របៀបវារៈស្តីពីថាមពលបៃតង រំពឹងថាត្រូវបានលើកយកមកធ្វើការពិភាក្សា ក្នុង កិច្ចប្រជុំរបស់រដ្ឋមន្ត្រីអាស៊ានថាមពលលើកទី៣០ ដែលចាប់ដំណើរការនៅរាជធានីភ្នំពេញ ចាប់ពី ថ្ងៃទី១១ ដល់ថ្ងៃទី១៤ ខែកញ្ញា ឆ្នាំ២០១២នេះ។លោក វិចទ័រ ហ្សូណា អគ្គនាយករង នាយកដ្ឋានថាមពល នៃក្រសួងឧស្សាហកម្ម រ៉ែ និងថាមពល បានឲ្យដឹងកាលពីរសៀលថ្ងៃទី១០ ខែកញ្ញាម្សិលមិញថាកិច្ចប្រជុំថ្ងៃដំបូងនេះ (កិច្ច ប្រជុំ បច្ចេកទេស ឬកិច្ចប្រជុំត្រៀម) គឺជា កិច្ចប្រជុំរៀបចំឯកសារ ឬរបៀបវារៈ ដើម្បីដាក់ជូន រដ្ឋ មន្ត្រីអាស៊ាន ដែលត្រូវធ្វើការពិភាក្សាគ្នា នៅថ្ងៃទី១១ ខែកញ្ញា ឆ្នាំ២០១២នេះ។
លោកបន្តថា កិច្ច ប្រជុំនេះគឺផ្តោតសំខាន់លើការតភ្ជាប់អាស៊ានបៃតង ពោលគឺចង់ផ្សារភ្ជាប់ថាមពល ដែល គ្មាន ផ្សែងទៅលើបរិយាកាស បើទោះបីដឹងថា ការងារនេះនឹងមិនអាចធ្វើទៅបានក៏ដោយ ក៏នៅតែ ខិត ខំប្រឹងប្រែងជម្នះ។ លោក បញ្ជាក់ថា បើកាលណាគេនិយាយពីថាមពលបៃតង គឺគេនិយាយ ថាមពលកកើតឡើងវិញ ដូចជាថាមពលពន្លឺព្រះអាទិត្យ ថាមពលខ្យល់ វារីអគ្គិសនី ជាដើម។
ប្រភពបញ្ជាក់ទៀតថា កិច្ចប្រជុំនេះក៏នឹងធ្វើការពិភាក្សាលើការតភ្ជាប់ ឬការបញ្ជូនបណ្តាញខ្សែ ថាមពលទៅកាន់ប្រទេសជាសមាជិកទាំង១០ប្រទេស ខណៈប្រទេសទាំងអស់បាននឹងកំពុង ធ្វើ បទប្បញ្ញត្តិស្តង់ដារ និងច្បាប់ ដើម្បីធ្វើការតភ្ជាប់ថាមពលបាន។ ដូច្នេះការតភ្ជាប់បណ្តាញខ្សែថាមពលទៅកាន់តំបន់នេះ វានឹងត្រូវចំណាយនូវធនធានច្រើនបំផុត ពោលគឺធនធានថវិកា តែ ម្តង។លោក វិចទ័រ ហ្សូណាបន្តថា ការតភ្ជាប់បណ្តាញខ្សែថាមពលនេះ គឺដើម្បីងាយស្រួលធ្វើគ្រប់ គ្រងនូវ ការប្រើប្រាស់ថាមពល។
យ៉ាងណាក៏ដោយ បញ្ហាសាងសង់ទំនប់ថាមពលវារីអគ្គិសនីនៅសាយ៉ាបូរីមិនត្រូវបានគេលើកយកធ្វើការពិភាក្សាក្នុងកិច្ចប្រជុំនេះទេ។
តាម កម្មវិធីគ្រោងទុក នៅថ្ងៃទី១១ ខែកញ្ញានេះ គឺមានកិច្ចប្រជុំរដ្ឋមន្ត្រីអាស៊ានថាមពលបូក បី និងអាស៊ីបូព៌ា ដែលធ្វើនៅសណ្ឋាគារកាំបូឌីយ៉ាណា។
ថ្ងៃទី១២ ខែកញ្ញា គឺជាកិច្ចប្រជុំនៃវេទិកា ធុរកិច្ចថាមពលអាស៊ាន(ការតភ្ជាប់អាស៊ានបៃតង) ដែលនឹងធ្វើឡើងនៅវិមានសន្តិភាព ក្រោមការបើក ដោយអធិបតីភាពសម្តេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជា។
ថ្ងៃទី១៣ ខែកញ្ញា គឺជាកិច្ចសន្ទនារវាងរដ្ឋមន្ត្រីថាមពលអាស៊ានទាំង១០ ជាមួយ និងសហគ្រិនភាព និងមន្ត្រីប្រតិបត្តិ(CEO) នៅ សណ្ឋាគារកាំបូឌីយ៉ាណា។ និងថ្ងៃទី១៤ គឺជាកិច្ច សន្ទនារវាងរដ្ឋមន្ត្រីថាមពលអាស៊ានជាមួយនិងមន្ត្រីពាណិជ្ជកម្មអាស៊ាន សហរដ្ឋអាមេរិក( AMEM dialogue with the US-ASEAN Business Council)៕