ដោយ ៖ វណ្ណៈ
ខេត្តកំពង់ចាម ៖ នៅព្រឹកថ្ងៃទី១១ ខែកញ្ញា ឆ្នាំ២០១២នេះ នៅស្នងការនគរបាលខេត្តកំពង់ចាម មានរៀបចំពិធីប្រគល់ម៉ូតូប្រដេញដែលជាអំណោយរបស់លោក ហ្គារីវិញ នាយនគរបាលសម្របសម្រួលជាន់ខ្ពស់ នគរបាលស្ថានទូតអូស្ត្រាលីប្រចាំកម្ពុជា និងលោក អៀន ជាសហការី ប្រគល់ដល់ស្នងការនគរបាលខេត្តកំពង់ចាម សម្រាប់កម្លាំងកងអន្តរាគមន៍ប្រើ ប្រាស់ល្បាតការពារសន្តិសុខសង្គម ។ ពិធីប្រគល់នេះ ដឹកនាំដោយលោក ហ្គារីវិញ នាយនគរបាលស្ថានទូតអូស្ត្រាលីប្រចាំកម្ពុជា និងលោក អៀន ជាសហការី ចំណែកឯខាងភាគី កម្ពុជាមានលោកឧត្តមសេនីយ៍ត្រី ឆាយ គឹមសុន ស្នងការនគរបាលខេត្តកំពង់ចាម និងលោក ស្នងការរងជាច្រើនរូបទៀត ក៏មានវត្តមាននាឱកាសនោះដែរ ។
សូមបញ្ជាក់ថា នេះជាអំណោយលើកទី៥ហើយ ដែលលោក ហ្គារីវិញ ប្រគល់ជូនមកស្នងការនគរបាលខេត្តកំពង់ចាម ហើយក៏ជាមោទនភាពមួយរបស់ស្នងការ ឆាយ គឹមសុន ដែលបានខិតខំយកចិត្តទុកដាក់ក្នុងការទំនាក់ទំនង ការកសាង ដែលសម្រេចបាននូវសមិទ្ធផល ទាំងឡាយនេះ ។ ក្នុងឱកាសនោះ លោកឧត្តមសេនីយ៍ស្នងការ ក៏បានថ្លែងអំណរគុណដល់ លោក ហ្គារីវិញ នាយនគរបាលប្រចាំស្ថានទូតអូស្ត្រាលី ដែលបានប្រគល់ម៉ូតូជាអំណោយ ដល់ ស្នងការនគរបាលខេត្តកំពង់ចាម តាមរយៈលោកអគ្គស្នងការនគរបាលជាតិ ហើយលោក ក៏សូមថ្លែងអំណរគុណដល់លោកនាយនគរបាលប្រចាំស្ថានទូតអូស្ត្រាលី ដែលបានវគ្គបណ្តុះបណ្តាលដល់កងកម្លាំងនគរបាលខេត្តកំពង់ចាម ចំនួន៤វគ្គកន្លងមកហើយ មិនតែប៉ុណ្ណោះទេ ថែមទាំងប្រគល់ម៉ូតូដែលមានតម្លៃក្នុងម៉ូតូ១ គ្រឿង ៨ពាន់ដុល្លារជាង នៅលើកទី៥នេះ ហើយលោក ឧត្តមសេនីយ៍ស្នងការក៏សង្ឃឹមយ៉ាងមុតមាំថា លោក ហ្គារីវិញ នាយនគរបាលប្រចាំស្ថានទូត អូស្រា្តលីនឹងជួយបណ្តុះបណ្តាលជំនាញដល់មន្ត្រីនគរបាលចរាចរណ៍នៃស្នងការនគរបាលខេត្ត កំពង់ចាមបន្តទៀត ហើយអ្វីដែលលោក ហ្គារីវិញជួយមកនេះ គឺជាមោទនភាពរបស់កងកម្លាំង នគរបាល ពិសេសមិនសំរាប់តែស្នងការនគរបាលខេត្តកំពង់ចាមទាំងមូលនោះទេ គឺសម្រាប់ កម្លាំងនគរបាលទូទាំងព្រះរាជាណាចក្រកម្ពុជាទាំងមូលដែលលោក ហ្គារីវិញ បានជួយបណ្តុះ បណ្តាលកន្លងមក ។
នាឱកាសនោះ លោក ហ្គារីវិញ បានមានប្រសាសន៍ថា ខាងនគរបាលអូស្ត្រាលីមានសេចក្តីរីករាយជានិច្ចក្នុងការជួយបណ្តុះបណ្តាលដល់នគរបាលនៃព្រះរាជាណាចក្រកម្ពុជា ហើយសក្ខីភាពទាំងអស់នេះ លោកសូមកោតសសើរដល់នគរបាលកម្ពុជាដែល អនុវត្តបានយ៉ាងមានប្រសិទ្ធិភាពក្នុងប្រតិបត្តិការរបស់ខ្លួន ៕