ខេត្តសៀមរាប ថ្ងៃទី១៣ខែសីហា ឆ្នាំ២០១៤ អាជ្ញាធរអប្សរាបានប្រកាសថា ខ្លួនបានត្រៀមលក្ខណៈរួចជាស្រេចហើយសម្រាប់ទប់ទល់នឹងទឹកជំនន់នៅក្នុងរដូវវស្សាឆ្នំានេះ ដោយមិនឲ្យប៉ះពាល់ដល់ប្រាសាទបុរាណនៅក្នុងតំបន់អង្គរឡើយ បើទោះបីជាស្ថានភាពទឹកឆ្នំានេះ ដូចឆ្នំាមុន ឬខ្លំាងជាងក៏ដោយ។
លោក អ៊ឹង សុរិទ្ធី អនុប្រធាននាយកដ្ឋានផ្សព្វផ្សាយ នៃអគ្គនាយកដ្ឋានអាជ្ញាធរអប្សរាបានមានប្រសាសន៍ប្រាប់អ្នកយកព៌ត័មាន កាលពីថ្ងៃទី១២ខែសី ហា ឆ្នាំ២០១៤នេះថា បន្ទាប់ពីក្រសួងធនធានទឹក និងឧតុនិយមប្រគល់ទ្វារទឹក នៅបារាយណ៍ទឹកថ្លាមកឲ្យអាជ្ញាធរអប្សរាគ្រប់គ្រងទំាងអស់នោះ អាជ្ញាធរអប្សរា បានធ្វើការជុសជុលទ្វារទឹក ដែលខូចដោយបំពាក់សម្ភារថ្មីទំនើបៗ ឲ្យមានលក្ខណៈល្អប្រសើរ ព្រមទំាងបានស្តារនូវប្រព័ន្ធទឹកបុរាណមួយចំនួនឲ្យមានដំ ណើរការល្អឡើងវិញ ដើម្បីធ្វើយ៉ាងណាទប់ទល់នឹងទឹកនៅក្នុងរដូវវស្សាឆ្នំានេះមិនឲ្យប៉ះពាល់ដល់ប្រាសាទបុរាណនៅក្នុងតំបន់អង្គរនោះ។
លោក អ៊ឹង សុរិទ្ធី បានឱ្យដឹងទៀតថា ក្រៅពីយុទ្ធសាស្រ្តរំដោះទឹកមិនឲ្យប៉ះពាល់ដល់ប្រាសាទ អាជ្ញាធរអប្សរាក៏បានគិតគូរផងដែរអំពីការស្តុកទឹកនៅក្នុងបារាយណ៍ឲ្យបានច្រើនសម្រាប់ទុកស្រោចស្រពស្រូវ បន្លែបង្ការ របស់ប្រជាពល រដ្ឋ នៅក្នុងរដូវប្រំាងឲ្យបានគ្រប់គ្រាន់ទៅតាមតម្រូវការរបស់ប្រជាពលរដ្ឋ ។ លោករំពឹងថា ឆ្នំានេះប្រាសាទបុរាណនៅក្នុងតំបន់អង្គរ និងក្រុងសៀមរាបដែលជាតំបន់ទេសចរណ៍ដ៏ល្បីល្បាញ នឹងចៀសផុតពីការលិចលង់ដោយទឹកជំនន់ រីឯប្រជាកសិករក៏មានទឹកគ្រប់គ្រាន់សម្រាប់បង្កបង្កើនផលនៅរដូវប្រាំងផងដែរ។
ទឹកជំនន់ខ្លាំងកាលពីរដូវវស្សាឆ្នាំមុននៅក្នុងតំបន់អង្គរ បណ្តាលឱ្យបាក់ទំនប់តាកាវក្បែរខ្លោងទ្វារខាងលិចនៃប្រាសាទបាយ័ន ដែលស្ថិតនៅក្នុងសង្កាត់គោកចក ក្រុងសៀមរាបបានបង្កឲ្យលំនៅដ្ឋាន និងផលដំណាំរបស់ប្រជាពល រដ្ឋនៅក្នុងតំបន់នោះ និងតំបន់មួយចំនួនប៉ែកខាងលិចក្រុងសៀមរាបលិចលង់ អស់ជាច្រើនថ្ងៃ ដោយបណ្តាលឲ្យខូចខាតផលដំណាំ ផ្លូវគមនាគមន៍ និងសម្ភារ របស់ប្រជាពលរដ្ឋអស់មួយចំនួនធំ៕
ដោយ ហង្ស សៀក