ដោយ ៖ សំរិត
ភ្នំពេញ ៖ លោក កែប ជុតិមា អភិបាលរាជធានីភ្នំពេញ និងមន្រី្ដជំនាញ អាជ្ញាធរពាក់ពន្ធ័ បានចុះពិនិត្យទីតាំងស្ពានអាកាសស្ទឹងមានជ័យ ដែលគ្រោងនិងបើកការដ្ឋាននាដើមខែ៩នេះ ដោយសារនៅតំបន់នេះមានសភាពតូចចង្អៀត និងមានការកកស្ទះចរាចរណ៍ជារៀងរាល់ថ្ងៃ ដូច្នេះតម្រូវឱ្យអាជ្ញាធររាជធានីភ្នំពេញត្រូវតែធ្វើការអភិវឌ្ឍពង្រីកផ្លូវ ដោយធ្វើស្ពានអាកាសចំណាយថវិកា១៧លានដុល្លាអាមេរិក ។
នាព្រឹកថ្ងៃទី២៨ ខែសីហា ឆ្នាំ២០១២ យោងតាមការបញ្ជាក់របស់មន្ទីរសាធារណការ និងដឹកជញ្ជូនរាជធានីភ្នំពេញ បានឲ្យដឹងថា កន្លងមកមន្ទីរបានប្រជុំជាមួយក្រុមហ៊ុន OCIC (អ្នកសាងសង់) និងតំណាងរដ្ឋាករទឹកស្វយ័តរាជធានីភ្នំពេញ ព្រមទាំងចុះធ្វើការវាស់វែងពិនិត្យប្រព័ន្ធបណ្តាញក្រោមដី ដូចជាបំពង់ទឹកស្អាត រួចរាល់ហើយដែរ ។ ដោយឡែកចំពោះសំណង់ដែលមានប៉ះពាល់នឹងគម្រោងនេះ រួមមានដូចជា ផ្លូវលេខ២៧១ ប៉ះផ្ទះ៦ខ្នង វេរ៉ង់ដា៤ខ្នងផ្ទះ សំយ៉ាប២៧ខ្នងផ្ទះ និងបង្គោលភ្លើង១៨ដើម និងបង្គោលបំភ្លឺផ្លូវសាធារណៈ៥ដើម សំរាប់ខណ្ឌ ចំការមន។ប៉ះផ្ទះ៦៧ខ្នងក្រៅពីនោះប៉ះយ៉ាបសង់លយមកលើចិញ្ចើមផ្លូវ ប៉ះបង្គោលភ្លើង២៩ដើមភ្លើងបំភ្លឺសាធារណៈ ២២ដើម និងដើមឈើ ២៥ដើម សំរាប់ខណ្ឌទួលគោក។រីឯក្នុងខណ្ឌមានជ័យ វិញ នឹងប៉ះពាល់ផ្ទះ៣ខ្នង នៅត្រង់ស្ពានបាឡេ ចំណែកត្រង់របងវត្ត យើងអាចកែសំរួលបន្តិច ដោយពង្រីកមកខាងសួនច្បារវិញដើម្បីបញ្ជៀសកុំឲ្យប៉ះរបងវត្ត។
ក្នុងឱកាសនោះដែរ លោក កែប ជុតិមា បានណែនាំដោយកំណត់ឲ្យខណ្ឌទាំងបីទទួលខុសត្រូវស្ថិតិប្រជាពលរដ្ឋទាំងបីខណ្ឌនេះ មិនឲ្យមានការប្រែប្រួលទៀតឡើយ និងធ្វើការស្ទាបស្ទង់ប្រជាពលរដ្ឋពីតំរូវការនៃគោលនយោបាយជារួម ដែលអ្នកភាគច្រើនចង់បាន ។ ចំពោះបញ្ហាដោះស្រាយផលប៉ះពាល់នេះ មិនទាន់អាចសំរេចបានត្រឹមថ្ងៃនេះទេត្រូវប្រជុំជាមួយជំនាញពាក់ព័ន្ធម្តងទៀតដើម្បី កំណត់តំលៃដោះស្រាយគោលនយោបាយទៅតាមប្រភេទនៃការប៉ះពាល់ រួចទើបសុំគោលការណ៍ ទៅក្រសួងសេដ្ឋកិច្ចនិងហិរញ្ញវត្ថុ។ ជាមួយគ្នានេះ លោកក៏ឲ្យទីចាត់ការរៀបចំក្រុងឡើងជាតារាងសិក្សាពីផលប៉ះពាល់មួយ ដើម្បីកំណត់ប្រភេទនិចំណាត់ថ្នាក់ផលប៉ះពាល់នីមួយៗឲ្យបានច្បាស់លាស់ ដើម្បីដាក់ឆ្លងសុំគោលការណ៍ទៅក្រសួងសេដ្ឋកិច្ចនិងហិរញ្ញវត្ថុ ។
គួរបញ្ជាក់ដែរថា មកត្រឹមថ្ងៃទី២៧ សីហា មានប្រជាពលរដ្ឋប្រមាណ១៥គ្រួសារហើយ ដែលស្ម័គ្រចិត្តរុះរើសំយ៉ាបផ្ទះនិងសំណង់លំនៅដ្ឋានរបស់ខ្លួនដែលសង់រំលោភលើផ្លូវសាធារណៈ ៕