ភ្នំពេញ: ក្នុងករណីកាប់បំផ្លាញព្រៃលិចទឹក នៅស្រុកស្ទោង ខេត្តកំពង់ធំ លោក ព្រឹម រដ្ឋា អភិបាលស្រុកស្ទោង និងប្រជាពលរដ្ឋម្នាក់ទៀត ជាម្ចាស់អាងនៅតំបន់ពីរ ឈ្មោះ ជា ប៊ុនហូវ បានចូលមកសាលាដំបូងរាជធានីភ្នំពេញ កាលពីព្រឹកថ្ងៃទី១១ ខែកញ្ញា ឆ្នាំ២០១២ ដើម្បីមកបំភ្លឺ ក្នុងនាមជាជន ត្រូវចោទ រួចចៅក្រម បានសម្រេចមិនឃុំខ្លួនទេ តែដាក់ឱ្យស្ថិតក្រោមការត្រូតពិនិត្យតាមផ្លូវតុលាការ។
លោក ប៉ែន វណ្ណរិទ្ធ នាយខណ្ឌរដ្ឋបាលជលផលខេត្តកំពង់ធំ និងលោក គន ច័ន្ទសីហា នាយផ្នែករដ្ឋបាលជលផលស្រុកស្ទោង បានចូលមកបំភ្លឺករណីនេះដែរ រួចត្រឡប់ទៅវិញ។
សរុបមក រហូតមកទល់ពេលនេះ ក្នុងសំណុំរឿងកាប់បំផ្លាញព្រៃលិចទឹក នៅខេត្តកំពង់ធំ មានមនុស្សចំនួន ៧នាក់ ត្រូវតុលាការឃុំខ្លួន និងមនុស្ស ៤ នាក់ទៀត ត្រូវតុលាការសម្រេចមិនឃុំខ្លួន រួចអនុញ្ញាតឱ្យត្រឡប់ទៅវិញ។
ប៉ុន្តែនៅមានមនុស្សចំនួនទៀត ដែលតុលាការចេញដីកាបង្គាប់ឱ្យចូលខ្លួនជាបន្តបន្ទាប់ ដើម្បីសាកសួរករណីនេះដែរ។
គួររម្លឹកថា កាលពីថ្ងៃទី២៩ ខែមិថុនា ឆ្នាំ២០១២ កម្លាំងចម្រុះបានបើកកិច្ចប្រតិបត្តិការបង្ក្រាប ករណីកាប់បំផ្លាញព្រៃលិចទឹក ដោយពុំមានឃាត់ខ្លួនមនុស្សណាម្នាក់ទេ គ្រាន់តែបានដកហូតគ្រឿងចក្រប្រភេទអ៊ិចស្ការវ៉ាទ័រ ចំនួន ៤៤ គ្រឿង ទុកជាវត្ថុតាង។ បន្ទាប់មក នៅថ្ងៃទី១៣ ខែកក្កដា ឆ្នាំ២០១២ សមត្ថកិច្ចបានបញ្ជូនរបាយការណ៍សំយោគ មកព្រះរាជអាជ្ញាអមសាលាដំបូងខេត្តកំពង់ធំ ដោយភ្ជាប់នូវឯកសារភស្តុតាងមួយចំនួន ប្រយោជន៍ដើម្បីធ្វើជាមូលដ្ឋានក្នុងការសម្រេចរកជនល្មើស ដែលជាប់ពាក់ព័ន្ធនឹងករណីនេះ។ ក្រោយពីបានពិនិត្យ និងកោះហៅមនុស្សជាប់ពាក់ព័ន្ធមួយចំនួនមកសាកសួររួច នៅថ្ងៃទី១៦ ខែកក្កដា ឆ្នាំ២០១២ ព្រះរាជអាជ្ញាអមសាលាដំបូងខេត្តកំពង់ធំ បានផ្ទេរសំណុំរឿងនេះ មកអយ្យការអមសាលាដំបូងរាជធានីភ្នំពេញ ដើម្បីចាត់ការបន្តតាមច្បាប់។
នៅដំណាក់កាលនេះ តំណាងអយ្យការអមសាលាដំបូងរាជធានីភ្នំពេញ បានពិនិត្យ រួចសម្រេចចោទប្រកាន់មនុស្សចំនួន ២៧នាក់ អាជ្ញាធរដែនដី អាជ្ញាធរជំនាញ មន្ត្រីទទួលអាណត្តិតាមរយៈការបោះឆ្នោត (មេឃុំ ជំទប់ឃុំ) និងបក្ខពួក រួចបញ្ជូនសំណុំរឿងនេះ ទៅឱ្យចៅក្រមស៊ើបសួរចាត់ការបន្តតាមនីតិវិធី។
