ប្រជាពលរដ្ឋរងគ្រោះដោយបាក់ច្រាំងទន្លេចំនួន៦៣គ្រួសារ នៅស្រុកកង មាស បានទទួលអំណោយពីគណៈកម្មាធិការគ្រប់គ្រងគ្រោះមហន្តរាយ និងអំណោយកាកបាទក្រហមកម្ពុជា តាមរយៈឯកឧត្ដម លន់ លឹមថៃ អភិបាលខេត្ត និងជាប្រធានគណៈកម្មាធិការគ្រប់គ្រងគ្រោះមហន្តរាយខេត្តកំពង់ចាម កាលពី ថ្ងៃទី១១ខែសីហា ឆ្នាំ២០១៤។
លោក មឿន ផា អភិបាលស្រុកកងមាសបានរាយការណ៍ថា ភូមិសាស្ត្រ របស់ស្រុកកងមាស ស្ថិតនៅតាមបណ្ដោយដងទន្លេមេគង្គបានធ្វើឲ្យស្រុកងាយ រងឥទ្ធិពលពីទឹកជំនន់ ។ ជាក់ស្ដែងទឹកជំនន់បានធ្វើឲ្យប៉ះពាល់ប្រជាពលរដ្ឋ១១ ឃុំស្មើនឹង៣.៦៨៥គ្រួសារ មាន៣.២២៤ខ្នងផ្ទះស្មើនឹងមនុស្ស១៥.៧៨៥នាក់ ប្រ ជាពលរដ្ឋចំនួន៦៣គ្រួសារបានផ្លាស់ទៅកាន់ទីទួលសុវត្ថិភាព លិចផ្លូវកៅស៊ូ ប្រវែង៣៥០ម៉ែត្រ ផ្លូវក្រួសក្រហមប្រវែង៧.៤៥១ម៉ែត្រ វត្តចំនួន៣វិហារឥស្លាម ១ សាលារៀន១៩ខ្នងអាគារសាលាឃុំ១កន្លែង ។ ដោយឡែកឃុំសូរគង់ និងឃុំ ពាមជីកង មានប្រជាពលរដ្ឋរងគ្រោះដោយសារបាក់ច្រាំងទន្លេ ធ្វើឲ្យស្រុតផ្ទះ និងបានរុះរើផ្ទះចំនួន៦៣គ្រួសារ។
ឯកឧត្ដម លន់ លឹមថៃ បានបានពាំនាំនូវប្រសាសន៍សាកសួរសុខទុក្ខពី សំណាក់សម្តេចប្រមុខរាជរដ្ឋាភិបាលកម្ពុជា និងសម្ដេចកិត្តិព្រឹទ្ធបណ្ឌិត ប៊ុន រ៉ានី ហ៊ុន សែន ប្រធានកាកបាទក្រហមកម្ពុជា ជូនចំពោះប្រជាពលរដ្ឋរងគ្រោះទាំង និងសម្ដែងនូវការសោកស្ដាយជាខ្លាំងចំពោះប្រជាពលរដ្ឋ ដែលបានរងគ្រោះ ដោយធម្មជាតិ ជាពិសេសប្រជាពលរដ្ឋដែលបានរងផលប៉ះពាល់ដោយសារ បាក់ច្រាំង ស្រុតផ្ទះ និងបានរើផ្ទះទាំង៦៣គ្រួសារនៅក្នុងឃុំទាំងពីរនេះ។
ឯកឧត្ដមអភិបាលខេត្តមានប្រសាសន៍ថា ប្រជាពលរដ្ឋដែលរស់នៅតាម ដងទន្លេតែងតែទទួលរងគ្រោះដោយទឹកជំនន់ជារៀងរាល់ឆ្នាំ ។ ទឹកជំនន់បានធ្វើ ឲ្យមានការខូចខាតផលដំណាំ បំផ្លិចបំផ្លាញទ្រព្យសម្បត្តិ ផ្ទះសម្បែង សត្វ ពាហនៈ និងអាយុជីវិតមនុស្ស សត្វទៀតផង ។ ឯកឧត្ដមបានផ្ដាំផ្ញើចំពោះ បងប្អូនប្រជាពលរដ្ឋ សូមមានការប្រុងប្រយ័ត្នចំពោះហេតុការណ៍ផ្សេងៗដែល ធ្វើឲ្យប៉ះពាល់ដល់អាយុជីវិត ពិសេសប្រុងប្រយ័ត្នខ្ពស់ចំពោះកុមារ ជនពិការ ចាស់ជរាផងដែរ ហើយទាំងអស់គ្នាក៏ត្រូវចូលរួមចំណែកអនុវត្តន៍ និងគោរព ច្បាប់ចរាចរណ៍ និងអនុវត្តន៍គោលនយោបាយភូមិឃុំមានសុវត្ថិភាពផងដែរ។
អំណោយដែលផ្ដល់ជូនដល់គ្រួសាររងគ្រោះទាំង៦៣គ្រួសារ ក្នុងមួយ គ្រួសារៗទទួលបានអង្ករ៥០គីឡូក្រាម មី១កេសតូច ត្រីខ១០កំប៉ុង និងឃីត១ កញ្ចប់ ដែលរួមមាន ក្រមា១មុង១និងសារុង១ស័ង្កសី១៥សន្លឹក និងថវិកា១៥ម៉ឺន រៀល ៕
ដោយ ឆាយ ម៉ុត