ដោយ ៖ នស្សិតឆ្នាំទី៣
ខ្ញុំបាទជានិស្សិតឆ្នាំទី៣នៅសាកលវិទ្យាល័យឯកជនមួយ ដែលបច្ចុប្បន្ននេះខ្ញុំស្នាក់នៅភូមិព្រែកទាល់ សង្កាត់ស្ទឹងមានជ័យ ខណ្ឌមានជ័យ សូមគោរពចូលមក នាយកកាសែតនគរវត្ដស្នើសុំជួយចុះផ្សាយអត្ថបទរបស់ខ្ញុំក្រោមចំណងជើងថា “អាជ្ញាធរ និងសមត្ថកិច្ចស្ទឹងមានជ័យជួយរៀបចំសណ្ដាប់ធ្នាប់នៅមុខមន្ទីរពេទ្យ រុស្ស៊ី (មន្ទីរពេទ្យមិត្ដភាពខ្មែរ-សូវៀត)ផង” ដោយក្ដីអនុគ្រោះ ។
ជារឿយៗខ្ញុំតែងសង្កេតឃើញកាសែតនគរវត្ដមានចុះផ្សាយអំពីមតិលិខិតមិត្ដ អ្នកអានដែលផ្ញើទៅការិយាល័យនិពន្ធកាសែតនគរវត្ដ ។ ត្រង់ចំណុចនេះខ្ញុំចាប់ អារម្មណ៍ ពីព្រោះថាលិខិតរបស់ប្រជាពលរដ្ឋទាំងនោះបានសរសេររៀបរាប់ពីការពិត ដែលបានកើតឡើងក្នុងសង្គមនាពេលបច្ចុប្បន្ន ។ ចំណែកខ្ញុំក៏មានលិខិតមួយ ចង់និយាយអំពីភាពអនាធិបតេយ្យឬការលក់ដូរឥតសណ្ដាប់ធ្នាប់នៅមុខមន្ទីរពេទ្យមិត្ដភាព ខ្មែរ-សូវៀតនេះដែរ ។
នៅពេលល្ងាចចាប់ពីម៉ោងប្រមាណ៥រហូតដល់យប់នៅលើចិញ្ចើមផ្លូវលេខ ២៧១ ខាងមុខមន្ទីរពេទ្យក្នុងដែនសមត្ថកិច្ចសង្កាត់ស្ទឹងមានជ័យ ខ្ញុំតែងតែសង្កេត ឃើញក្រុមអាជីវករលក់ដូរមួយចំនួននៅទីនោះបានដាក់តាំងលក់ដូរម្ហូបអាហារ លយលៀនចូលដល់ផ្លូវលេខ២៧១ជារៀងរាល់ថ្ងៃ ។ អ្នកលក់ដូរទាំងនោះមិន គិតគូរអំពីការកកស្ទះចរាចរនាវេលាល្ងាចនោះទេ ពីព្រោះថ្មើរហ្នឹងនៅមុខមន្ទីរ ពេទ្យរុស្ស៊ីកកស្ទះចរាចរជារឿយៗអាស្រ័យដោយការតាំងលក់របស់របរម្ហូបអាហារ លយចូលមកផ្លូវលេខ២៧១ ដែលធ្វើឱ្យអ្នកឈប់ទិញម្ហូបអាហារ និងរបស់របរ ទាំងនោះចតម៉ូតូ រថយន្ដកាន់តែហៀរចូលស្ទើរតែដល់ទ្រូងផ្លូវ ។ បញ្ហានេះហើយ នាំឱ្យកកស្ទះចរាចរ និងបង្កឱ្យមានគ្រោះថ្នាក់ដល់អ្នកធ្វើដំណើរ ។
