ខេត្តសៀមរាប ថ្ងៃទី១៣ ខែសីហា ឆ្នាំ២០១៤ អង្គការសង្គ្រោះជនពិការខ្មែរ ដើម្បីការពិតនៅ ខេត្តសៀមរាបបានអំពាវនាវឲ្យជនពិការទំាងអស់ ដែលមិនទាន់មានជំនាញច្បាស់លាស់ឱ្យមកទទួល យកការ បណ្តុះបណ្តាលនៅក្នុងអង្គការដោយឥតគិតថ្លៃ ដើម្បីទទួលបានជំនាញមួយពិតប្រាកដអាចយកទៅប្រកបមុខរបររកស៊ីចិញ្ចឹមជីវិតបាន ជាពិសេសគឺដើម្បីរួមចំណែកកាត់បន្ថយអត្រាជនពិការដើរសុំទានគេផងដែរ។
ការអំពាវនាវនេះបានធ្វើឡើង ខណៈដែលមានជនពិការមួយចំនួនមិនទាន់មានជំនាញច្បាស់លាស់សម្រាប់ ប្រកបអាជីវកម្មចិញ្ចឹមជីវិត ហើយពួកគេតែងតែដើរសុំទាននៅតាមទីសាធារណៈ ដែលជះឥទ្ធិពលមិនល្អ ដល់សង្គម និងទទួល រងនូវការមាក់ងាយពីសំណាក់ជនមួយចំនួនផងនោះ ទើបអង្គការសង្គ្រោះជនពិការខ្មែរបានចេញនូវការអំពាវនាវនេះ។
លោក គឹម សុវណ្ណ ប្រធានអង្គការសង្គ្រោះជនពិការខ្មែរដើម្បីការពិតនៅ ខេត្តសៀមរាបបានឲ្យដឹងថា នៅក្នុងអង្គការរបស់លោកមានការបណ្តុះបណ្តាលជំនាញឆ្លាក់ថ្ម ឆ្លាក់ឈើ កាត់ដេរ និងតម្បាញ ហើយរាល់ផលិតផលទំាងអស់ដែលជនពិការបានធ្វើគឺមណ្ឌលប្រមូលទិញ លក់ផលិតផលជនពិការអង្គរប៊ិក ឡាក់ ខេត្តសៀមរាប ទទួលទិញយកទំាងអស់ ។ លោក គឹម សុវណ្ណ បានឱ្យដឹង ទៀតថា ជនពិការដែលបានមកទទួលការបណ្តុះ បណ្តាលនៅក្នុងអង្គការរបស់លោក ពេលត្រឡប់ទៅវិញភាគច្រើនជីវភាពរបស់ពួកគេបានធូរធារជាងមុន ពោលគឺក្នុង១ខែពួកគាត់អាចរកចំណូលបានពី៦០ដុល្លារទៅ១៨០ដុល្លារ៕
ដោយ ហង្ស សៀក