នៅសាលាខេត្តបាត់ដំបងនាព្រឹកថ្ងៃទី១២ខែសីហា ឆ្នាំ២០១៤បានប្រារព្ធពិធីប្រកាសតែងតាំង និងប្រគល់ភារកិច្ចនាយក នាយករងរដ្ឋបាល នាយក នាយករងទីចាត់ការ ប្រធាន អនុប្រធានការិយាល័យក្នុងសាលាខេត្តបាត់ដំបងចំនួន២០រូប ក្រោមអធិបតីភាពឯកឧត្តម ច័ន្ទ សុផល អភិបាលខេត្ត បាត់ដំបង។
បន្ទាប់ពីលោក សុត សុផុន ប្រធានការិយាល័យគ្រប់គ្រងបុគ្គលិក នៃទីចាត់ការគ្រប់គ្រងធន ធានមនុស្សសាលាខេត្តបានអានសេចក្តីប្រកាសតែងតាំងរបស់ក្រសួងមហាផ្ទៃរួចមកឯកឧត្តម ច័ន្ទ សុផល បានមានប្រសាសន៍ថា ក្នុងនាមរដ្ឋបាលខេត្ត និងក្នុងនាមខ្លួនខ្ញុំផ្ទាល់ ខ្ញុំសូមថ្លែងនូវការកោត សរសើរ និងវាយតម្លៃខ្ពស់ចំពោះការរៀបចំកម្មវិធីដ៏មានសារៈសំខាន់នេះ។
ឯកឧត្តមអភិបាលខេត្តមានប្រសាសន៍ថា ការតែងតាំងមន្ត្រីជាន់ខ្ពស់ក្នុងរចនាសម្ព័ន្ធសាលា ខេត្តនាពេលនេះ ត្រូវបានធ្វើឡើងដោយអនុលោមទៅតាមច្បាប់ស្តីពីការគ្រប់គ្រងរដ្ឋបាលរាជធានី ខេត្ត ក្រុង ស្រុក ខណ្ឌ និងស្របតាមអនុក្រឹត្យលេខ២១៦របស់រាជរដ្ឋាភិបាលស្តីពីតួនាទី ភារកិច្ច និង ទំនាក់ទំនងការងាររបស់ក្រុមប្រឹក្សា គណៈអភិបាលខេត្ត ក្រុមប្រឹក្សា គណៈអភិបាលក្រុង និងក្រុម ប្រឹក្សា គណៈអភិបាលស្រុក ។
ឯកឧត្តម ច័ន្ទ សុផល មានប្រសាសន៍ថា ខ្ញុំសូមសម្តែងនូវមនោ សញ្ចេតនាអបអរសាទរចំពោះអស់លោក លោកស្រី ដែលត្រូវបានប្រកាសតែងតាំង និងប្រគល់ភារ កិច្ចនាពេលនេះត្រូវបានរៀបចំស្របពេល ដែលរាជរដ្ឋាភិបាលកម្ពុជាក្រោមការដឹកនាំដ៏ឈ្លាសវៃត្រឹម ត្រូវប្រកបដោយគតិបណ្ឌិតរបស់សម្តេចអគ្គមហាសេនាបតីតេជោ ហ៊ុន សែន ជាប្រមុខដឹកនាំបាន យកចិត្តទុកដាក់បន្តអនុវត្តន៍យ៉ាងសកម្ម ដើម្បីសម្រេចបានជោគជ័យយុទ្ធសាស្ត្រចតុកោណដំណាក់ កាលទី៣ ដើម្បីកំណើនការងារ សមធម៌ និងប្រសិទ្ធភាព ដែលជារបៀបវារៈនយោបាយសង្គម និងសេដ្ឋកិច្ច នៃកម្មវិធីនយោបាយសម្រាប់នីតិកាលទី៥ នៃរដ្ឋសភា។
ឯកឧត្តមបន្តទៀតថា មន្រ្តីរាជការដែលត្រូវបានប្រកាសចូលកាន់តំណែងតួនាទីថ្មី ត្រូវយកចិត្ត ទុកដាក់បំពេញភារកិច្ចរបស់ខ្លួន ដែលខេត្តប្រគល់ជូនឱ្យបានល្អ និងទទួលជោគជ័យ ។ ជួយអប់រំ ណែនាំមន្ត្រីរាជការក្រោមឱវាទឱ្យមកធ្វើការបានគ្រប់ៗគ្នា ដើម្បីកាត់បន្ថយការឈប់សម្រាក ឬមកធ្វើ ការមិនទៀងទាត់ពេលវេលា ដោយឡែកផ្នែករដ្ឋបាលត្រូវផ្តល់សេវាជូនប្រជាពលរដ្ឋឱ្យបាលល្អ និង ទាន់ពេលផងដែរ៕
ដោយ ឡេង ហុក