កម្ពុជានឹងធ្វើការបញ្ជូនកីឡាករកីឡាការិនី ចំនួន៣រូបទៅចូលរួមការប្រកួតកីឡាអូឡាំពិកយុវជន (Youth Olampic Game) លើកទី២ ដែលនឹងប្រព្រឹត្តទៅ នៅទីក្រុងណានជីង សាធារណរដ្ឋប្រជាមានិតចិនពីថ្ងៃទី១៦ខែ ដល់ថ្ងៃទី២៨ ខែសីហាឆ្នាំ២០១៤។
ថ្លែងក្នុងសន្និសីទកាសែតនាព្រឹកថ្ងៃទី១២សីហា ឆ្នាំ២០១៤នៅទីស្នាក់ការគណៈកម្មាធិការជាតិអូឡាំពិកកម្ពុជា (NOCC) ឯកឧត្តម វ៉ាត់ ចំរើន អគ្គលេខាធិការគណៈកម្មាធិការជាតិអូឡាំពិកកម្ពុជាបានមានប្រសាសន៍ថា ការប្រកួតកីឡាអូឡាំពិកសម្រាប់យុវជនលើកទី២នៅទីក្រុងណានជីង ប្រទេសចិននេះ គឺមិនមែនមានតែការប្រកួតយកឈ្នះចាញ់ប៉ុណ្ណោះនោះទេ ប៉ុន្តែជាការផ្លាស់ប្ដូរបទពិសោធន៍ និងវប្បធម៌គ្នាទៅវិញទៅមកតាមបណ្ដាប្រទេសនានាជុំវិញពិភពលោកផងដែរ។
ឯកឧត្តមបន្តថា ក្នុងព្រឹត្តិការណ៍នេះមានកីឡាចំនួន៣០ប្រភេទ ត្រូវបានដាក់ឲ្យប្រកួតប្រជែង ដែលមានប្រទេសចំនួន២០៤ជាសមាជិកអូឡាំពិកអន្តរជាតិបានបញ្ជូនអត្តពលិកចំនួន៣.៨០៨នាក់ទៅចូលរួមប្រកួតប្រជែង ។ ក្នុងការប្រកួតដែលចាប់ផ្ដើមពីថ្ងៃទី១៦ដល់២៨សីហានេះ ប្រទេសកម្ពុជាបានបញ្ជូនវិញ្ញាសា៣ប្រភេទទៅចូលរួមក្នុងនោះមានប្រភេទកីឡាអត្តពល កម្ម ចំបាប់ និងកីឡាហែលទឹក ហើយពួកគេនឹងចេញដំណើរនៅថ្ងៃទី១៤សីហាខាងមុខនេះ។
កីឡាករ កីឡាការិនីដែលត្រូវចេញទៅនោះរួមមានកីឡាករហែលទឹក ចេង សុផា ដែលមានអាយុ១៥ឆ្នាំប្រកួតក្នុងវិញ្ញាសាហែល៥០ ម៉ែត្ររបៀបសេរី និងកង្កែប សម្រាប់ប្រភេទកីឡាចំបាប់វិញកីឡាការិនី ឌន ស្រីម៉ៅ មានអាយុ១៨ឆ្នាំនឹងប្រកួតក្នុងប្រភេទទម្ងន់៥២គីឡូក្រាមប្រភេទចំបាប់សេរី ។ ចំណែកកីឡាការិនីអត្តពលកម្ម សុខា បញ្ញាវីរិយវត្តី នឹងប្រកួតក្នុងវិញ្ញាសារត់ល្បឿនលើផ្ទៃរាប១០០ម៉ែត្រ។
លោក ញ៉ាន សុខវិសាល ដែលជានាយបេសកកម្មដឹកនាំកីឡាករ កីឡាការិនីទៅប្រកួតប្រកួតប្រជែងនោះបានឲ្យដឹងថា ការចូលរួមក្នុងព្រឹត្តិការណ៍នេះទោះបីក្រុមកម្ពុជាចាញ់-ឈ្នះក៏ដោយក៏ត្រូវតែនៅទាល់តែព្រឹត្តិការណ៍នេះបញ្ចប់ដែរទើបអាចមកវិញបាន ព្រោះកីឡាករ-កីឡាការិនីត្រូវចូលរួមក្នុងកម្មវិធីផ្សេងៗជាច្រើនទៀតនៅទីនោះ ព្រោះវាជាព្រឹត្តិការណ៍កីឡាអូឡាំពិកយុវជនលើកទី២ដែលធ្វើរៀងរាល់៤ឆ្នាំម្ដង៕
ដោយ ជឹម ណារី