ការលក់ដូរមិនបានគិតគូរអំពីសុវត្ថិភាពរបស់អ្នកធ្វើដំណើរ ហើយបែរជាគិត ផលប្រយោជន៍ផ្ទាល់ខ្លួនពុំមែនជាប្រការល្អនោះទេ ។ ចំណោទនេះពុំមែនជាការ ហាមប្រាមដល់អាជីវករទាំងអម្បាលម៉ាននោះមិនឱ្យលក់នៅទីនោះឡើយ ប៉ុន្ដែ ការលក់ដូររាល់ទំនិញសព្វសារពើគួរតែលក់ដូរឱ្យមានសណ្ដាប់ធ្នាប់ របៀបរៀបរយ កុំឱ្យលយលៀនចូលស្ទើរតែដល់ទ្រូងផ្លូវទៅហើយនោះ ។ ក្រុមអាជីវករអាចលក់ដូរ ដោយកុំយកផ្លូវសាធារណៈធ្វើជាកន្លែងតាំងលក់ម្ហូបអាហារ របស់របរដោយភ្លេច គិតអំពីសុវត្ថិភាពដល់អ្នកធ្វើដំណើរ ។ និយាយបែបនេះពុំមែនចោទប្រកាន់មួលបង្កាច់ដល់ក្រុមអាជីវករមួយចំនួនទៀតដែលលក់ដូរមានរបៀបរបបនោះទេ ។
ការលក់ដូរមានរបៀបរៀបរយមិនបង្កឱ្យកកស្ទះចរាចរវាជាការរួមចំណែកកាត់ បន្ថយគ្រោះថ្នាក់ទាំងអស់គ្នា ហើយសាមីខ្លួនក៏អាចលក់ដូរដោយសុខស្រួលផងដែរ។ បើទោះបីជាអាជីវករលក់ដូរអនាធិបតេយ្យក៏គេមិនដែលឃើញអាជ្ញាធរ និង សមត្ថកិច្ចសង្កាត់ស្ទឹងមានជ័យ ឬក៏អធិការដ្ឋាននគរបាលខណ្ឌមានជ័យយកចិត្ដ ទុកដាក់រៀបចំសណ្ដាប់ធ្នាប់នៅទីនោះដែរ ។ ដោយគេបណ្ដែតបណ្ដោយឱ្យអាជីវករ មួយចំនួនលក់ដូររញ៉េរញ៉ៃទៅវិញ ប្រការនេះអាចបណ្ដាលមកពីសមត្ថកិច្ចបាន ទទួលលាភសក្ការពីក្រុមអាជីវករទាំងនេះ ទើបមិនចាប់វិធានការរៀបចំរបៀប រៀបរយដើម្បីរក្សាសុវត្ថិភាពដល់អ្នកធ្វើចរាចរនៅតាមបណ្ដោយផ្លូវលេខ២៧១ ។
ខ្ញុំសង្ឃឹមថា នៅពេលដែលកាសែតនគរវត្ដចេញផ្សាយដូចអ្វីដែលខ្ញុំបានរៀប រាប់មកនេះអាជ្ញាធរមានសមត្ថកិច្ចពិតជារៀបចំសណ្ដាប់ធ្នាប់នៅមុខមន្ទីរពេទ្យមិត្ដភាពខ្មែរ-សូវៀតឡើងវិញ ដើម្បីកុំឱ្យកកស្ទះចរាចរនាវេលាល្ងាច និងកាត់ បន្ថយគ្រោះថ្នាក់ចរាចរផងដែរ ។
ជាចុងបញ្ចប់ខ្ញុំសូមជូនពរដល់នាយកកាសែតនគរវត្ដ និងបុគ្គលិកទាំងអស់ ព្រមទាំងប្រជាពលរដ្ឋអ្នកអានកាសែតនគរវត្ដឱ្យសមប្រកបតែពរ៥ប្រការគឺ អាយុ វណ្ណៈ សុខៈ ពលៈ បដិភាណៈ កុំបីឃ្លៀងឃ្លាតឡើយ ៕