រដ្ឋមន្ត្រីសេដ្ឋកិច្ចអាស៊ាន បានចាប់ផ្តើមកិច្ចប្រជុំពេញអង្គ ពិភាក្សាគ្នានៅព្រឹកថ្ងៃទី២៨សីហា ឆ្នាំ២០១២ ដើម្បីពិនិត្យរកមធ្យោបាយ ធ្វើយ៉ាងណាធានាដល់ជោគជ័យនៃការធ្វើសមាហរណកម្មសេដ្ឋកិច្ចអាស៊ាន ព្រមទាំងពង្រឹងសហប្រតិបត្តិការជាមួយប្រទេសជាដៃគូឯកឧត្តម ទេសរដ្ឋមន្រ្តីចម ប្រសិទ្ធ រដ្ឋមន្រ្តីក្រសួងពាណិជ្ជកម្ម និងជាប្រធានអង្គប្រជុំ បានប្រកាសបើកកិច្ចប្រជុំពេញអង្គផែនការ របស់រដ្ឋមន្រ្តីសេដ្ឋកិច្ចអាស៊ាន ជាពិសេសអាស៊ានទាំងមូល គឺចង់ឲ្យប្រទេសជាសមាជិកបង្កើតបានជាតំបន់មួយដែលមានលំហូរដោយសេរី ជាពិសេស ការបង្កើតតំបន់ពាណិជ្ជកម្មសេរី។
ដើម្បីសម្រេចបានផែន ការនេះ ប្រទេសអាស៊ាន ត្រូវដោះស្រាយឲ្យបាន ឬលុបបំបាត់នូវរបាំងពន្ធគយ និងរបាំងមិនមែនពន្ធគយ។
យន្តការ ដែលបានអនុវត្តដើម្បីសម្រេចគោលបំណង នៃការបង្កើតតំបន់ពាណិជ្ជកម្មសេរីអាស៊ាន គឺកិច្ចព្រមព្រៀងស្ដីពីការអនុគ្រោះពន្ធគយរួម ដែលបានចុះហត្ថលេខាដោយរដ្ឋមន្ត្រីសេដ្ឋកិច្ចអាស៊ាន នាខែមករា ឆ្នាំ១៩៩២ នៅប្រទេសសិង្ហបុរី។ កិច្ចព្រមព្រៀងស្ដីពីការអនុគ្រោះពន្ធគយរួមនេះ គ្របដណ្ដប់លើបណ្ដាមុខទំនិញកម្មន្តសាល (Manufactured Goods) ដោយរាប់បញ្ចូលទាំងទំនិញ មូលធន ផលិតផលកសិកម្មកែច្នៃ និងទំនិញមិនមែនកសិកម្មផ្សេងទៀត។
ប្រទេសសមាជិកអាស៊ាន ទាំងអស់ គ្រោងនឹងបញ្ចុះរបាំងពន្ធគយ នៃការនាំចេញ និងនាំចូលក្នុងតំបន់អាស៊ាន ដល់កម្រិតសូន្យ នៅឆ្នាំ២០១៥ ខាងមុខ ដើម្បីឆ្ពោះទៅសម្រេចឲ្យបាននូវការបង្កើតតំបន់ពាណិជ្ជកម្មសេរី អាស៊ាន។ ក្រៅពីបញ្ចុះរបាំងពន្ធគយ តំបន់ពាណិជ្ជកម្មសេរីអាស៊ាន ទាមទារឲ្យប្រទេសសមាជិក បញ្ចុះនូវរបាំងមិនមែនជាសារពើពន្ធជាបណ្ដើរៗផងដែរ។ មានន័យថា ប្រទេសជាសមាជិក ត្រូវលុបបំបាត់ឲ្យអស់នូវការកម្រិតបរិមាណ ដូចជាការកំណត់បរិមាណផលិតផល អាជ្ញាប័ណ្ណ វិធានការរដ្ឋបាល និងការទាមទារនានា។
