បាត់ដំបង: ដីព្រៃឈើរបស់រដ្ឋ នៅចំណុចអក្សរតេ ភូមិព្រៃធំ ឃុំកំពុងល្ពៅ ស្រុកសំឡូត ខេត្តបាត់ដំបង កំពុងរងការកាប់បំផ្លាញ ផ្កើនអនុសាសន៍សម្ដេច ហ៊ុន សែន ដោយក្រុមអ្នកស្រុកជាច្រើនក្រុម បានស៊ីឈ្នួលកាប់ឆ្ការ ឲ្យឈ្មួញអ្នកមានប្រាក់ យកកាន់កាប់ធ្វើកម្មសិទ្ធិ។
មន្ត្រីអង្គការ បានឃាត់ខ្លួនក្រុមអ្នកស្រុកស៊ីឈ្នួលកាប់ឆ្ការដីព្រៃនោះ ចំនួន ១១ នាក់ និងដកហូតបានសម្ភារៈវត្ថុតាង កាំបិត និងម៉ាស៊ីនរណាង៉ោង ២គ្រឿង។ ប៉ុន្តែព្រះរាជអាជ្ញា អះអាងថា អង្គការគ្មានសិទ្ធិទៅចាប់ និងរឹបអូសរបររបស់គេទេ។
ហេតុការណ៍ឃាត់ខ្លួនប្រជាពលរដ្ឋទាំង ១១ នាក់នោះ បានកើតឡើង កាលពីថ្ងៃទី៩ ខែកញ្ញា ឆ្នាំ២០១២។ ប៉ុន្តែនៅថ្ងៃទី១១ ខែកញ្ញា ឆ្នាំ២០១២ ព្រះរាជអាជ្ញា បានសម្រេចដោះលែងអ្នកស្រុកទាំងនោះ ឲ្យមានសេរីភាពឡើងវិញ។
លោក ស៊ឹម សុជាតិ មន្ត្រីអង្គការការពារបរិស្ថានអភិវឌ្ឍន៍ នៅភូមិ-ឃុំកំពុងល្ពៅ ស្រុកសំឡូត បានឲ្យដឹងថា នៅវេលាម៉ោង ១ រសៀល ថ្ងៃទី៩ ខែកញ្ញា ឆ្នាំ២០១២ កម្លាំងចម្រុះ ក្នុងនោះមាន អាវុធហត្ថស្រុកសំឡូត កម្លាំងទាហានវរៈការពារព្រំដែន លេខ៣១០ និងនាយរងប៉ុស្ដិ៍នគរបាល ឃុំកំពុងល្ពៅ និងកម្លាំងអង្គការការពារបរិស្ថានអភិវឌ្ឍន៍ ប្រចាំស្រុកសំឡូត បានចុះទៅឃាត់ខ្លួនអ្នកស្រុក ចំនួន ១១នាក់ ដែលកំពុងធ្វើសកម្មភាពកាប់បំផ្លាញដីព្រៃរបស់រដ្ឋ នៅចំណុចអក្សរតេ ក្នុងភូមិព្រៃធំ ឃុំកំពុងល្ពៅ ស្រុកសំឡូត ខេត្តបាត់ដំបង។
លោកបន្ថែមថា ក្នុងប្រតិបត្តិការនោះ ខាងកម្លាំងចម្រុះ និងអង្គការការពារបរិស្ថានអភិវឌ្ឍន៍ បានដកហូតបានកាំបិតខ្វែវចំនួន៧(កាំបិតបាក់ផ្លែមួយ) ម៉ាស៊ីនរណាង៉ោង (ម៉ាស៊ីនត្រង់សឺន័រ) ចំនួន ២គ្រឿង ដងឡាមចំនួន ២ដើម ច្រវាក់ចំនួន ២ខ្សែ (ច្រវាកកាត់ឈើ) យកមកប៉ុស្ដិ៍នគរបាលឃុំកំពុងល្ពៅ ដើម្បីកសាងសំណុំរឿងបញ្ជូន ទៅអធិការដ្ឋាននគរបាល ស្រុកសំឡូត ចាត់ការបន្តតាមនីតិវិធី។
