បន្ទាប់ពីបញ្ចប់ជំនួបនោះ លោក កុយ គួង អ្នកនាំពាក្យក្រសួងការបរទេស បានប្រាប់ក្រុមអ្នកកាសែតថា លោក Tuvdendorj JANABAZAR បានជម្រាបជូនលោកឧបនាយករដ្ឋមន្ត្រី ហោ ណាំហុង អំពីការទទួលតែងតាំងពីរដ្ឋាភិបាលម៉ុងហ្គោលី ចាត់តាំងឲ្យលោក មកបំពេញបេសកកម្មការទូតប្រចាំនៅកម្ពុជា។ នៅក្នុងជំនួបនោះ លោកឧបនាយករដ្ឋមន្ត្រី បានមានប្រសាសន៍ថា វត្តមានរបស់លោក Tuvdendorj JANABAZAR នៅកម្ពុជានាពេលនេះ ដើម្បីពង្រឹងទំនាក់ទំនងការទូតជាមួយគ្នាឲ្យកាន់តែរឹងមាំ និងបន្តកិច្ចសហប្រតិបត្តិការបន្ថែមទៀត។
លោក កុយ គួង បានបន្តថា នៅក្នុងកិច្ចប្រជុំនោះ ភាគីទាំងពីរ ក៏បានបញ្ជាក់ថា កន្លងមកបើទោះបីជាមានទំនាក់ទំនងការទូតជាមួយគ្នា ប៉ុន្តែទំហំពាណិជ្ជកម្ម វិនិយោគ ទេសចរណ៍ នៅមានទំហំតិចតួច មិនខ្លាំងក្លាដូចទំនាក់ទំនងការទូតទេ។
នៅក្នុងជំនួបនោះដែរ លោកកុយគួង បានបញ្ជាក់ថា ភាគីទាំងបានជំរុញឲ្យមានការផ្លាស់ប្ដូរដំណើរទស្សនកិច្ចជាន់ខ្ពស់។ ជាមួយគ្នានោះ លោកឧបនាយករដ្ឋមន្ត្រី ហោ ណាំហុង ក្នុងនាមរាជរដ្ឋាភិបាលកម្ពុជា នឹងអញ្ជើញនាយករដ្ឋមន្ត្រីប្រទេសម៉ុងហ្គោលី និងរដ្ឋមន្ត្រីការបរទេសម៉ុងហ្គោលី មកបំពេញទស្សនកិច្ចជាផ្លូវការនៅកម្ពុជា ក្នុងពេលវេលាសមរម្យណាមួយ។
លោក កុយ គួង បានបន្តថា ភាគីទាំងពីរ ជំរុញឲ្យមានការជួបពិភាក្សាញឹកញ៉ាប់រវាងមន្ត្រីការបរទេស នៃប្រទេសទាំងពីរ ដើម្បីធ្វើឲ្យកិច្ចសហប្រតិបត្តិការរវាងប្រទេសទាំងពីរកាន់តែរឹងមាំ ។ ជាមួយគ្នានោះ ក៏ជំរុញឲ្យមានជំនួបពិភាក្សារវាងសភាពាណិជ្ជកម្មកម្ពុជា ជាមួយនឹងអ្នកវិនិយោគម៉ុងហ្គោលី និងស្នើឲ្យអ្នកវិនិយោគម៉ុងហ្គោលី មកកម្ពុជា ដើម្បីសិក្សាពីសក្ដានុពលកម្ពុជា និងជួបជាមួយក្រុមពាណិជ្ជករកម្ពុជា ហើយនិងស្នើឲ្យសភាពាណិជ្ជកម្មកម្ពុជា ទៅម៉ុងហ្គោលីសិក្សាពីសក្ដានុពលវិនិយោគ នៅប្រទេសម៉ុងហ្គោលីផងដែរ។
លោក កុយ គួង បានបន្តទៀតថា លោក Tuvdendorj JANABAZAR បានបញ្ជាក់ថា ម៉ុងហ្គោលី ផ្ដល់អាហារូបករណ៍ដល់និស្សិតកម្ពុជា មួយឆ្នាំពីរនាក់ ពីព្រោះអាហារូបករណ៍នេះ ម៉ុងហ្គោលីធ្លាប់បានផ្ដល់ឲ្យនិស្សិតកម្ពុជា តាំងពីឆ្នាំ១៩៨២មក។
លោក កុយ គួង បានបន្ថែមថា នៅក្នុងជំនួបនោះដែរ ភាគីទាំងពីរបានព្រមព្រៀងចុះហត្ថលេខាលើកលែងទិដ្ឋាការ លិខិតឆ្លងដែនការទូត និងផ្លូវការ ដែលចុះហត្ថលេខាដោយលោក ឡុង វិសាលោ រដ្ឋលេខាធិការក្រសួងការបរទេស ជាមួយនឹងលោកឯកអគ្គរដ្ឋទូត Tuvdendorj JANABAZAR នៃប្រទេសម៉ុងហ្គោលី។
លោក កុយ គួង បានបញ្ជាក់ទៀតថា នៅថ្ងៃអនាគត រដ្ឋាភិបាលនៃប្រទេសទាំងពីរ នឹងពិចារណា ចុះហត្ថលេខាលើកិច្ចព្រមព្រៀងលើកលែងទិដ្ឋាការធម្មតា សម្រាប់ជំរុញលំហូរភ្ញៀវទេសចរ នៃប្រទេសទាំងពីរឲ្យកាន់តែច្រើនឡើងថែមទៀត៕