តបតាមការអញ្ជើញរបស់ឯកឧត្តម ង្វៀន ស៊ីងហ៊ុង (Nguyen sinh hung)ប្រធានរដ្ឋ សភានៃសាធារណរដ្ឋសង្គមនិយមវៀតណាម គណៈប្រតិភូជាន់ខ្ពស់នៃរដ្ឋសភាកម្ពុជាដឹកនាំដោយសម្តេចអគ្គមហាពញាចក្រី ហេង សំរិន ប្រធានរដ្ឋសភានឹងអញ្ជើញទៅបំពេញទស្សន កិច្ចជាផ្លូវការ និងជាមិត្តភាពនៅ សាធារណរដ្ឋសង្គមនិយមវៀតណាមរយៈពេល៣ថ្ងៃ គឺចាប់ពី ថ្ងៃទី១៨ដល់ថ្ងៃទី២០ខែសីហា ឆ្នាំ២០១៤ខាងមុខនេះ។
យោងតាមសេចក្តីប្រកាសព័ត៌មាន របស់អគ្គលេខាធិការដ្ឋានរដ្ឋសភាចុះថ្ងៃទី១២ សីហា ឆ្នាំ២០១៤នេះបានឲ្យដឹងថា ក្នុងដំណើរទស្សនកិច្ចនេះ គណៈប្រតិភូជាន់ខ្ពស់នឹង ទទួលជួបសវនាការសម្តែងការគួរសម និងពិភាក្សាការងារជាមួយថ្នាក់ដឹកនាំជាន់ខ្ពស់របស់ សាធារណរដ្ឋសង្គមនិយមវៀតណាមមានជាអាទិ៍៖ ជួបសវនាការ និងសម្តែងការគួរសមជា មួយឯកឧត្តម ង្វៀន ភូត្រុង (Nguyen Phu Trong) លេខាធិការបក្ស នៃគណបក្សកុម្មុយ និស្តវៀតណាម ជួបសវនាការ និងសម្តែងការគួរសមជាមួយឯកឧត្តម ជឿង តាន់សាង (Truong Tan Sang ) ប្រធានរដ្ឋ នៃសាធារណរដ្ឋសង្គមនិយមវៀតណាម ជួបសវនាការ និងសម្តែងការគួរសមជាមួយលោក ង្វៀន តាន់យុង (Nguyen Tan Dung) នាយករដ្ឋមន្ត្រី នៃ សាធារណរដ្ឋសង្គមនិយមវៀតណាម និងទទួលជួបពិភាក្សាការងារទ្វេភាគីជាមួយឯកឧត្តម ង្វៀន ស៊ីងហ៊ុង (Nguyen sinh Hung) ប្រធានរដ្ឋសភា នៃសាធារណរដ្ឋសង្គមនិយមវៀត ណាម ។
ក្រៅពីនេះគណៈប្រតិភូជាន់ខ្ពស់រដ្ឋសភាកម្ពុជា នឹងអញ្ជើញទស្សនាទីកន្លែងប្រវត្តិ សាស្ត្រសំខាន់ៗនៅរដ្ឋធានីហាណូយ នៃសាធារដ្ឋសង្គមនិយមវៀតណាមផងដែរ៕
ដោយ ប៉ាល់ សុង