នៅដំណាក់កាលនេះ តុលាការបានចេញដីកាបង្គាប់ឱ្យសមត្ថកិច្ចនាំខ្លួនមនុស្ស ៦នាក់ យកមកសាកសួរ និងឃុំខ្លួន កាលពីរសៀលថ្ងៃទី២៥ ខែកក្កដា ឆ្នាំ២០១២ តែម្តង។ ក្នុងនោះមានឈ្មោះ ជាតិ ស៊ីវុត្ថា មុខងារជាប្រធានមន្ទីរធនធានទឹក និងឧតុនិយមខេត្តកំពង់ធំ, ឈ្មោះ ពាញ ពូល មុខងារជាមេឃុំសំព្រោច ស្រុកស្ទោង ខេត្តកំពង់ធំ, ឈ្មោះ ម៉េង ផល្លី, ឈ្មោះ ថាវ ទុំ, ឈ្មោះ ធាង ធា និងឈ្មោះ យុ គឹមឡេង ភេទស្រី។
ចំពោះមូលហេតុដែលនាំឱ្យមានការចោទប្រកាន់នេះ ពុំមានប្រភពណាបញ្ជាក់ឱ្យដឹងជាផ្លូវការនោះទេ គ្រាន់តែបង្ហើបថា មនុស្សចំនួន ២៧នាក់ ដែលជាម្ចាស់អាង និងតំណាងក្រុមហ៊ុននៅតំបន់ទន្លេសាប ក្នុងភូមិសាស្ត្រឃុំចំណារក្រោម ឃុំសំព្រោច និងឃុំម្យាក្រង ស្រុកស្ទោង ខេត្តកំពង់ធំ បានធ្វើសកម្មភាពកាប់បំផ្លាញព្រៃលិចទឹក ទំហំប្រមាណមួយម៉ឺនហិកតា បំពានអនុក្រឹត្យរបស់រាជរដ្ឋាភិបាលកម្ពុជា ដែលកំណត់តំបន់នោះជាតំបន់ហាមឃាត់ ឬហៅថា តំបន់បី តាំងពីដើមឆ្នាំ២០១២ មកម្ល៉េះ តាមរូបភាពរំកិលបង្គោលព្រំសីមា រវាងតំបន់ពីរចូលទៅក្នុងតំបន់បី ចាប់ពីរាប់រយម៉ែត្រ រហូតដល់កន្លែងខ្លះ ដល់ទៅជាងមួយពាន់ម៉ែត្រឯណោះ ហើយអាងចាស់ៗ ដែលត្រូវបានរដ្ឋាភិបាលសម្រេចឱ្យរំលាយចោល ក្នុងឆ្នាំ២០១០ បានកើតឡើងវិញស្ទើរតែទាំងអស់។
ក្រៅពីនោះ មនុស្សទាំង ២៧នាក់នេះ បានធ្វើអាងទឹក ដើម្បីយកទឹកលក់ទៅឱ្យកសិករ សម្រាប់ធ្វើស្រែប្រាំងជាច្រើនកន្លែងទៀត ដែលមានទំហំរាប់ពាន់ហិកតា ស្ថិតនៅក្នុងតំបន់បី ដែលហាមផ្តាច់មិនឱ្យនរណាប៉ះពាល់។ ក្នុងនោះពួកគេ និងបក្ខពួក បានប្រមូលលុយយ៉ាងច្រើនសន្ធឹកសន្ធាប់ តាមរយៈការលក់ទឹក និងលក់ត្រីដែលនៅក្នុងអាង។
ប្រភពដដែលបានបញ្ជាក់ថា ចំពោះករណីខាងលើនេះ បានត្រូវតុលាការចាត់ទុកជាបទល្មើស មិនប្តឹងបរិហារបទឧក្រិដ្ឋ ឬបទមជ្ឈឹមដោយអ្នករាជការសាធារណៈ បទ បំលាស់ទីនៃគោលព្រំ បទ ផ្តល់សេចក្តីប្រកាសដោយភូតកុហក និងបទ ផ្តល់លិខិតបញ្ជាក់មិនពិត និងផ្តន្ទាទោសតាមច្បាប់ជលផល និងច្បាប់ធនធានទឹកផងដែរ៕