ភ្នំពេញ: គណៈកម្មាធិការជាតិរៀបចំការបោះឆ្នោត ហៅកាត់ថា គ.ជ.ប បានប្រកាសថា គិតត្រឹមថ្ងៃទី៨ ខែកញ្ញា ឆ្នាំ២០១២ មានតំណាងគណបក្សនយោបាយសរុបចំនួន ៣.៣៩៩ នាក់ និងអ្នកសង្កេតការណ៍ជាតិ-អន្តរជាតិ សរុបចំនួន ២៥៩ នាក់ បានចូលរួមសង្កេតមើលដំណើរការពិនិត្យបញ្ជីឈ្មោះ និងចុះឈ្មោះបោះឆ្នោត ឆ្នាំ២០១២។
សេចក្ដីប្រកាសព័ត៌មាន នៅថ្ងៃទី១១ ខែកញ្ញា ឆ្នាំ២០១២ បានបង្ហាញថា គណបក្សនយោបាយ ដែលបានដាក់តំណាងរបស់ខ្លួន សង្កេតមើលការពិនិត្យបញ្ជីឈ្មោះ និងចុះឈ្មោះបោះឆ្នោត រួមមាន៖
១. គណបក្សប្រជាជនកម្ពុជា បានដាក់តំណាងពេញសិទ្ធិ និងបម្រុងចំនួន ២.៥១៧នាក់ ក្នុងនោះស្រីចំនួន ២៥៧នាក់។
២. គណបក្សហ្វ៊ុនស៊ិនប៉ិច បានដាក់តំណាងពេញសិទ្ធិ និងបម្រុងចំនួន ៨៦៨នាក់ ក្នុងនោះស្រីចំនួន ៩៧នាក់។
៣. គណបក្សនរោត្តម រណឫទ្ធិ បានដាក់តំណាងពេញសិទ្ធិ និងបម្រុងចំនួន ១០នាក់។
៤. គណបក្សសញ្ជាតិកម្ពុជា បានដាក់តំណាងពេញសិទ្ធិ និងបម្រុងចំនួន ២នាក់។
៥. គណបក្សសាធារណរដ្ឋប្រជាធិបតេយ្យ បានដាក់តំណាងពេញសិទ្ធិ និងបម្រុង ចំនួន ២នាក់។
សេចក្ដីប្រកាសព័ត៌មានបានបង្ហាញទៀតថា អង្គការមិនមែនរដ្ឋាភិបាលជាតិមាន៖
១. អង្គការខុមហ្វ្រែល បានដាក់តំណាងចំនួន ២៤៣នាក់ ក្នុងនោះស្រី ចំនួន ៤៩នាក់ និងចល័ត ៥នាក់។
រីឯអង្គការមិនមែនរដ្ឋាភិបាលអន្តរជាតិរួមមាន៖
១. មូលនិធិអន្តរជាតិសម្រាប់ប្រព័ន្ធបោះឆ្នោត (IFES) បានដាក់តំណាងចំនួន ៤នាក់ ក្នុងនោះស្រីចំនួន ២នាក់។
២. វិទ្យាស្ថានជាតិប្រជាធិបតេយ្យសម្រាប់កិច្ចការអន្តរជាតិ (NDI) បានដាក់តំណាងចំនួន ១២នាក់ ក្នុងនោះស្រីចំនួន ៨នាក់។
សូមបញ្ជាក់ថា កាលបរិច្ឆេទទទួលពាក្យសុំចុះឈ្មោះតំណាងគណបក្សនយោបាយ គឺចាប់ពីថ្ងៃទី២៣ ខែសីហា រហូតដល់ថ្ងៃទី២២ ខែធ្នូ ឆ្នាំ២០១២។
ចំណែកកាលបរិច្ឆេទ នៃការដាក់ពាក្យសុំចុះឈ្មោះអ្នកសង្កេតការណ៍ជាតិ ចាប់ពីថ្ងៃទី១៦ ខែសីហា ឆ្នាំ២០១២ រហូតដល់ថ្ងៃទី១៨ ខែកក្កដា ឆ្នាំ២០១៣ និងកាលបរិច្ឆេទ នៃការដាក់ពាក្យ សុំចុះឈ្មោះអ្នកសង្កេតការណ៍អន្តរជាតិ ចាប់ពីថ្ងៃទី១៦ ខែសីហា ឆ្នាំ២០១២ រហូតដល់ថ្ងៃទី២៥ ខែកក្កដា ឆ្នាំ២០១៣។
ដំណើរការពិនិត្យបញ្ជីឈ្មោះ និងចុះឈ្មោះបោះឆ្នោត ធ្វើឡើងចាប់ពីថ្ងៃទី១ ខែកញ្ញា ដល់ថ្ងៃទី១២ ខែតុលា ឆ្នាំ២០១២។ គ.ជ.ប. បានប្រកាសថា គិតចាប់ពីថ្ងៃទី១ ដល់ថ្ងៃទី៧ ខែកញ្ញា ឆ្នាំ២០១២ ប្រជាពលរដ្ឋមកចុះឈ្មោះបោះឆ្នោត បានចំនួន ១០១.២៤៧ នាក់ ស្មើនឹង ១៦,៣៤ ភាគរយ ដែលតួលេខនេះ បានទទួលពីឃុំ-សង្កាត់ ចំនួន ១.៥៧២ ក្នុងចំណោមឃុំ-សង្កាត់ ចំនួន ១.៦៣៣ នៅទូទាំងប្រទេស៕