ភ្នំពេញ:
មន្ត្រីក្រសួងការបរទេសកម្ពុជា
កាលពីរសៀលថ្ងៃទី២៧ ខែសីហា ឆ្នាំ២០១២ បានមានប្រសាសន៍ថា
ទំនាក់ទំនងការទូតរវាងប្រទេសហ្វីលីពីន និងកម្ពុជា
មានទំនាក់ទំនងល្អជាមួយគ្នាជាធម្មតា ប៉ុន្តែរហូតមកដល់ពេលនេះ
កម្ពុជានៅពុំទាន់ចាត់បញ្ជូនឯកអគ្គរាជទូតរបស់ខ្លួន
ទៅបំពេញការងារទូតនៅទីក្រុងម៉ានីលទេ។
ចំពោះដំណោះស្រាយសមុទ្រចិនខាងត្បូង គឺកម្ពុជា
នៅតែរក្សាភាពអព្យាក្រឹត្យ។
លោក កុយ គួង អនុរដ្ឋលេខាធិការ
និងជាអ្នកនាំពាក្យក្រសួងការបរទេសកម្ពុជា
បានមានប្រសាសន៍បញ្ជាក់ប្រាប់ក្រុមអ្នករាយការណ៍ព័ត៌មានថា
"ខ្ញុំសូមបញ្ជាក់ថា កន្លងមក រហូតដល់ពេលនេះ
ទំនាក់ទំនងការទូតរវាងកម្ពុជា និងហ្វីលីពីន អត់មានអីថាមិនល្អទេ។
ការដែលឯកអគ្គរាជទូតយើងចប់អាណត្តិ វិលត្រឡប់ ដែលក្រសួងការបរទេស
កោះហៅឡើងមកវិញ ជាកិច្ចការផ្ទៃក្នុងកម្ពុជា សុទ្ធសាធ
គឺតម្រូវការចំបាច់របស់ផ្ទៃក្នុងប្រទេសកម្ពុជា របស់ក្រសួងការបរទេស
ក៏ដូចរាជរដ្ឋាភិបាលកម្ពុជា
ដូច្នេះអត់មានប៉ះពាល់ទៅនឹងទំនាក់ទំនងណាមួយ រវាងកម្ពុជា
និងហ្វីលីពីនទេ។ នេះជារឿងផ្ទៃក្នុងទេ។ យើងកោះហៅត្រឡប់មកវិញ
ហើយយើងបញ្ជូនថ្មីទៅជំនួស។ ដូច្នេះអត់មានអ្វី
ដែលប្រទេសទាំងពីរមានបញ្ហាផ្លូវទូត ជាមួយគ្នាទេ
យើងនៅមានទំនាក់ទំនងល្អជាធម្មតា។ អ្វីៗប្រព្រឹត្តទៅជាធម្មតា"។
លោក កុយ គួង បានមានប្រសាសន៍បន្តទៀតថា ជំហររបស់រដ្ឋាភិបាលទាំងពីរ
គឺកម្ពុជា និងហ្វីលីពីន មិនមានអ្វីប្រែប្រួលទេ
គឺយើងនៅតែគោរពគ្នាទៅវិញទៅមក ជាប្រទេសអាស៊ានដូចគ្នា
ក្នុងគ្រួសារតែមួយ។
អំពីបញ្ហាជម្លោះសមុទ្រចិនខាងត្បូង
រវាងប្រទេសចិន និងសមាជិកអាស៊ានមួយចំនួន ដូចជា ហ្វីលីពីន វៀតណាម
ម៉ាឡេស៊ី និងប្រ៊ុយណេ ត្រូវបានលោក កុយ គួង បានមានប្រសាសន៍បញ្ជាក់ថា
"កន្លងមក លោកឧបនាយករដ្ឋមន្ត្រី ហោ ណាំហុង
ធ្លាប់បានបញ្ជាក់ម្តងហើយម្តងទៀតថា យើងប្រកាន់ជំហរជាគោលការណ៍
គឺឥតលំអៀងទេ គឺក្នុងនាមកម្ពុជា ប្រធានអាស៊ាននេះ សូមបញ្ជាក់ថា
កម្ពុជាអត់មានប្រយោជន៍ណាមួយ នៅក្នុងសមុទ្រចិនខាងត្បូងទេ។
ដូច្នេះហើយយើងប្រកាន់ជំហរជាគោលការណ៍ ប្រកាន់ជំហរអព្យាក្រឹត្យ
ពីព្រោះថា ប្រទេសមានបញ្ហា ក៏ជាប្រទេសនៅក្នុងសហគមន៍យើងតែមួយ
ហើយប្រទេសចិន ក៏ជាប្រទេសដៃគូរបស់អាស៊ានដែរ។
ដូច្នេះភាគីទាំងអស់សុទ្ធតែជាមិត្តនឹងគ្នា”។
សូមរម្លឹកថា
រាជរដ្ឋាភិបាលកម្ពុជា បានសម្រេចតែងតាំងលោកស្រី ទួត បញ្ញា
អនុរដ្ឋលេខាធិការក្រសួងការបរទេស ធ្វើជាឯកអគ្គរាជទូតថ្មី របស់កម្ពុជា
ប្រចាំនៅប្រទេសហ្វីលីពីន ជំនួសលោក ហើស សិរីធន។ លោក ហើស សិរីធន
អតីតឯកអគ្គរាជទូតកម្ពុជា ត្រូវផ្លាស់ប្តូរតំណែងភ្លាមៗ ក្រោយពីលោក
បានសរសេរអត្ថបទប្រតិកម្មនឹងប្រទេសហ្វីលីពីន
តាមរយៈការចុះផ្សាយក្នុងកាសែតប្រទេសហ្វីលីពីន
ពាក់ព័ន្ធនឹងជម្លោះសមុទ្រចិនខាងត្បូង ដែលជាប្រធានបទសំខាន់
ក្នុងកិច្ចប្រជុំរដ្ឋមន្ត្រីការបរទេសអាស៊ាន លើកទី៤៥
កាលពីដើមខែកក្កដា នៅរាជធានីភ្នំពេញ៕