មុននឹងកិច្ចប្រជុំរដ្ឋមន្ត្រីសេដ្ឋកិច្ចអាស៊ានបានចាប់ផ្តើម ប្រារព្ធពិធីបើកជាផ្លូវការ នៅសណ្ឋាគារអប្សរាអង្គរ ក្រុងសៀមរាប, ព្រឹកថ្ងៃទី២៧សីហានេះ សម្តេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជា បានអនុញ្ញាតឲ្យឯកឧត្តម ហ្វាន់ស៊ី ហ្គែរី អគ្គនាយកអង្គការកម្មសិទ្ធិបញ្ញាពិភពលោក ចូលជួបសំដែងការគួរសម។ ឯកឧត្តម ហ្វាន់ស៊ី ហ្គែរី បានសំដែងនូវការអបអរសាទរចំពោះជោគជ័យទាំងឡាយដែល កម្ពុជាទទួលបាន ជាពិសេសលើវិស័យសេដ្ឋកិច្ច ។លោកក៏បានគោរពជំរាបជូនសម្តេច ថា កម្មសិទ្ធិបញ្ញាគឺជាបញ្ហាដែលមានភាពទូលំទូលាយ ហើយគ្មានគំរូណាមួយដែលជា គំរូត្រឹមត្រូវនោះទេ។ដូច្នេះ ឯកឧត្តមនឹងបន្តជួយដល់កម្ពុជាទៀត ដើម្បីចូលទៅក្នុងកិច្ច សន្យា ឬ អនុសញ្ញាអន្តរជាតិពាក់ព័ន្ធនឹងបញ្ហាកម្មសិទ្ធិបញ្ញានេះ។
ជាការឆ្លើយតប សម្តេចតេជោបានវាយតម្លៃខ្ពស់ចំពោះការគាំទ្ររបស់អង្គការពិភព លោក ពាក់ព័ន្ធនឹងកម្មសិទ្ធិបញ្ញាដោយសម្តេចបានបញ្ជាក់ថា កម្ពុជាបាន ផ្តោតការយកចិត្តទុកដាក់យ៉ាងខ្លាំងទៅលើបញ្ហាកម្មសិទ្ធិបញ្ញា ហើយកំពុងតែធ្វើការងារ ដទៃទៀត ដើម្បីចូលនៅក្នុងរាល់កិច្ចព្រមព្រៀង និងអនុសញ្ញាដទៃទៀតដែលពាក់ព័ន្ធនឹងកម្ម សិទ្ធិបញ្ញានេះ។សម្តេចបានបន្តថា តាំងពីអាណត្តិទី២មក គឺនៅក្នុងមុំទី២នៃយុទ្ធសាស្ត្រ ត្រីកោណរបស់រាជរដ្ឋាភិបាល កម្ពុជាបានប្តេជ្ញាចិត្តធ្វើសមាហរណកម្មខ្លួនចូលទៅក្នុង អង្គការពិភពលោក ។សម្តេចបានស្នើសុំឲ្យឯកឧត្តម ហ្វាន់ស៊ីហ្គែរី បន្តជួយដល់កម្ពុជា ឲ្យបានចូលទៅក្នុងកិច្ចព្រមព្រៀង និងអនុសញ្ញាដទៃទៀត ដែលពាក់ព័ន្ធនឹងកម្មសិទ្ធិ បញ្ហានេះ៕
បន្ទាប់មក សម្តេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រី នៃព្រះរាជាណាចក្រកម្ពុជា ក៏បានអនុញ្ញាតឲ្យបណ្តា រដ្ឋមន្ត្រី សេដ្ឋកិច្ចអាស៊ាន ដឹកនាំដោយឯកឧត្តម ប៉ាហ៊ីម ប៉ាតុលីម ចាតុសេង រដ្ឋមន្ត្រី នៃក្រសួងការបរទេស និងពាណិជ្ជកម្ម មីយ៉ាន់ម៉ា ចូលជួបសំដែងការគួរសមផងដែរ។
ឯកឧត្តម ចាតុសេង បានថ្លែងអំណរគុណយ៉ាងជ្រាលជ្រៅចំពោះសម្តេចតេជោ នាយករដ្ឋមន្ត្រីដែលបានអនុញ្ញាតឲ្យប្រតិភូរដ្ឋមន្ត្រីសេដ្ឋ កិច្ចអាស៊ាន បានចូលជួបសំដែងការគួរសម និងបានសំដែងនូវការអបអរសាទរចំពោះកំណើនសេដ្ឋកិច្ចនៅកម្ពុជា និងសាទរចំពោះជោគ ជ័យដែលកម្ពុជាទទួលបានក្នុងកិច្ចប្រជុំនារយៈពេលកន្លងមក។ ឯកឧត្តម បានបន្តថា អាស៊ាន មានភ័ព្វសំណាងណាស់ ដែលមានប្រធាន មានលទ្ធភាពក្នុងការដឹកនាំលើវិស័យ សេដ្ឋកិច្ច។
សម្តេចតេជោ បានវាយតម្លៃខ្ពស់ចំពោះវត្តមានរបស់ប្រតិភូ រដ្ឋមន្ត្រីសេដ្ឋកិច្ចអាស៊ាន ទាំងអស់ដែលបានមកចូលរួមកិច្ចប្រជុំនៅពេលនេះ សម្តេចក៏បានថ្លែងអំណរគុណ ដល់ឯកឧត្តម ចម ប្រសិទ្ធ ដែលបានរៀបចំ និងដឹកនាំកិច្ចប្រជុំនេះ បានយ៉ាងល្អប្រសើរ។ សម្តេចបានមានប្រសាសន៍ថា គប្បីគឺផ្តោតការយកចិត្តទុកដាក់ ទៅលើការស្វែងរកនូវកត្តា សំខាន់ៗដែលពាក់ព័ន្ធនឹងសេដ្ឋកិច្ច ហើយអាស៊ានកន្លងមកគឺមានកំណើនសេដ្ឋកិច្ចគួរឲ្យកត់សំគាល់ទោះជា មានភាពទន់ខ្សោយផ្នែកសេដ្ឋកិច្ចនៅសហរដ្ឋអាមេរិកនិងសហគមន៍ អ៊ឺរ៉ុប យ៉ាងណាក៏ដោយ ។សម្តេចបានមានប្រសាសន៍ថា ទោះជាយ៉ាងណាក៏ដោយចាប់ពីពេលនេះ រហូតដល់ឆ្នាំ២០១៥ គឺនៅមិនឆ្ងាយប៉ុន្មានទេ ហើយនៅមានកិច្ចការជាច្រើន ដែលនៅសេសសល់ ដូច្នេះសម្តេចបានលើកទឹកចិត្តឲ្យរដ្ឋមន្ត្រីសេដ្ឋកិច្ចអាស៊ាន ទាំងអស់គឺធ្វើយ៉ាងណាសំរេចឲ្យបាននូវគោលដៅ ឆ្ពោះទៅកាន់សហគមន៍អាស៊ាននៅឆ្នាំ២០១៥ឲ្យ បានជោគជ័យ៕