ភ្នំពេញ:
លោកមេធាវី សុក សំអឿន
ប្រធានអង្គការក្រុមអ្នកច្បាប់ការពារសិទ្ធិកម្ពុជា
និងជាមេធាវីការពារក្តីរបស់លោក ម៉ម សូណង់ដូ
បានឲ្យដឹងនៅរសៀលថ្ងៃទី២៧ ខែសីហា ឆ្នាំ២០១២ ថា
លោកបានត្រៀមឯកសាររួចរាល់អស់ហើយ ដើម្បីឡើងតតាំង
ការពារក្តីលោកម៉មសូណង់ដូ ប្រធានសមាគមអ្នកប្រជាធិបតេយ្យ
និងជានាយកវិទ្យុសំបុកឃ្មុំ នៅថ្ងៃទី១១ ខែកញ្ញា ឆ្នាំ២០១២។ លោក
ម៉មសូណង់ដូ ជាប់ចោទក្នុងរឿងជម្លោះដីធ្លី បង្កើតតំបន់អបគមន៍
នៅខេត្តក្រចេះ។
លោកមេធាវី សុក សំអឿន បានមានប្រសាសន៍ថា
ការកំណត់ពេលសវនាការដ៏ឆាប់រហ័ស លើករណីលោកម៉មសូណង់ដូ នាថ្ងៃទី១១
ខែកញ្ញា ឆ្នាំ២០១២ ជាការល្អ ដោយបានឆាប់ដូច្នេះ។
លោកមេធាវីបានត្រៀមខ្លួនរួចអស់ហើយ។
លោកមេធាវី សុក សំអឿន
បានបញ្ជាក់ថា "រឿងនេះ មិនមានភស្តុតាងចោទប្រកាន់អីទេ
ដោយគ្រាន់តែមានមនុស្សឆ្លើយដាក់ ( ឆ្លើយដាក់លោកម៉មសូណង់ដូ )
ហើយតុលាការ ចេះតែចោទដែរ។ ចំណុចនេះ ដូចជា ជ្រុលហួស
ក្នុងការចោទប្រកាន់នោះ វាដូចជាអត់មានភស្តុតាងអីសោះ។
គ្រាន់តែមនុស្សឆ្លើយដាក់ ហើយឆ្លើយដាក់ ឮគេថា ទៅទៀត"។
ជាមួយនឹងការលើកឡើងដូច្នេះ លោកមេធាវី សុក សំអឿន ក៏បានបន្ថែមថា
បើសិនជាចៅក្រមសម្រេចផ្តន្ទាទោសតាមបទចោទប្រកាន់ ក្នុង ៤ ករណី
ពាក់ព័ន្ធនឹងជម្លោះដីធ្លី នៅភូមិប្រម៉ា ឃុំកំពង់ដំរី ស្រុកឆ្លូង
ខេត្តក្រចេះ ដែលរដ្ឋាភិបាលចោទថា ពលរដ្ឋ
ដែលជាតំណាងរបស់សមាគមអ្នកប្រជាធិបតេយ្យ បង្កើតតំបន់អបគមន៍នោះ
គឺលោកម៉មសូណង់ដូ ត្រូវប្រឈមនឹងការជាប់ពន្ធនាគារសរុបដល់ទៅ ៣០
ឆ្នាំ។
មានអាយុ ៧២ ឆ្នាំ លោក ម៉ម សូណង់ដូ
ប្រធានសមាគមអ្នកប្រជាធិបតេយ្យ និងជានាយកវិទ្យុសំបុកឃ្មុំ
ត្រូវបានប៉ូលិស ចាប់ខ្លួនកាលពីថ្ងៃទី១៥ ខែកក្កដា ឆ្នាំ២០១២
ក្រោមបទចោទប្រកាន់ ៤ ករណី ពាក់ព័ន្ធនឹងការនៅពីក្រោយហេតុការណ៍
ដែលរដ្ឋាភិបាល បានចោទប្រកាន់ក្រុមអ្នកភូមិ
ដែលជាសាខាសមាគមអ្នកប្រជាធិបតេយ្យ នៅភូមិប្រម៉ា ឃុំកំពង់ដំរី
ស្រុកឆ្លូង ខេត្តក្រចេះ ថា បានចាប់ដីខុសច្បាប់
និងបង្កើតតំបន់អបគមន៍។
ក៏ប៉ុន្តែលោកម៉មសូណង់ដូ
និងសាខាប្រធានសមាគមអ្នកប្រជាធិបតេយ្យ នៅខេត្តក្រចេះ ឈ្មោះ ប៊ុនរដ្ឋា
ដែលជាប់ចោទ និងបានរត់គេចខ្លួន បានបដិសេធរាល់ការចោទប្រកាន់។
លោក ម៉ម សូណង់ដូ ត្រូវបានជាប់ឃុំឃាំងក្នុងពន្ធនាគារព្រៃស
ក្នុងជាយទីក្រុងភ្នំពេញ និងបានធ្លាក់ខ្លួនឈឺជាញឹកញាប់។
ប៉ុន្តែនៅរសៀលថ្ងៃចន្ទនេះ លោក សុក សំអឿន បានបញ្ជាក់ថា លោក ម៉ម
សូណង់ដូ បានធូរស្រាលវិញហើយ៕