៅឡើយ។
សម្តេចប្រមុខរាជរដ្ឋាភិបាល និងជាប្រមុខដឹកនាំអាស៊ាន
បានជំរុញអោយរដ្ឋមន្ត្រីអាស៊ាន ធ្វើយ៉ាងណាកាត់បន្ថយគម្លាតសេដ្ឋកិច្ច
នៅក្នុងតំបន់អាស៊ាន។
សម្តេច ហ៊ុន សែន បានមានប្រសាសន៍ថា “កិច្ចការនេះ តម្រូវអោយយើងបង្កើតកិច្ចប្រឹងប្រែងទ្វេដង”។
គម្លាតអភិវឌ្ឍន៍នៅក្នុងអាស៊ាននៅមានទំហំធំនៅឡើយ ទោះបីជាគម្លាតនេះ បានកាត់បន្ថយគួរអោយកត់សម្គាល់ក្តី។
សម្តេចហ៊ុនសែន បានស្នើអោយរដ្ឋមន្ត្រីអាស៊ាន ប្រែក្លាយអាស៊ាន អោយក្លាយទៅជាផ្សារ និងមូលដ្ឋានផលិតកម្មរួមមួយពិតប្រាកដ៕
