សេចក្ដីប្រកាសព័ត៌មានរបស់អាជ្ញាធរអប្សរា ចេញផ្សាយថ្ងៃទី១២ សីហាឆ្នាំ២០១៤បានឱ្យដឹងថា កាលពីព្រឹកថ្ងៃទី១២ សីហា ឆ្នាំ២០១៤ វេលាម៉ោង០៨ និង៤០នាទី មានឧបទ្ទវហេតុមួយកើតឡើងនៅក្លោងទ្វារទន្លេអុំ នៃអតីតក្រុង អង្គរធំ បង្កដោយភ្ញៀវទេសចរជនជាតិកូរ៉េម្នាក់ ឈ្មោះ គីម ជុនហុង (Kim Jun Hong) អាយុ២២ឆ្នាំ ជានិស្សិតមកទស្សនាអង្គរ តាមរយៈព្រះវិហារគ្រិស្ត សាសនា មួយប្រចាំនៅប្រទេសកម្ពុជា ឈ្មោះ UN Cheon First Church បានឡើងថតរូប ឱបកៀកកនឹង រូបចម្លាក់តួយក្សទាញព្រ័ត្រទី១១ពីក្រោយ ហើយបណ្ដាលឱ្យព្រះ កេសយក្សនោះធ្លាក់របូតចុះមកក្រោមប៉ះជើងខ្លួនឯងនាំឱ្យមានរបួសភ្លាមៗ។
ភ្នាក់ងារសមត្ថកិច្ចរបស់អាជ្ញាធរអប្សរា នគរបាលការពារបេតិកភណ្ឌប្រ ចាំនៅខ្លោងទ្វារនោះ បាននាំខ្លួនធ្វើ កំណត់ហេតុនៅទីកន្លែង រួចបញ្ជូនអ្នកពាក់ ព័ន្ធមកកាន់ទីស្នាក់ការអាជ្ញាធរអប្សរា ដើម្បីដោះស្រាយតាម នីតិវិធីច្បាប់ ។ រីឯអ្នករបួសត្រូវបានបញ្ជូនទៅកាន់មន្ទីរពេទ្យដើម្បីព្យាបាល។
ក្រោយពីបានជួបប្រជុំជាមួយតំណាងព្រះវិហារគ្រិស្តសាសនា ឈ្មោះ Chois Suchet និងមគ្គុទ្ទេសក៍ទេសចរ ឈ្មោះ Lee Yong Chan នៃក្រុមហ៊ុន Best Tour របស់កូរ៉េ ដោយពិនិត្យមើលស្ថានភាពជាក់ស្ដែងនៃឧបទ្ទវ ហេតុ តំណាងព្រះវិហារ និងមគ្គុទ្ទេសក៍បានសារភាពពីកំហុសដោយសារការធ្វេប្រហែស បណ្ដាលឱ្យភ្ញៀវ ឡើងតោងរូបចម្លាក់ ហើយទទួលខុសត្រូវរាល់ទង្វើដែលបាន ប្រព្រឹត្ត និងទទួលខុសត្រូវមើលព្យាបាល អ្នករបួស ព្រមទាំងសន្យាថា នឹងកែលម្អរាល់កំហុសឆ្គង ហើយណែនាំភ្ញៀវរបស់ខ្លួនកុំឱ្យមានរឿងដូច្នេះ កើតឡើង នាពេលអនាគតទៀត។
ព្រះកេសតួយក្សនេះ ជាព្រះកេសធ្វើពីស៊ីម៉ង់ត៍ ដែលអភិរក្សដ្ឋានអង្គរ នៃក្រសួងវប្បធម៌ និងវិចិត្រសល្បៈ បានធ្វើយកមកជំនួសព្រះកេសដើម ដែលបាន នាំយកមករក្សាទុកក្នុងឃ្លាំងអភិរក្សដ្ឋានអង្គរក្នុងបណ្ដា ទសវត្សឆ្នាំ១៩៨០។ នៅ ខ្លោងទ្វារទន្លេអុំមានចម្លាក់រូបយក្សចំនួន៥៤ និងទេវតាចំនួន៥៤ដែលសព្វថ្ងៃ អាជ្ញាធរអប្សរាកំពុងធ្វើការអភិរក្ស ជួសជុល និងស្ថាបនាព្រះកេសធ្វើពីថ្មភក់យកមកជំនួសព្រះកេសធ្វើពី ស៊ីម៉ង់ត៍បានចំនួន១៥ព្រះកេសយក្ស និង១០ព្រះ កេសទេវតា៕
ដោយ ជឹម ណារី