ពាក់ព័ន្ធករណីនេះ លោក នួន សាន ព្រះរាជអាជ្ញាអមសាលាដំបូង ខេត្តបាត់ដំបង បានប្រាប់តាមទូរស័ព្ទ កាលពីព្រឹកថ្ងៃទី១១ ខែកញ្ញា ឆ្នាំ២០១២ ថា លោក ស៊ឹម សុជាតិ ជាមន្ត្រីអង្គការមួយ មិនមែនជាមន្ត្រីនគរបាលយុត្តិធម៌ទេ ហើយទៅចាប់ដកហូតសម្ភារៈរបស់ប្រជាពលរដ្ឋយកមក ដោយគ្មានបានពិគ្រោះយោបល់ជាមួយអាជ្ញាធរសមត្ថកិច្ច (ព្រះរាជអាជ្ញាអមតុលាការ)។ មន្ត្រីអង្គការនោះ បានចោទថា មានការកាប់បំផ្លាញព្រៃរាប់រយហិកតា ហើយថា សមត្ថកិច្ចអាជ្ញាធរមូលដ្ឋាន ឬជំនាញ បែរជាមិនដឹងរឿងនោះទៅវិញ។
ប្រជាពលរដ្ឋបានឲ្យដឹងថា ដីព្រៃរបស់រដ្ឋ ប្រមាណជា ២៥០ហិកតា នៅចំណុចទឹកពុល ក្នុងភូមិព្រៃធំ ជាប់ព្រំប្រទល់ស្រុកគាស់ក្រឡ រងការកាប់បំផ្លាញយកដីកាន់កាប់ធ្វើកម្មសិទ្ធិ ដោយអ្នកមានប្រាក់ម្នាក់ឈ្មោះ នៅ ធាន។
ចំណែកដីព្រៃមួយកន្លែងទៀតប្រមាណ ១២០ ហិកតា (នៅសងខាងផ្លូវ) រងការកាប់បំផ្លាញដែលមានមេភូមិម្នាក់ឈ្មោះ ស្ងួន ឌៀប។ ដីព្រៃនៅចំណុចឱចំបក់ (ហៅ វាលចំបាំង) ក្នុងភូមិព្រៃធំ រាប់រយហិកតា កំពុងត្រូវអ្នកស្រុកកាប់បំផ្លាញយកដីកាន់កាប់ធ្វើកម្មសិទ្ធិ។
ដីព្រៃនៅចំណុចវត្តថ្មីវាលចំបាំង ក្នុងភូមិព្រៃធំ ប្រមាណ ១០០ហិកតា កាប់បំផ្លាញដោយក្រុមអ្នកស្រុកដែរ មកដល់បច្ចុប្បន្ននេះ ដោយគ្មាននរណា ទប់ស្កាត់ទេ។
យោងតាមកំណត់ហេតុសាកសួរអ្នកស្រុកទាំង ១១នាក់ ក្នុងនោះ ឈ្មោះ សួស ហយ អាយុ ៤២ឆ្នាំ បច្ចុប្បន្នរស់នៅភូមិព្រៃធំ ឃុំកំពុងល្ពៅ ស្រុកសំឡូត បានប្រាប់សមត្ថកិច្ចប៉ូលិសប៉ុស្ដិ៍ថា ពួកគាត់ទាំង ១១នាក់ គឺស៊ីឈ្នួលកាប់ដីព្រៃនៅចំណុចអក្សរតេ ក្នុងភូមិព្រៃធំ ឃុំកំពុងល្ពៅ ស្រុកសំឡូត ពិតប្រាកដមែន ដោយទទួលបញ្ជាពីលោក ហេង គឹមនី ជាអ្នកជួលកាប់ឆ្ការក្នុងតម្លៃ មួយថ្ងៃ ១៥.០០០ រៀល ក្នុងម្នាក់ៗ។
ពាក់ព័ន្ធរឿងនេះដែរ លោក លី ជួបៀង នាយខណ្ឌរដ្ឋបាលព្រៃឈើបាត់ដំបង បានឲ្យដឹងថា នៅចំណុចភូមិព្រៃធំ ឃុំកំពុងល្ពៅនោះ ដែលលោក ស៊ឹម សុជាតិ មន្ត្រីអង្គការការពារបរិស្ថាន អះអាងថា មានកាប់បំផ្លាញព្រៃរបស់រដ្ឋ ដោយក្រុមឈ្មួញ ឬអ្នកស្រុកនោះ គឺលោកបានទទួលព័ត៌មាននេះដែរ ប៉ុន្តែកម្លាំងជំនាញមេព្រៃ នឹងចុះទៅពិនិត្យមើលនាពេលឆាប់ៗនេះ៕