ខេត្តសៀមរាប:
រដ្ឋមន្ត្រីសេដ្ឋកិច្ច កម្ពុជា ភូមា ឡាវ និងវៀតណាម
បានចាប់ផ្តើមប្រជុំ កាលពីរសៀលថ្ងៃទី២៦ ខែសីហា ឆ្នាំ២០១២
ដើម្បីរិះរកមធ្យោបាយឆ្ពោះទៅកាន់ការកាត់បន្ថយគម្លាតសេដ្ឋកិច្ច
នៅក្នុងចំណោមសមាជិកអាស៊ានទាំង១០ប្រទេស។
លោក ចម ប្រសិទ្ធ
រដ្ឋមន្ត្រីពាណិជ្ជកម្ម
ដែលជាប្រធានកិច្ចប្រជុំរដ្ឋមន្ត្រីសេដ្ឋកិច្ចអាស៊ាន បានឲ្យដឹងថា
រដ្ឋមន្ត្រីសេដ្ឋកិច្ច CLMV (កម្ពុជា ឡាវ ភូមា និងវៀតណាម) បានជួបគ្នា
កាលពីរសៀលថ្ងៃអាទិត្យ ទី២៦ ខែសីហា ឆ្នាំ២០១២
ដើម្បីពិនិត្យមើលលើកជាគម្រោង អោយមានការជួយដល់ប្រទេសទាំងបួន
ដែលមានសមាជិកថ្មី និងមានកម្រិតសេដ្ឋកិច្ចទាបជាងសមាជិក ៦
ប្រទេសផ្សេងទៀត ក្នុងសមាគមអាស៊ានទាំង ១០ ប្រទេស។
លោក ចម
ប្រសិទ្ធ បានបន្ថែមថា យើងមានបំណងធ្វើយ៉ាងណា
នៅពេលដែលមានសហគមន៍សេដ្ឋកិច្ចអាស៊ាន នៅឆ្នាំ២០១៥
គម្លាតសេដ្ឋកិច្ចរវាងសមាជិកចាស់ និងថ្មី មានកម្រិតទាប
ដើម្បីធ្វើយ៉ាងណា កុំអោយមានការរំជើបរំជួលនៅក្នុងសង្គម។
កិច្ចប្រជុំរដ្ឋមន្ត្រីសេដ្ឋកិច្ចអាស៊ាន នឹងត្រូវចាប់ផ្តើម
នៅថ្ងៃចន្ទ ដោយក្នុងនោះ សម្តេចតេជោហ៊ុនសែន
នឹងអញ្ជើញចូលរួមបើកកិច្ចប្រជុំដោយផ្ទាល់។
លោក ចម ប្រសិទ្ធ
បានបន្ថែមថា បន្ទាប់ពីនោះ នឹងមានកិច្ចប្រជុំ
រដ្ឋមន្ត្រីសដ្ឋកិច្ចអាស៊ាន
និងកិច្ចប្រជុំរដ្ឋមន្ត្រីសេដ្ឋកិច្ចអាស៊ាន ជាមួយដៃគូចរចា
និងកិច្ចប្រជុំពាក់ព័ន្ធជាច្រើនទៀត៕