ដោយ ៖ វណ្ណៈ
ខេត្តកំពង់ចាម ៖ កាលពីព្រឹកថ្ងៃទី២៨ ខែសីហា ឆ្នាំ២០១២ នៅសាលប្រជុំនៃស្នងការដ្ឋាន នគរបាលខេត្តកំពង់ចាមមានរៀបចំពិធីបើកវគ្គបណ្តុះបណ្តាលជំនាញស្វែងយល់លើក្រមព្រហ្មទណ្ឌក្រមនីតិវិធីព្រហ្មទណ្ឌ ដែលមានរយៈពេល២ថ្ងៃ គឺថ្ងៃទី២៨-២៩ ខែសីហា ឆ្នាំ២០១២ ។
ចូលរួមជាគណៈអធិបតីក្នុងឱកាសនោះមានលោកឧត្តមសេនីយ៍ត្រី ជា ប៊ុនថុល តំណាង ប្រធាននាយកដ្ឋានកណ្តាលនគរបាលព្រហ្មទណ្ឌ និងលោកឧត្តមសេនីយ៍ត្រី ឆាយ គឹមសុន ស្នងការនគរបាលខេត្តកំពង់ចាម និងលោកវរសេនីយ៍ឯក ព្រុំ សន្ធរ អនុប្រធាននាយកដ្ឋាន នគរបាលព្រហ្មទណ្ឌ តំណាងអោយគំរោងជំនួយផ្នែកព្រហ្មទណ្ឌ និងយុត្តិធម៌នៅកម្ពុជា និងលោក លោកស្រី ស្នងការរង មួយចំនួនទៀត ។ ចំពោះមន្ត្រីនគរបាលទាំងអស់ដែលចូលរួមវគ្គបណ្តុះបណ្តាលថ្ងៃនេះមានចំនួន៧០នាក់ មានតាំងពីថ្នាក់ស្នងការរង រហូតដល់មន្ត្រីមូលដ្ឋាន ជាពិសេស នាយការិយាល័យរងការិយាល័យព្រហ្មទណ្ឌកំរិតស្រាល និងកំរិតធ្ងន់ នៃស្នងការនគរបាលខេត្ត និងអធិការ អធិការរងទាំង១៧ស្រុក ក្រុង ចំណុះអោយស្នងការនគរបាលខេត្ត និងមាននាយប៉ុស្តិ៍ នាយរងប៉ុសិ៍្តក្នុងក្រុងកំពង់ចាម និងនៅជិតៗក្រុងក៏បានចូលរួមក្នុងវគ្គបណ្តុះបណ្តាលនេះដែរ ។
លោកឧត្តមសេនីយ៍ត្រី ឆាយ គឹមសុន បានមានប្រសាសន៍ឱ្យដឹងថា ក្នុងឆ្នាំ២០១២នេះ អគ្គស្នងការដ្ឋាននគរបាលជាតិ និងនាយកដ្ឋានកណ្តាលយុត្តិធម៌ សហការជាមួយនគរបាលសហពន្ធ័ អូស្ត្រាលីប្រចាំកម្ពុជា និងគំរោងCCJAP បានយកចិត្តទុកដាក់បើកវគ្គបណ្តុះបណ្តាលដល់មន្ត្រីស្នង ការដ្ឋាននគរបាលខេត្តកំពង់ចាម បានចំនួន៣លើកមកហើយ គឺទី១-វគ្គបណ្តុះបណ្តាលគ្រូបង្គោលការពារកន្លែងកើតហេតុព្រហ្មទណ្ឌដែលមានរយៈពេល៣ថ្ងៃ និងមានមន្ត្រីនគរបាលចូលរួមចំនួន២៥នាក់ ទី២-វគ្គបណ្តុះបណ្តាលស្តីពីការពង្រឹងនគរបាលប៉ុស្តិ៍រដ្ឋបាលដើម្បីសុវត្ថិភាពសហគមន៍មានរយៈពេល២ថ្ងៃ មានមន្ត្រីនគរបាលចូលរួម៤១នាក់ និងទី៣-វគ្គបណ្តុះបណ្តាលជំនាញ គ្រប់គ្រងកន្លែងកើតហេតុព្រហ្មទណ្ឌរយៈពេល៥ថ្ងៃ មានមន្ត្រីនគរបាលចូលរួម ចំនួន៣០នាក់ ។ លោកងឧត្តមសេនីយ៍ស្នងការបានមានប្រសាសន៍បន្ថែមទៀតថា ជាមួយនោះស្នងការដ្ឋាននគរបាល ខេត្តកំពង់ចាម បានទទួលនូវឧបករណ៍សម្ភារបច្ចេកទេសបំរើឱ្យការងារជំនាញខាងលើនេះពីនគរបាលសហព័ន្ធអូស្រា្តលីប្រចាំនៅកម្ពុជា និងគំរោង CCJAP មួយចំនួនធំផងដែរ ។ លោកឧត្តមសេនីយ៍ស្នងការក៏បានមានប្រសាសន៍បញ្ជាក់ទៀតថា នេះជាលើកទី៤ហើយ ដែលអគ្គស្នងការដ្ឋាន នគរបាលជាតិ និងនាយកដ្ឋាននគរបាលកណ្តាលយុត្តិធម៌ ពិសេសនាយកដ្ឋាននគរបាលព្រហ្មទណ្ឌ សហការជាមួយគំរោងជំនួយផ្នែកព្រហ្មទណ្ឌ និងយុត្តិធម៌នៅកម្ពុជា ហៅកាត់ថា CCJAP បានរៀបចំ បើកវគ្គបណ្តុះបណ្តាលក្រមព្រហ្មទណ្ឌ ក្រមនីតិវិធីព្រហ្មទណ្ឌ និងធាតុផ្សំនៃបទល្មើសឧក្រិដ្ឋទាំង៣ ដែលយើងដំណើរការបើកវគ្គពិធីនាថ្ងៃនេះ ។
លោកឧត្តមសេនីយ៍ត្រីស្នងការបានមានប្រសាសន៍បន្តទៀតថា ថ្ងៃនេះជំនួសមុខឱ្យស្នងការ ដ្ឋាននគរបាលខេត្តកំពង់ចាម លោកមានសេចក្តីសោមនស្ស និងក្តីសង្ឃឹមយ៉ាងមុតមាំថា វគ្គបណ្តុះបណ្តាលជំនាញក្រមព្រហ្មទណ្ឌ ក្រមនីតិវិធីព្រហ្មទណ្ឌ ធាតុផ្សំនៃបទល្មើសឧក្រិដ្ឋទាំង៣ដែលនឹង ដំណើរការនាពេលបន្តិចទៀតនេះ ពិតជាធ្វើអោយមន្ត្រីនគរបាលទាំង៧០នាក់ បង្កើនបាននូវចំណេះដឹងថ្មីៗ បន្ថែមមួយកំរិតទៀត ដើម្បីបំរើការឱ្យកិច្ចការស្រាវជ្រាវស៊ើបអង្កេតបានច្បាស់លាស់តាមនីតិវិធី ៕
