ភ្នំពេញ: ថវិកាសម្រាប់បម្រើដល់ការបោះឆ្នោតឆ្នាំ២០១៣ ដែលមានទាំងការពិនិត្យបញ្ជី និងចុះឈ្មោះបោះឆ្នោតមានចំនួនជាង ២០លានដុល្លារ។ នេះបើតាមការលើកឡើងរបស់លោក ទេព នីថា អគ្គលេខាធិការគណៈកម្មាធិការជាតិរៀបចំការបោះឆ្នោត (គ.ជ.ប) កាលពីព្រឹកថ្ងៃទី១១ ខែកញ្ញា ឆ្នាំ២០១២ ក្នុងកិច្ចប្រជុំរវាង គ.ជ.ប ជាមួយ គណបក្សនយោបាយ និងអង្គការមិនមែនរដ្ឋាភិបាល ដើម្បីផ្សព្វផ្សាយការប្រព្រឹត្តទៅ នៃការពិនិត្យបញ្ជីឈ្មោះ និងចុះឈ្មោះបោះឆ្នោត។
លោក ទេព នីថា បានបន្ថែមថា តាមចំនួនប្រជាពលរដ្ឋប៉ានស្មានដែលត្រូវបោះឆ្នោត គ.ជ.ប ត្រូវចំណាយ ក្នុងម្នាក់ចំនួន ២,១៤ ដុល្លារ ហើយបើប្រៀបធៀបការពិនិត្យ និងចុះឈ្មោះបោះឆ្នោតឆ្នាំនេះ និងឆ្នាំ២០១១ កន្លងទៅ នៅឆ្នាំនេះ ត្រូវចំណាយលើសប្រហែលជិត ១លានដុល្លារ។
លោកអគ្គលេខាធិការ បានលើកឡើងថា “ក្នុងការពិនិត្យបញ្ជីឈ្មោះ និងចុះឈ្មោះបោះឆ្នោត បើប្រៀបធៀបការចំណាយជាមួយប្រទេសផ្សេងៗ យើងមានការសន្សំសំចៃខ្លាំងណាស់ ព្រោះថា ដើម្បីថែរក្សាឈ្មោះមួយ ក្នុងបញ្ជីបោះឆ្នោតក្នុង ១ឆ្នាំ ដែលមិនមានការបោះឆ្នោត យើងចំណាយប្រហែលជាលុយតែ ៦រយរៀលលុយខ្មែរទេ ហើយបើឆ្នាំមានការបោះឆ្នោត យើងចំណាយប្រហែល ១.៧០០ ទៅ ១.៨០០ រៀលទេ។ អ៊ីចឹងអត់បានកន្លះដុល្លារ សម្រាប់មនុស្សម្នាក់”។
សូមជម្រាបថា ការពិនិត្យបញ្ជីឈ្មោះ និងចុះឈ្មោះបោះឆ្នោតមានរយៈពេល ៤២ថ្ងៃ ដោយចាប់ពីផ្ដើមពីថ្ងៃទី១ ខែកញ្ញា ដល់ថ្ងៃទី១២ ខែតុលា ឆ្នាំ២០១២។ ការពិនិត្យបញ្ជីឈ្មោះ និងចុះឈ្មោះបោះឆ្នោតឆ្នាំ២០១២ គឺជាការកសាងបញ្ជីបោះឆ្នោតមួយ សម្រាប់បម្រើការបោះឆ្នោតជ្រើសរើសតំណាងរាស្ដ្រ នីតិកាលទី៥ នាថ្ងៃទី២៨ ខែកក្កដា ឆ្នាំ២០១៣៕