សម្តេចអគ្គមហាសេនាបតីតេជោហ៊ុន សែន នាយករដ្ឋមន្រ្តីនៃព្រះរាជាណាចក្រកម្ពុជាបានថ្លែងក្នុងពិធីបើក កិច្ចប្រជុំរដ្ឋមន្រ្តីសេដ្ឋកិច្ចអាស៊ានកាលពីថ្ងៃទី២៧ខែសីហាថា ការសម្រេចបាននូវការបង្កើតសហគមន៍សេដ្ឋកិច្ចតែមួយ គឺជាអាទិភាពខ្ពស់បំផុត ដើម្បីប្រែក្លាយអាស៊ានជាទីផ្សារ និងមូលដ្ឋានផលិតតែមួយ មានលំហូរដោយសេរីនូវទំនិញ និងសេវាកម្ម ការវិនិយោគពលករជំនាញ និងលំហូរមូលធនកាន់តែសេរីជាងមុនជាដើម។
សម្តេច បញ្ជាក់ថា អាស៊ានៅតែទទួលបានអធិរាជពាណិជ្ជកម្ម ក្នុងទំហំទឹកប្រាក់ចំនួន៩៨,៥ពាន់លានដុល្លាសហរដ្ឋអាមេរិក កាលពីឆ្នាំ២០១១ ទោះជាមានការធ្លាក់ការនាំចេញក៏ដោយ។ការនាំចេញរបស់អាស៊ានបាន កើនឡើងរហូត១,២៤លាន លានដុល្លា ខណៈដែលការនាំចូលមានទំហំ១,១៥លាន លានដុល្លា ។
នៅ ចំពោះមុខអាស៊ាន កំពុងតែជួបបញ្ហាប្រឈមទាំងកម្រិតសកល និងកម្រិតតំបន់ ដូចជាភាពផុយស្រួយនៃការងើបឡើងសេដ្ឋកិច្ចនៅប្រទេសកំពុងអភិវឌ្ឍ ន៍ គួបផ្សុំនឹងការអូសបន្លាយនៃវិបត្តិប្រាក់បំណុលនៅប្រទេសប្រើ ប្រាស់ប្រាក់យូរ៉ូ វិបត្តិនយោបាយ និងសង្គមនៅប្រទេសក្នុងតំបន់មជ្ឈឹមបូព៌ា និងអាហ្វ្រិកខាងជើង បញ្ហាតំលៃប្រេង បញ្ហាសន្តិសុខ និងថាមពល ការប្រែប្រួលអាកាសធាតុ គ្រោះមហន្តរាយធម្មជាតិ ភេរវកម្ម និងឧក្រឹដ្ឋឆ្លងដែន ជាដើម។
សម្តេច បានបញ្ជាក់ថា គំលាតនៃការអភិវឌ្ឍន៍ ក្នុងចំណោមប្រទេសបណ្តារសមាជិកអាស៊ានបានថយចុះគួរអោយកត់សំគាល់ក៏ ដោយ ក៏គំលាតនេះ នៅតែមានទំហំធំនៅឡើយ ដែលជាការគំរាមដល់សេដ្ឋកិច្ចនៅតំបន់អាស៊ានទាំងមូល។
គួរបញ្ជាក់ថា ចាប់តាំងពីដើមឆ្នាំ២០១០មក ប្រទេសសមាជិកអាស៊ានចំនួន៦ រួមមានប្រទេសប្រ៊ុយណេ ឥណ្ឌូណេស៊ី ហ្វីលីពីន ថៃ សិង្ហបុរី និងម៉ាឡេស៊ី បានលុបពន្ធនាំចូលលើផលិតផលមានប្រភពនៅក្នុងអាស៊ាន អស់ជាង៩៩% នៃផលិតផលជាប់ពន្ធ។ប្រទេសកម្ពុជា ឡាវ វៀតណាម ភូមា (មីយ៉ាន់ម៉ា) បានបន្ថយពន្ធគយមកត្រឹម០ទៅ៥% លើប្រភេទផលិតផលជាង៩៨%ដែលជាប់ពន្ធ៕