សៀមរាប ៖ តំបន់ទេសចរណ៍ វប្បធម៌-ប្រវត្តិសាស្ត្រ សៀមរាប-អង្គរ នៃដែនដី សុវណ្ណភូមិ ដែលសម្បូរទៅដោយ ប្រាង្គប្រាសាទរាប់រយពាន់ ជាកេរ្តិ៍មរតក ដ៏មហាសាល និងមានតម្លៃ ជាសកល ដែលស្ថាបត្យកម្ម ដូនតាខ្មែរ និងជាសក្ខីភាព នៃមោទនភាព ចំពោះកុលបុត្រ កុលធីតាខ្មែរ គ្រប់ជំនាន់ និងជាតំបន់ទេសចរណ៍ ប្រកបដោយភាព ទាក់ទាញបំផុតនៅកម្ពុជាក៏ដូចជាក្នុងពិភពលោកទាំងមូលទើបធ្វើឲ្យចំនួនភ្ញៀវទេសចរមានការកើនឡើងជារៀងរាល់ឆ្នាំទោះបីបច្ចុប្បន្នសកលលោកទាំងមួល កំពុងប្រឈមទៅនឹងភាពមិនច្បាស់លាស់ នៃការវិវត្តន៍ថ្មីៗ ឥតឈប់ឈរ ទាំងលើទិដ្ឋភាពសេដ្ឋកិច្ច សង្គម និងបរិស្ថាន។
វិស័យទេសចរណ៍ដែលជាវិស័យមួយមានលក្ខណៈជាប្រព័ន្ធ ជាអន្តរវិស័យ ដែលមានទម្រង់ ប្រទាក់ក្រឡាគ្នា ទាំងនៅកម្រិតសកល តំបន់ និងកម្រិតជាតិ ហើយត្រូវបានចាត់ទុកជាសមាសធាតុ មួយដ៏សំខាន់ក្នុងកិច្ច អភិវឌ្ឍន៍ សេដ្ឋកិច្ចសង្គម និងការពង្រឹងទំនាក់ទំនង រវាងគ្នា និងគ្នា ពិសេសជំរុញ វប្បធម៌ ប្រពៃណី និងសន្តិភាព។
ពិធីនេះស្ថិតក្រោយអធិបតីភាពរបស់លោក ថោង ខុន រដ្ឋមន្ត្រីក្រសួងទេសចរណ៍ លោក ច័ន្ទ សុផល ប្រធានក្រុម ប្រឹក្សាខេត្ត លោកអភិបាលខេត្ត ស៊ូ ភិរិន្ធ ព្រមទាំងមានការចូលរួមពីមន្ត្រីជាន់ខ្ពស់តំណាង ក្រសួង ស្ថាប័ន និងអាជ្ញាធរដែលពាក់ព័ន្ធ អ្នកប្រកបសេវាខាងវិស័យទេសចរណ៍ ប្រមាណជាង ៣០០នាក់ គឺប្រជុំនៅ សណ្ឋាគារ អង្គរ សេនជូរី ខេត្តសៀមរាប។ ហើយលោករដ្ឋមន្ត្រី បានមានប្រសាសន៍ថា វិស័យទេសចរណ៍ កម្ពុជា គឺជា "ទេសចរណ៍បៃតង" (មាសបៃតង) ជាវិស័យអាទិភាពមួយ ត្រូវ បានកំណត់នៅក្នុងយុទ្ធសាស្ត្រ ចតុកោណ របស់រាជរដ្ឋាភិបាល។ ចំណូលនៃវិស័យទេសចរណ៍ត្រូវ បានចាត់បញ្ចូលភ្លាមៗ ទៅក្នុងចរន្តសេដ្ឋ កិច្ចជាតិ រួមចំណែកបង្កើតការងារ លើកកម្ពស់ជីវភាពរស់នៅ ជំរុញកំណើនផលិតផលក្នុងស្រុកសរុប (GDP) ធ្វើឲ្យមានលំនឹងផ្នែកជញ្ជីងពាណិជ្ជកម្ម និងកាត់បន្ថយភាពក្រីក្រ។
ការអភិវឌ្ឍទេសចរណ៍ប្រកបដោយនិរន្តភាព និងការទទួលខុសត្រូវ នឹងរួមចំណែកយ៉ាងសកម្មដល់កិច្ចអភិវឌ្ឍ ថែរក្សា ការពារ និងអភិរក្សសម្បត្តិវប្បធម៌ ប្រវត្តិសាស្ត្រ និងធនធានធម្មជាតិ របស់ប្រទេសជាតិ។
