ដោយ ៖ សុខ ខេមរ
ភ្នំពេញ ៖ សាលាដំបូងរាជធានីភ្នំពេញនៅព្រឹកថ្ងៃទី១១ ខែកញ្ញា ឆ្នាំ២០១២ រហូតមកដល់ម៉ោង១០និង១០នាទីព្រឹក កំពុងជំនុំជម្រះក្ដីលោក ម៉ម សូណង់ដូ ជាមួយនឹងបក្ខពួក៨នាក់ទៀត ដែលមានប្រធានក្រុមប្រឹក្សាជំនុំជម្រះ លោកស្រី ចាំង ស៊ីណាត ,លោកចៅក្រម ជា សុខហៀង, លោកចៅក្រម ហោ លីណា ជាសមាជិក និងតំណាងអយ្យការ មាស ច័ន្ទពិសិដ្ឋ ។
នៅក្នុងការជំនុំជម្រះនេះ សាលាដំបូងរាជធានីភ្នំពេញបានកោះហៅជនសង្ស័យ៩នាក់ ១-លោកម៉ម សូណង់ដូ ប្រធាន វិទ្យុសំបុត្រឃ្មុំ និងជាប្រធានសមាគមអ្នកប្រជាធិបតេយ្យ, ២-លោក កាន់ សុវណ្ណ អាយុ៥៤ឆ្នាំ, ៣-លោកទូច សៀម អាយុ៣៣ឆ្នាំ, ៤-លោក សន សឿន អាយុ៣២ឆ្នាំ អ្នកទាំង៤កំពុងនៅក្នុងពន្ធនាគារ, ៥-លោក ភាន់ ផល អាយុ៨៤ឆ្នាំ, ៦- លោក ហេង សឿន អាយុ៣១ឆ្នាំ, ៧-លោក ម៉ៅ វាសនា ៣២ឆ្នាំ, ៨-លោក ខាត់ សាវឿន អាយុ ៥៧ឆ្នាំ និង៩-លោក ម៉ា ឆាង អាយុ៤៧ឆ្នាំ ទាំង៥នាក់កំពុងនៅក្រៅឃុំ ។
ជនសង្ស័យទាំង៩នាក់ត្រូវបានប្រភពព័ត៌មានពីសាលាដំបូងរាជធានីឱ្យដឹងថា ចោទប្រកាន់ពីបទប្រឆាំងនឹងរាជការ សាធារណៈ មានស្ថានទម្ងន់ទោសសំឡុតគំរាមកុបកម្ម ជ្រៀតជ្រែកដោយខុសច្បាប់ក្នុងការបំពេញមុខងារសាធារណៈ កាន់កាប់ ឬដឹកជញ្ជូនអាវុធដោយគ្មានការអនុញ្ញាត ឆបោកមានស្ថានទម្ងន់ទោស ប្រើប្រាស់លិខិត ឬឯកសារដែល បង្កើតឱ្យមានការភ័ន្ដច្រឡំ និងញុះញង់ប្រជាពលរដ្ឋកាន់កាប់អាវុធប្រឆាំងអាជ្ញាធរស្របច្បាប់ ។
នៅក្នុងសវនាការនាព្រឹកថ្ងៃទី១១ ខែកញ្ញា ឆ្នាំ២០១២នេះ មានសាក្សីដាក់បន្ទុកទៅលើជនសង្ស័យ៨១រូប និងសាក្សី ដោះបន្ទុក៥រូប សរុបសាក្សីដាក់បន្ទុកនិងដោះបន្ទុកចំនួន៨៦នាក់ ។
នៅក្នុងសវនាការមិនអនុញ្ញាតឱ្យអ្នកសារព័ត៌មានចូលស្ដាប់នោះទេ ។ ដោយឡែកនៅតាមផ្លូវជុំវិញសាលាដំបូងរាជ ធានីភ្នំពេញសមត្ថកិច្ចបានរឹតបន្ដឹងសន្ដិសុខមិនអនុញ្ញាតឱ្យធ្វើដំណើរឆ្លងកាត់នោះទេ ហើយនៅតាមច្រកផ្លូវឆ្លងកាត់សាលា ដំបូងរាជធានីភ្នំពេញ គេសង្កេតឃើញមានប្រជាពលរដ្ឋជាច្រើននាក់ បានមកឈរ ត្រៀបត្រា ដោយមានលើកបដាជាអក្សរសុំឱ្យដោះលែងលោក ម៉ម សូណង់ដូ រួមទាំងការស្រែកជយឃោសផងដែរ ៕
