ដោយ ៖ សំរិត
ភ្នំពេញ ៖ នារីជាក្រុមប្រឹក្សាសង្កាត់ ក្រុមប្រឹក្សាខណ្ឌប្រមាណ១៧២រូបមកពី៩៦សង្កាត់ និង៩ខណ្ឌ ក្នុងរាជធានីភ្នំពេញបានមកទទួលវគ្គបណ្ដុះបណ្ដាល ស្ដីពីបញ្ហាយេនឌ័រ យុទ្ធសាស្ដ្របញ្ជ្របយេនឌ័រ ក្នុងផែនការស្ថិតិដែលរៀបចំដោយគណៈកម្មាធិការពិគ្រោះយោបល់កិច្ចការស្ដ្រីនិងកុមារនៅសាលារជធានីនាព្រឹកថ្ងៃទី១១ កញ្ញា ឆ្នាំ២០១២ ។
លោកស្រី ទូច សារ៉ុម អភិបាលរងរាជធានីភ្នំពេញបានបញ្ជាក់ថា បើនិយាយពីការបញ្ជ្រាប យេនឌ័រគឺយើងបានចាប់អនុវត្ដតាំងពីឆ្នាំ២០០៣មកម្លះ សម្រាប់រាជធានីភ្នំពេញដែលកាលនោះមានឈ្មោះថា (កម្មវិធីសិលា) ក្រោមជំនួយឧបត្ថម្ភពីដៃគូអភិវឌ្ឍន៍នានា(UNDP), (ADB) និងក្រោយមកទៀតមានការប្ដូរឈ្មោះជាកម្មវិធីជាតិសម្រាប់ការអភិវឌ្ឍតាមបែបប្រជាធិបតេយ្យនៅថ្នាក់ក្រោមជាតិរយៈពេល១០ឆ្នាំ (២០១០-២០១៩) ។ ដូច្នេះយើងធ្វើការបញ្ជ្រាបយេនឌ័រអស់រយៈពេលជាង៩ឆ្នាំមកហើយ ។ លោកស្រី ទូច សារ៉ុម នៅតែមានការព្រួយបារម្មណ៍ពីបញ្ហាយេនឌ័រថា ការផ្លាស់ប្ដូរទម្លាប់ និងឥរិយាបទថរបស់មនុស្សត្រូវការពេល វេលាយូរ វាទាមទារឱ្យមានការចូលរួមទាំងអស់គ្នាឬអាចនិយាយបានថា ការប្រើកម្លាំងសរុបតាំងពីថ្នាក់ជាតិរហូតដល់ថ្នាក់ក្រោមជាតិនៅមូលដ្ឋាន ដើម្បីឱ្យគេយល់ទើបគេចូលរួម ។
លោកស្រី គឹម ស៊ីផាន់ អគ្គនាយកនៃអគ្គនាយកដ្ឋានសមភាពយេនឌ័រ ក្រសួងកិច្ចការនារី បានបញ្ជាក់ថា គោលបំណងកម្មវិធីបញ្ជ្រាបយេនឌ័រស្ដ្រីទៅក្នុងផែនការស្ថិតិ គឺចង់បង្កើន និងលើកកម្ពស់ស្ដ្រីឱ្យយល់ដឹងពីបញ្ហាយេនឌ័ររួមការងារអភិវឌ្ឍន៍សង្គមជាតិ និងការងារនយោបាយ ការទូត ។ យើងចង់លើកកម្ពស់ស្ដ្រីឱ្យយល់ដឹងពីការអនុវត្ដសកម្មភាពក្នុងផែន ការជាតិនានា និងពីគណៈកម្មាធិការពិគ្រោះយោបល់កិច្ចការស្ដ្រី និងកុមារនៅថ្នាក់រាជធានី ត្រូវផ្ដល់បន្ដទៅថ្នាក់ខណ្ឌ សង្កាត់ឱ្យមានការយ់ដឹងកាន់តែមានប្រសិទ្ធភាព ដើម្បីឱ្យនារី ជាក្រុមប្រឹក្សានៅថ្នាក់ សង្កាត់ និងខណ្ឌនេះយកទៅអនុវត្ដបន្ដនៅថ្នាក់មូលដ្ឋានកាន់តែល្អប្រសើរឡើង ។ លោកស្រីបញ្ជាក់ទៀតថា ស្ដ្រីនិងបុរសមានសិទ្ធិចូលរួម និងទទួលផលស្មើគ្នា ។ ស្ដ្រីនិងបុរសមានភាពស្មើគ្នាក្នុងការទទួលបានពត៌មាន ធនធាន និងសេវាកម្ម កម្មវិធីដូចគ្នា ។ ស្ដ្រីនិងបុរសមានលទ្ធភាពស្មើគ្នាក្នុងការត្រួតពិនិត្យលើសេចក្ដីសម្រេចចិត្ដ សមិទិ្ធផលរបស់កម្មវិធីអន្ដរាគមន៍ ។ ដោយឡែកស្ដ្រីចូលរួមក្នុងកម្មវិធីផែនការវិញគឺ ស្ដ្រីនឹងទទួលបាននូវផលប្រយោជន៍ដោយស្វ័យប្រវត្ដិពីកម្មវិធីទូទៅ ។ កម្មវិធីដែលទទួលបានរៀបចំឡើង ផ្អែកលើតួនាទីតំណាងនៃយេនឌ័រ ។ ស្ដ្រីត្រូវតែមានកម្មវិធីដាក់បន្ថែម លើតួនាទីយេនឌ័រ ក្រោយពេលដែលការរៀបចំគម្រោងត្រូវបានបញ្ចប់ ៕