លោក ង៉ូវ សេងកាក់ ប្រធានមន្ទីរទេសចរណ៍ ខេត្តសៀមរាប បានរាយការណ៍ថា ជាក់ស្តែងក្នុងឆមាសទី១ ដើមឆ្នាំ ២០១២នេះ ភ្ញៀវទេសចរជាតិ និងអន្តរជាតិ បានចូលមកទស្សនា ក្នុងខេត្តសៀមរាប មានជាង ២លាន ១សែននាក់ គឺកើន ៣១,១៣% បើប្រៀបធៀប នឹងរយ:ពេលដូចគ្នាឆ្នាំ២០១១ មកទស្សនា ប្រាង្គប្រាសាទ វប្បធម៌ ប្រពៃណី សិល្ប: របាំ សិលាចារឹក តំបន់រមណីយដ្ឋាន និងសម្បត្តិដ៏មានតម្លៃជា ប្រវត្តិសាស្ត្រ ជាច្រើនទៀត ស្របនឹងសុខសន្តិភាព នាពេលបច្ចុប្បន្ន នៅកម្ពុជា។ ក្នុងនោះភ្ញៀវអន្តរជាតិ មានចំនួន ១.០៥៨.៦៥៧នាក់ កើន ៣៤,៩៤% ធៀបទៅឆ្នាំ២០១១ ក្នុងរយ:ពេលដូចគ្នា មានចំនួន ៧៨៤.៥០៩នាក់។ លោកបានបន្តថា ក្នុងនោះភ្ញៀវអន្តរជាតិ ជាប់លំដាប់លេខ១ គឺជនជាតិកូរ៉េ មានចំនួន ១៩៤.១៤៤នាក់ កើន ១៨,៣៣% វៀតណាម លំដាប់លេខ២ មានចំនួន ១២៧.៨៩៤នាក់ កើន ១២,០៨% ចិនលំដាប់លេខ៣ មានចំនួន ៧៨.៤៣២នាក់ កើន ៧,៤០% ជប៉ុនលំដាប់លេខ៤ មានចំនួន ៦៤.៦២០នាក់ កើន ៦,១០%បន្ទាប់មក ថៃ ឡាវ រុស្សី អាមេរិក បារាំង អង់គ្លេស និងភ្ញៀវមកពីបណ្តា ប្រទេសផ្សេងៗ ជាច្រើនទៀត។
ដោយឡែកនៅខេត្តសៀមរាបមានរមណីយដ្ឋានទេសចរណ៍១៥កន្លែង ដែលអាចឲ្យភ្ញៀវចូលទស្សនាបានក្នុងនោះមានរមណីយដ្ឋាន៧កន្លែង កំពុងដំណើរការដោយ៣កន្លែងគ្រប់គ្រងដោយឯកជន(មេជ្រៃ.ចុងឃ្នៀស.និងកំពង់ភ្លុក) ២កន្លែងគ្រប់គ្រងដោយសហគមន៍មូលដ្ឋាន(កំពង់ឃ្លាំង និងត្រាវកុដិ) ១កន្លែងកំពុងរៀបចំធ្វើគឺរមណីយដ្ឋានទេសចរណ៍ខ្នារពោធិនៅស្រុកសូទ្រនិគម។ ក្រៅពីនោះទៀតខេត្តសៀមរាបមានតំបន់ប្រាសាទបុរាណចំនួន៥១២កន្លែង (ទាំងក្នុងនិងក្រៅតំបន់អង្គរ) ស្ពានបុរាណចំនួន៥៩កន្លែង ផ្ទះបុរាណចំនួន៥៨កន្លែង វត្តបុរាណចំនួន១០៣កន្លែង(ក្នុងចំណោមវត្ត២២១កន្លែង) ដែលអាចឲ្យភ្ញៀវទេសចរណ៍ទៅទស្សនាបាន។ បច្ចុប្បន្ននេះនៅក្នុងខេត្តសៀមរាបមានសណ្ឋាគារសរុបចំនួន១៥២កន្លែងស្មើនិង១០៨៥៤បន្ទប់ អាផាតមេនសរុបមានចំនួន៨កន្លែងស្មើនិង១៩៧យូនីត សំរាប់ទទួលភ្ញៀវទេសចរណ៍មកស្នាក់នៅ។
នៅចុងបញ្ចប់កម្មវិធានេះដែរមានចែកជូនប័ណ្ណសរសើរដល់ស្ថាប័នពាក់ព័ន្ធដែលចូលរួមអនុវត្ត ក៏ដូចជាបានចូលរួមផ្សព្វផ្សាយ ទីក្រុងស្អាត សេវាកម្មល្អផងដែរ៕
វាសនា